دَرگوَز 28

دینی پێشوایانی گُد

1وتی برات هارون و آییئے مَردێن‌چُکّان، بزان ناداب و اَبیهو و اِلیازَر و ایتامارا چه اِسراییلیانی نیاما وتی کرّا بیار که دینی پێشوا ببنت و منی هِزمتا بکننت. 2په وتی برات هارونا پاکێن گُد تئیار کن که هارونا بْرَهدار#28‏:2 بْرَهدار، بزان جلوَه‌ناک، زێبدار. و شاندار بکننت. 3هما سجّهێن هُنرمند که من په چُشێن کاران دانایی بکشاتگ‌اَنت، آیان بگوَش که هارونئے پۆشاکان تئیار بکنێت که هارونِش گوَرا بکنت و په دینی پێشوایی و منی هِزمتا وَپک ببیت. 4اِش اَنت هما پۆشاک که تئیار کنگی اَنت: سێنَگ‌پۆشے، اێپۆدے، کباهے، نَکش نَکشێن جامگے، پاگے و لانکیگے#28‏:4 لانکیگ، بزان چادِر، مزنێن گُد که لانکا بندَگ یا کۆپَگا کنگَ بیت. په تئیی برات هارون و آییئے مَردێن‌چُکّان اے پۆشاکان تئیار بکننت که هارون و چُکّ دینی پێشوا ببنت و منی هِزمتا بکننت. 5اے پۆشاکان چه تلاها و چه آسمانی و جَمو و سُهرێن پَژما و چه شَرّێن لیلُما تئیار بکننت.

اێپۆد

6اێپۆدا گۆن تلاها و گۆن آسمانی و جَمو و سُهرێن پَژما و گۆن رِستگێن شَرّێن لیلُما تئیار بکننت. اے کارا هُنرمندێن اِزمکارے بکنت. 7اِشیئے دو سْروگا#28‏:7 سْروگ، بزان ڈَنّی نێمگئے کُنڈ. دو سَرکۆپَگ پِر کن که اێپۆد بندگ ببیت. 8اێپۆدئے بند اێپۆدئے پئیما ببیت، بزان گۆن تلاها و گۆن آسمانی و جَمو و سُهرێن پَژما و گۆن هورت‌گواپێن لیلُما تئیار کنگ ببیت. اے بند و اێپۆد هۆر گوَپگ ببنت، اے یَک‌ٹُکُّر ببنت.

9دو سِنگِ سُلئیمان بزور و آیانی سرا اِسراییلئے مَردێن‌چُکّانی نامان آجِن#28‏:9 آجِنَگ، بزان نَکش کنگ. و نَکش کن. 10آیانی پێدا بئیگئے رِد و بندئے هسابا شَش نام یکّ سِنگێئے سرا و آ دگه شَشێن نام دومی سِنگئے سرا ببنت. 11هما پئیما که آجِنۆک مُهرے نَکشَ چِنت، تئو هم اِسراییلئے چُکّانی نامان همے دوێن سِنگانی سرا آجِن. دوێن سِنگان دو تِلاهئے مُهرَگ‌جاهئے#28‏:11 مُهرَگ‌جاه، مُندریکّ یا دگه سَهت و زێوَرێئے هما جاگه که اۆدا مُهرَگا پِرَ کننت. تها کن و 12اێپۆدئے دوێن سَرکۆپَگان پِرِش کن که اِسراییلئے چُکّانی یاتگێجیئے سِنگ اَنت. هارون هُداوندئے بارگاها په یاتگێجیا اِشانی نامان وتی دوێن کۆپَگانی سرا بکنت. 13تلاهئے مُهرَگ‌جاه اَڈّ کن و 14چه زَگرێن تِلاها رِستگێن سادئے ڈئولێن دو زَمزیلُک اَڈّ کن و گۆن مُهرَگ‌جاهان لِچّێن.

سێنَگ‌پۆش

15پئیسَله‌سازیئے سێنَگ‌پۆشے اَڈّ کن. اِشیا اێپۆدئے پئیما اَڈّ کن، بزان چه تلاها و چه آسمانی و جَمو و سُهرێن پَژما و چه هورت‌گواپێن لیلُما اَڈّی کن. اے کارا هُنرمندێن اِزمکارے بکنت. 16اے سێنَگ‌پۆش چارکُنڈ ببیت و دوتَل ببیت. دْراجی و پْراهیا یکّ یکّ بِچیلّے#28‏:16 یکّ بِچیلّ نێم دستے، بزان 25 سِنتیمیتَر. ببیت. 17اِشیئے سرا چار رِدا گران‌کیمّتێن سِنگ لِچّێن. ائولی رِدا روبی، پُکراج و بئیرِل، 18دومی رِدا پێرۆزه، نیلُم و زُمُرّد، 19سئیمی رِدا شونزێن آکوت، اَکیک و جَموێن آکوت، 20چارمی رِدا تلاه‌رنگێن آکوت، سِنگِ سُلئیمان و یَشْم. اِشان تلاهێن مُهرَگ‌جاهان بنادێن. 21سِنگ، اِسراییلئے چُکّانی نامانی هسابا ببنت، دوازده نام و دوازده سِنگ. هر یکّێئے سرا چه دوازدهێن کَبیلهان یکّێئے نام چۆ مُهرا نَکش ببیت. 22په سێنَگ‌پۆشا چه زَگرێن تلاها رِستگێن سادئے ڈئولێن زَمزیلُک اَڈّ کن. 23په سێنَگ‌پۆشا دو تلاهێن کَڑی اَڈّ کن و سێنَگ‌پۆشئے دو سْروگا پِرِش کن. 24دوێن تلاهێن زمزیلُکانی یکّ یکّ سرے بزور و سێنَگ‌پۆشئے دوێن سْروگانی کَڑیان مانِش کن. 25زمزیلُکانی دومی سران بزور و گۆن دوێن مُهرَگ‌جاهان لِچّێن، اێپۆدئے سَرکۆپَگانی دێمی نێمگا. 26چه تلاها دو کَڑی اَڈّ کن و سێنَگ‌پۆشئے آ دگه دوێن سْروگانِش پِر کن، هما لَمبان که دێمِش گۆن اێپۆدا اِنت. 27چه تلاها دگه دو کَڑی اَڈّ کن و اێپۆدئے دێما، سَرکۆپَگانی جَهلی نێمگا، اێپۆدئے بندئے سربرا پِرِش کن، همۆدا که سَرکۆپَگ گۆن اێپۆدا لِچِّتگ‌اَنت. 28سێنَگ‌پۆشئے کَڑیان گۆن آسمان‌رنگێن بندان اێپۆدئے کَڑیان اَنچۆ بند که سێنَگ‌پۆش اێپۆدئے بندئے سربرا ببیت و چه اێپۆدا مَسُریت.

29هارون که پاکێن جاگها رئوت، اِسراییلئے مردێن‌چُکّانی نام پئیسله‌سازیئے سێنَگ‌پۆشئے سرا په یاتگێجی مُدام هُداوندئے بارگاها آییا گۆن ببنت. 30اوریم و تومیما#28‏:30 اوریم و تومیم دو اَنچێن چیزّ بوتگ‌اَنت که پئیسله کنگئے وهدا په هُدائے رَزائے زانگا کارمَرز بوتگ‌اَنت. پئیسله‌سازیئے سێنَگ‌پۆشا مان کن که وهدے هارون هُداوندئے بارگاها رئوت، اے آییئے دلئے سرا ببنت. اے ڈئولا هارون هر وهدا هُداوندئے بارگاها اِسراییلئے پئیسله‌سازیئے ائوزاران وتی دلبَندا بداریت.

دینی پێشوایانی آ دگه گُد

31اێپۆدئے کباها سَرجمیا چه آسمان‌رنگێن گُدا اَڈّ کن. 32کباها گُٹّے پِر ببیت. گُٹّئے چپّ و چاگردا کالارئے پئیمێن دَزگواپێن کِناریے پِر ببیت که گُٹّ مَدِریت. 33آسمانی و جَمو و سُهرێن پَژمئے اَنار اَڈّ کن و کباهئے لَمبا، چپّ و چاگردا پِرِش کن و اِشانی نیاما تلاهێن ژانگ#28‏:33 ژانگ، بزان ٹِلینگۆک، زنگوله. پِر کن. 34کباهئے دامُنئے چپّ و چاگردا ژانگے و اَنارے، ژانگے و اَنارے پِر کنان کن. 35هما وهدا که هارون هِزمت کنگا بیت، اے کباها گوَرا بکنت. وهدے هُداوندئے بارگاها پاکێن جاگها رئوت یا چه اۆدا درَ کپیت، ژانگانی تئوار اِشکنگ ببیت و اے هبر زانگ ببیت که هارون زندگ اِنت.

36چه زَگرێن تلاها پَٹّیے اَڈّ کن و اے لبزان چۆ مُهرئے نَکشا پَٹّیئے سرا نَکش کن: ’وَپْکِ هُداوندی.‘ 37اِشیا گۆن آسمان‌رنگێن بندێا، پاگئے دێمی نێمگا بند. 38اے هارونئے پێشانیگا بیت و اِسراییلی که وَپکێن شُگرانهَ دئینت، شُگرانه هرچے که ببنت، اگن اے کارئے تها رَدیے بوت، زِمّه هارونئے سرا بیت. اے پَٹّی هر وهدا هارونئے پێشانیگا بیت که هُداوند شُگرانهان کبول بکنت.

39جامَگا چه شَرّێن لیلُما اَڈّ کن و نَکشی پِر کن. شَرّێن لیلُمئے پاگے اَڈّ کن و رنگ‌گواپێن لانکیگے هم اَڈّ کن. 40په هارونئے مَردێن‌چُکّان اَنچێن جامَگ و لانکیگ و کُلاه اَڈّ کن که آیان بْرَهدار و شاندار بکننت. 41اے گُدان وتی برات هارون و آییئے چُکّانی گوَرا دئے. هارون و چُکّان رۆگن پِر مُش و گیشّێن و وَپکِش کن و دینی پێشواییئے کارا همایانی دستا دئے. 42په آیان چه لیلُما چێرپۆش اَڈّ کن که آیانی جاندریا بپۆشنت. اے چه سرێنا تان رانان ببنت. 43وهدے هارون و آییئے چُکّ شاهدیئے تَمبوئے تها یا کُربانجاهئے نزّیکّا رئونت، بزان په هِزمتا پاکێن جاگها کاینت، اے چێرپۆشان بپۆشنت. چۆ مبیت که گناهے وتی سرا بلَڈّنت و بمرنت. اے په هارون و آییئے نَسل و پَدرێچا اَبدمانێن پرمانے.

Currently Selected:

دَرگوَز 28: HPKB

Highlight

Copy

Compare