دَرگوَز 27

سۆچَگی کُربانیگانی کُربانجاه

1چه چِگردئے دارا کُربانجاهے اَڈّ کن. دْراجی و پْراهیا پَنچ پَنچ دَست ببیت. کُربانجاه چارکُنڈ ببیت. بُرزیا سئے دَست ببیت. 2کُربانجاهئے چارێن کُنڈانی سرا یکّ و یکّ کانٹے اَڈّ کن. کانٹان و کُربانجاها جتا جتا اَڈّ مکن، اے یَک‌ٹُکُّر ببنت. کُربانجاها گۆن بْرِنجا سرپۆش کن. 3کُربانجاهئے پُرانی در کنگئے تَگاری و بَرد و تاس و چارشاه و آسدان، سجّهێن سامانانی چه بْرِنجا اَڈّ کن. 4په کُربانجاها جالیے،#27‏:4 جالی، بزان مُشَبَّک، چمّگ، چمّگێن برِنجێن یا آسِنێن دام. بزان بْرِنجئے ٹَٹے#27‏:4 ٹَٹ، بزان توری، چمّگ، چمّگێن برِنجێن یا آسِنێن دام. اَڈّ کن و په اِشیئے چارێن کُنڈان چه بْرِنجا چار کَڑی اَڈّ کن. 5جالیا کُربانجاهئے تۆکی لَمبانی چێرا پِر کن و اَنچۆ اێری کن که کُربانجاهئے بُرزیئے نێما سَر ببیت. 6چه چِگردئے دارا په کُربانجاها گوَرباسک اَڈّ کن و گۆن بْرِنجا سرپۆشِش کن. 7گوَرباسکان چه کَڑیان گوازێن که کُربانجاهئے چست کنگئے وهدا کُربانجاهئے دوێن کَشان ببنت. 8کُربانجاها چه دارئے تَهتَگا اَڈّ کن. تۆکی بِلّ که هۆرک و هالیگ اِنت. هما پئیما اَڈّی کن که من ترا کۆهئے سرا پێش داشت.

شاهِدیئے تَمبوئے پێشگاه

9په شاهِدیئے تَمبوا پێشگاهے اَڈّ کن. په پێشگاهئے جنوبی نێمگا چه هورت‌گواپێن لیلُما پرده اَڈّ کن که سَرجمیا یکّ سَد دَست ببنت. 10گۆن بیست مِنُک و بیست بْرِنجێن بُنهِشتا اَڈِّش کن. مِنُکانی بند و کَڑی نُگرهئے ببنت. 11شمالی نێمگ هم همے پئیما ببیت. پرده سَرجمیا یکّ سَد دَست ببنت، گۆن بیست مِنُک و بیست بْرِنجێن بُنهِشتا. مِنُکانی بند و کَڑی نُگرهئے ببنت. 12پێشگاهئے رۆنِندی نێمگئے پرده سَرجمیا پنجاه دَست ببنت، گۆن دَه مِنُک و دَه بُنهِشتا. 13پێشگاهئے رۆدراتکی نێمگئے پرده، هما نێمگ که رۆچ درَ کئیت، پنجاه دَست ببنت. 14پێشگاهئے دپئے یکّ نێمگێئے پرده سَرجمیا پانزدَه دَست ببنت، گۆن سئے مِنُک و سئے بُنهِشتا، 15و دپئے آ دگه نێمگئے پرده هم پانزدَه دَست ببنت، گۆن سئے مِنُک و سئے بُنهِشتا. 16په پێشگاهئے دپا پردهے اَڈّ کن که سَرجمیا بیست دَست ببیت، گۆن چار مِنُک و چار بُنهِشتا. اے پرده چه آسمانی و جَمو و سُهرێن پَژم و چه هورت‌گواپێن لیلُما اَڈّ ببیت و رنگ‌گواپ ببیت. 17پێشگاهئے چپّ و چاگردئے سجّهێن مِنُکانی بند و کَڑی نُگرهئے ببنت و بُنهِشت بْرِنجئے. 18پێشگاهئے دْراجی یکّ سَد دَست ببیت، پْراهی پنجاه دَست و بُرزی پنچ دَست ببیت. گۆن هورت‌گواپێن لیلُمئے پرده و بْرِنجێن بُنهِشتان اَڈّ کنگ ببیت. 19تَمبوئے آ دگه سامان، په تَمبوئے هر کارێا که کارمرزَ بنت، چه بْرِنجا اَڈّ کنگ ببنت. تَمبوئے و پێشگاهئے سجّهێن مێه هم چه بْرِنجا اَڈّ کنگ ببنت.

چراگانی ٹێل

20تئو اِسراییلیان هُکم دئے که زئیتون بپْرِنچێت و زَگرێن ٹێل در کنێت و په چراگان بیارێت که چراگ هر وهدا رۆک ببنت. 21شاهِدیئے تَمبوئے تها، چه هما پردها ڈَنّ که شاهِدیئے پێتیئے دێما اِنت، هارون و آییئے مَردێن‌چُکّ، بزان دینی پێشوا هُداوندئے بارگاها شپا تان سُهبا چراگان رۆک بدارنت. اے په اِسراییلیانی آیۆکێن نَسل و پَدرێچان اَبدمانێن پَرمانے.

Currently Selected:

دَرگوَز 27: HPKB

Highlight

Copy

Compare