دَرگوَز 16

چه آسمانا وراکئے اێر آیگ

1سجّهێن اِسراییلی مهلوک چه اێلیما رهادگ بوت. چه مِسرا در کپگا رند، دومی ماهئے پانزدَهُمی رۆچا سینئے گیابانا سر بوتنت. سین، اێلیم و سینائے نیاما اِنت. 2گیابانا، اِسراییلئے سجّهێن مهلوک موسّا و هارونئے سرا نُرُنڈگا لگّت. 3اِسراییلیان گوَشت: ”دْرێگتا#16‏:3 دْرێگتا، بزان دْرێگتێن، دْرێچا. پارسی و اردوا ”کاش“. ما مِسرا هُداوندئے دستا بمُرتێنێن. اۆدا وَه ما گۆشتئے دێگانی کِرّا نِشتگ‌اَتێن و دِلئے سێرا نانَ وارت. بله شما مارا اے گیابانا آورت که اے سجّهێن مهلوکا چه شُدا بکُشێت.“ 4هُداوندا گۆن موسّایا گوَشت: ”بچار، من چه آسمانا په شما نگنَ گوارێنان. مهلوک هر رۆچ ڈنّا در بیئیت و وتی هما رۆچئے کِساسا نگن مُچّ بکنت و بزوریت. اے پئیما آیانَ چکّاسان که بارێن منی شَریَتئے راها رئونت یا نه. 5وتی شَشُمی رۆچئے نگنان که کارنت و تئیارَ کننت، باید اِنت چه پێسری هر یکّ رۆچێئے نگنان دو سَری#16‏:5 دو سَری، بزان دو برابر، دو رندا، دو همینچُک. ببنت.“

6موسّا و هارونا گۆن سجّهێن اِسراییلیان گوَشت: ”مرۆچی بێگاها شما زانێت که چه مِسرا شمئے در کنۆک هُداوند اَت و 7باندا سُهبا شما هُداوندئے شان و شئوکتا گندێت. چێا که شما هُداوندئے سرا نُرُنڈِتَگ و آییا اِشکتگ‌اَنت. ما چے اێن که شما مئے سرا بنُرُنڈێت؟“ 8موسّایا گوَشت: ”هُداوند شمارا په ورگا بێگاها گۆشت و سُهبا نگنَ دنت، لاپئے سێرا، چێا که هُداوندا شمئے هما نُرُنڈگ اِشکتگ‌اَنت که شما آییئے سرا کرتگ‌اَنت. ما چے اێن؟ شما مئے سرا نُرُنڈگا نه‌اێت، هُداوندئے سرا نُرُنڈگا اێت.“ 9موسّایا گۆن هارونا گوَشت: ”سجّهێن اِسراییلی مهلوکا بگوَش: ’هُداوندئے بارگاها بیاێت. چێا که شمئے نُرُنڈگی اِشکتگ‌اَنت.‘“

10چۆ بوت که وهدے هارون گۆن سجّهێن اِسراییلی مهلوکا هبرا اَت، آیان گیابانئے نێمگا چارِت و هُداوندئے شان و شئوکتِش دیست که جمبرئے تها زاهر اَت. 11هُداوندا گۆن موسّایا گوَشت: 12”من اِسراییلیانی نُرُنڈگ اِشکتگ‌اَنت. آیان بگوَش: ’بێگاها گۆشت و سُهبا نگنَ ورێت، لاپئے سێرا. گڑا شما زانێت که من هُداوند آن، شمئے هُدا.‘“

13چۆ بوت که بێگاها نِکۆلێن#16‏:13 نِکۆل مُرگے که پارسیا ”بِلدِرچین“ و انگرێزیا ”quail“ گوَشنتی. مُرگ آتکنت و اُردگاهِش سرپۆش کرت و سُهبا نۆدئے لاے#16‏:13 لا، بزان لایَه، تِه، تَل، پۆش، اِنگرێزیا ”layer“. سجّهێن اُردگاهئے چَپّ و چاگردا اێر نِشت. 14وهدے نۆدئے لا گار بوت، زمینا نازُرکێن کُچَلئے#16‏:14 کُچَل، بزان سهدار یا درچک و دارئے هُشک بوتگێن پۆست که ٹُکّر ٹُکّرَ بیت و کپیت. پئیمێن چیزّے دَرا بوت، برپئے پُژّکئے پئیمێن. 15وهدے اِسراییلیان دیست، گۆن یکدگرا گوَشتِش: ”اے چێے؟“ چێا که آیان نزانت اے چێے. موسّایا گوَشت: ”اے هما نگن اِنت که هُداوندا شمارا په ورگا داتگ. 16هُداوندئے داتگێن هُکم اِش اِنت: ’همینچُک که ورێت، همینچُک بزورێت. په وتی گِدانئے هر مردمێا یکّ اُمێرێئے#16‏:16 اُمێر اِبرانیانی کئیل کنگئے کْیاسے. یکّ اُمێرے کَمّ و گێش دو سێر اِنت. کِساسا بزورێت.‘“

17اِسراییلیان نگن زرت، بله لهتێنا گێشتر زرت و لهتێنا کَمتر. 18وهدے اُمێرئے هسابا کئیلِش کرتنت،#16‏:18 کئیل کنگ، کِساس کنگ، چیزّێئے وَزن یا کَدّئے پَکّا کنگ. دیستِش که آ کَسا که گێش زرتگ، وراک په آییا گێشێن نه‌اَنت و آ کَسا که کَمّ زرتگ، په آییا کمّ نه‌اَنت. هرکَسا وتی لاپئے کِساسا زرتگ‌اَت. 19موسّایا گۆن آیان گوَشت: ”کَسّ تان سُهبا چه اے وراکان هچّ اێر مکنت.“ 20بله لهتێنا موسّائے هبر گۆش نداشت. آیان چه اے وراکان چیزّے تان سُهبا وتی کرّا اێر کرت، بله اے وراک کِرم کپت و بۆ کنگا لَگّتنت. گڑا موسّا آیانی سرا زَهر گپت.

21هر سُهب مردمان وتی لاپئے کِساسا زرت، رۆچ که ترُندَ بوت، پَشت کپتگێن کُچَل آپَ بوتنت. 22هر شَشُمی رۆچا آیان دو سَری وراکَ زرت، بزان په هر مردمێا دو اُمێر. مهلوکئے سجّهێن سرۆک موسّائے کرّا آتکنت و موسّااِش هال دات. 23موسّایا گۆن آیان گوَشت: ”هُداوندا چۆ گوَشتگ: ’باندا شَبَّتئے#16‏:23 شَبَّت، اِسراییلیانی هپتگئے هپتُمی رۆچ اِنت. شَبَّتئے مانا اِنت دَم کنگ، آرام کنگ. رۆچ اِنت، هُداوندئے گیشّێنتگێن پاکێن رۆچ اِنت، په آرام کنگا. شمارا هرچے که پَچگی اِنت، مرۆچی بپَچێت و هرچے که لَهڑ دئیگی اِنت، مرۆچی لَهڑ دئیێت. هرچے که سرَ کئیت، په بانداتیگێن رۆچا اێرِش کنێت.‘“

24هما پئیما که موسّایا گوَشتگ‌اَت، مردمان سر آتکگێن وراک په بانداتیگێن رۆچا اێرَ کرتنت. اے وراکان نه بۆَ کرت و نه کِرمَ کپتنت. 25موسّایا گوَشت: ”مرۆچی اِشان بوَرێت چێا که مرۆچیگێن رۆچ په هُداوندا شَبَّتے. مرۆچی اے وراک زمینا اێر آرگَ نبیت. 26شش رۆچا مُچّ کنێت و بزورێت، بله هپتمی رۆچا، بزان شَبَّتئے رۆچا هچّ نێست.“

27هپتمی رۆچا لهتێن مردم در آتک که رئوێن و نگن مُچَّ کنێن، بله هچِّش ندیست. 28هُداوندا گۆن موسّایا گوَشت: ”تان کَدێنا سرا تابَ دئیێت و منی هُکم و سر و سۆجانَ نزورێت؟ 29بچارێت، منِ هُداوندا شمارا شَبَّتئے رۆچ بَکشاتگ. پمێشکا شَشمی رۆچا شمارا دو رۆچئے نگنا دئیان. هپتمی رۆچا شما هر جاگها اێت، همۆدا ببێت. هپتُمی رۆچا کَسّ چه وتی جاگها در مئیئیت.“ 30گڑا مهلوکا هپتمی رۆچا آرام کرت.

31اِسراییلیان اے نگنئے نام ”مَنّ“#16‏:31 اِبرانی زُبانا ”مَنّئے“ مانا اِنت ”اے چێے؟“ بچار بند 15. کرت. اے گِهنیچئے#16‏:31 گِهنیچ سبزَگے که اردوا ”دهَنیه“ و پارسیا ”گِشنیزَ“ گوَشنتی. تُهمئے پئیمێن اَتنت، اِسپێت‌چَک اَتنت و تامِش چۆ بێنَگی نگنا اَت. 32موسّایا گوَشت: ”هُداوندئے هُکم اِش اِنت: ’یَکّ پورهێن اُمێرے مَنّ په وتی آیۆکێن نَسل و پَدرێچان#16‏:32 پَدرێچ، بزان نَسل، چُکّ و اۆبادَگ. اێر کنێت، که آ هما نگنا بگندنت که من گیابانا شمارا وارێنت، هما وهدا که من شمارا چه مِسرا در کرت و آورت.‘“ 33موسّایا گۆن هارونا گوَشت: ”دَرپے بزور و یکّ اُمێرے مَنّی مان کن و هُداوندئے بارگاها اێری کن که په شمئے آیۆکێن نَسل و پَدرێچان اێر ببیت.“ 34هما پئیما که هُداوندا موسّا هُکم داتگ‌اَت، هارونا اے دَرپ شاهِدیئے وانِکانی#16‏:34 وانِک، بزان مزنێن پتنێن سِنگ، وانَگ. شاهِدیئے وانِکانی سرا هُدائے دهێن پرمان نبشته اتنت. دێما اێر کرت که پَهازگ#16‏:34 پَهازگ، بزان سَمبالگ، پَهرێزگ. ببیت. 35اِسراییلیان تان چِلّ سالا منَّ وارت، بزان تان هما وهدا که آبادێن مُلکێا سر بوتنت. تان هما وهدا که کَنهانئے سیمسرا رَستنت، مَنِّشَ وارت. 36یکّ اُمێرے اێپهئے#16‏:36 اێپه اِبرانیانی کئیل کنگئے کْیاسے. یکّ اێپهے کَمّ و گێش بیست سێر اِنت. دَه‌یَکّ اِنت.

Currently Selected:

دَرگوَز 16: HPKB

Highlight

Copy

Compare