دَرگوَز 15

موسّا و اِسراییلیانی نازێنک

1گڑا موسّا و اِسراییلیان په هُداوندا اے نازێنک جت:

”من هُداوندا نازێنان،

چێا که هُداوند

په شان و شئوکت سۆبێن#15‏:1 سۆبێن، بزان پێرۆز، کامیاب. بوت.

آییا اَسپ و اَسپ‌سوار دریایا چَگَل داتنت.

2هُداوند منی زۆر و واک و منی نازێنک اِنت.

هُداوند په من نجاتے بوت.

منی هُدا اِنت،

منَ نازێنانی.

منی پتئے هُدا اِنت و

من آییا سَتا و سَنا کنان.

3هُداوند جنْگ کنۆکے،

نامی یَهوِه#15‏:3 یَهوِه، اِبرانی زُبانا هُداوندئے نام اِنت. اے لَبز چه ”بئیگئے“ لَبزا جۆڑ بوتگ. پاکێن کتابئے گێشتر تَرجُمَهان اے لبز ”هُداوند“ کرتگ. اِنت.

4پِرئونئے اَرّابه و لشکری دریایا چگل داتنت،

پِرئونئے شَرترێن اَپسر سُهرزِرا بُکِّتنت.

5جُهلێن آپان اَندێم کرتنت،

آ چۆ سِنگا جُهلانکیا اێر بُکِّتنت.

6او هُداوند! تئیی راستێن دست اَجَب زۆرمند اَت.

او هُداوند! تئیی راستێن دستا دُژمن شِنگێنت.

7تئو چه وتی مَزَن‌شانیا دژمن سَرشکون کرتنت.

تئو وتی هِژم راه دات و

تئیی هِژمئے آسا دژمن چۆ پَلارا وارتنت.

8چه تئیی پۆنزئے دَما

آپ سر په سر بوت،

تچۆکێن آپ چۆ دیوالا مُهر اۆشتاتنت.

جُهلێن آپ دریائے گُبّا#15‏:8 دریائے گُبّ، بزان دریائے جُهلترێن جاگه. بَدِتنت.

9دُژمنا گوَشت:

’من اِشانی رندا کپان و رسێنانِش،

مالانی آوارا#15‏:9 آوار، بزان جنْگئے تها لُٹّ و پُل کرتگێن مال و مردم. بهرَ کنان و

وتی اَرواها سێراپَ کنان.

زهما کَشّان و

منی دستِش تباهَ کنت.‘

10بله تئو هُپّ کرت و

دریایا آ پۆشِتنت.

آ چۆ سْرُپا#15‏:10 سْرُپ مادِنے که وَزنی سکّ باز اِنت. پارسیا ”سُرب“ و انگرێزیا ”lead“ اِنت. جُهلێن آپان اێر بُکّتنت.

11او هُداوند!

هُدایانی نیاما کئے تئیی پئیما اِنت؟

کئے تئیی پئیما پاکیا مَزَن‌شان اِنت؟

تئیی پُرشانێن کار سَتا کرزنت و

تئو هئیران کنۆکێن کارَ کنئے.

12تئو وتی راستێن دست شهار دات و

زمینا دُژمن اێر برتنت.

13تئو په مِهر

وتی مۆکِتگێن مهلوکئے رهبری کرت و

گۆن وتی زۆر و واکا

دێم په وتی پاکێن بارگاها

آیانی رهشۆنی کرت.

14کئومَ اِشکننت و لَرزنت.

بیمّے پیلِستیائے جَهمنندانی دِلا کپیت.

15اِدومئے سردارَ تُرسنت.

موآبئے زۆراوَرانی جانا دْرَهگے کپیت و

کَنهانئے سجّهێن جَهمنند دلترَکَّ بنت.

16بیمّ و دَهشَتے دلا کپیتِش.

چه تئیی باسکئے زۆرمندیا

آ سِنگ و سیاهَ بنت،

تان هما وهدا که

تئیی مهلوک بگوَزیت، او هُداوند،

تان هما وهدا که

تئیی مۆکِتگێن مهلوک بگوَزیت.

17او هُداوند، تئو وتی مهلوکا مُلکا کارئے و

وتی میراسئے کۆهئے سرا نادێنئے،

هما جاگها که تئو په وتی نِندگا اَڈّ کرتگ،

هما پاکێن جاگه که تئیی دستان تئیار کرتگ، او هُداوند!

18هُداوند اَبد تان اَبد هاکمیَ کنت.“

19وهدے پِرئونئے اَسپ و اَرّابه و اَسپ‌سواران دریایا مان دات، هُداوندا دریائے آپ آیانی سرا پِر گَردێنت، بله اِسراییلی دریائے تها، چه هُشک بوتگێن راها گوَستنت.

مَریمئے نازێنک

20پئیگمبرێن مَریم که هارونئے گُهار اَت، آییا کَنجَریے#15‏:20 کَنجَری تَبلَهئے پئیمێن سازے. زرت و پاد آتک. سجّهێن جنێن کَنجَری جنان و ناچ کنانا پاد آتکنت گۆن. 21مَریما په آیان نازێنک جت:

”هُداوندا بنازێنێت،

چێا که هُداوند

په شان و شئوکت سۆبێن بوت.

آییا اَسپ و اَسپ‌سوار دریایا چَگَل داتنت.“

سۆرێن آپئے وَشّ کنگ

22گڑا موسّایا اِسراییلیانی رهشۆنی کرت. آ چه سُهرزِرئے تئیابا پاد آتک و شورئے گیابانا شُتنت. تان سئے رۆچا گیابانا سپرِش کرت بله هچّ آپِش ندیست. 23وهدے مارَها سر بوتنت، مارَهئے آپِش وارت نکرت که سۆر اَت. پمێشکا آ جاگهئے نام مارَه#15‏:23 مارَه، بزان تَهل، زَهر، چیزّے که چه سۆریا تَهل ببیت. بوت. 24مهلوکا موسّائے سرا نُرُنڈِت و گوَشت: ”چے بوَرێن؟“ 25موسّایا هُداوندئے کرّا پریات کرت و هُداوندا موسّا داری ٹُکّرے پێش داشت. موسّایا دار آپا دئور دات و آپ شیرکن بوت.

اۆدا هُداوندا په مهلوکا هُکم و پَرمانے گیشّێنت و مهلوکی چَکّاست.#15‏:25 چَکّاسگ، بزان آزمائِش کنگ، اِمتهان گِرگ. 26هُداوندا گوَشت: ”اگن تئو په دلگۆش وتی هُداوندێن هُدائے تئوارا گۆش بدارئے و هما کاران بکنئے که آییئے چمّان شَرّ اَنت، اگن آییئے هُکمان دلگۆش بکنئے و آییئے سجّهێن پرمانان بِمَنّئے، هچّ چُشێن نادْراهیے تئیی سرا نئیاران که من مِسریانی سرا آورت، چێا که منِ هُداوند تئیی دْراه کنۆک آن.“

27آ اێلیما آتکنت. اێلیما آپئے دوازده چَمّگ و هپتاد بُن مَچّ هست‌اَت. اۆدا آپئے کرّا اُردِش کرت.

Currently Selected:

دَرگوَز 15: HPKB

Highlight

Copy

Compare