دانیال 5

دیوالئے نبشته

1بادشاه بِلشازَرا بلاهێن داوَتے دات. وتی هزار میر و مهتِری مهمان کرت و اِشانی دێما شرابی وارت. 2وهدے بِلشازَرا شرابئے تام چشت، هُکمی دات که هما تلاه و نُگرهێن دَرپ آرگ ببنت که آییئے پیرُک نِبوکَدنِزَرا چه اورشَلیمئے مزنێن پرستشگاها، چه هُدائے لۆگا آورتگ‌اَتنت تانکه بادشاه، آییئے میر و مهتِر، آییئے جَن و سُریَت#5‏:2 سُریَت، داشتئو، هما جَنێن که بے نِکاها لۆگا دارگَ بیت. اِشانی تها بنۆشنت. 3گڑا هما تلاهێن دَرپِش آورتنت که چه اورشَلیما، چه هُدائے پرستشگاها آوار#5‏:3 آوار، بزان جنگئے تها لُٹّ و پُل کرتگێن مال و مردم. جنگ بوتگ‌اَتنت. بادشاه، آییئے میر و مهتِران، آییئے جَنان و سُریَتان اِشانی تها شراب وارت. 4آیان شراب وارت و تلاه، نُگره، بْرنج، آسن، دار و سِنگێن هُدایانی ستا کرت.

5اَناگها مردمی دستێئے لنکُک زاهر بوتنت و چِراگدانئے دومی نێمگا، شاهی کلاتئے دیوالئے دۆنئے#5‏:5 دۆن، بزان گَچّ، پلستَر. سرا نبشته کنگا لگّتنت. بادشاها نبشته کنۆکێن دستئے پُشت دیست. 6نون بادشاهئے دێم زرد ترِّت و آییا اَنچێن تُرسے دلا کپت که سْرێنئے بند و بۆگی شُل بوتنت و کۆنڈی اَنچۆ لَرزِتنت که گۆن یکدومیا لگّتنت. 7بادشاها کُوکّار کرت و هُکم دات که ساهر، نجومی و اِستارزانتان بیارێت. گۆن بابِلئے دانایان گوَشتی: ”هما کَس که اے نبشتها بوانیت و مانا بکنت، آ جَمورنگێن#5‏:7 جَمو، رنگے که پارسیا بنفش و اردوا بنفشی گوَشنتی. گُد و تلاهێن هارے گْورا دئیگَ بیت و بادشاهیئے سئیمی هُکمران کنگَ بیت#5‏:7 مُلکئے بادشاه نابُنایید اَت که بِلشازَرئے پت اَت. ائولی هُکمران هما اَت. آ که اِدا نبوت، مُلکئے مستر بلشازَر اَت، بزان دومی هُکمران که اے هم بادشاه گوَشگَ بوت. پمێشکا گوَشیت ”سئیمی هُکمران“، بزان چه منی پِتا و چه من رَند مسترێن هُمران..“

8گڑا بادشاهئے سجّهێن داناێن مردم آتکنت، بله کَسّا نبشته وانت و په بادشاها مانا کرت نکرت. 9نون بادشاه بِلشازَر گێشتر پرێشان بوت. آییئے دێم گێشتر زَرد تَرِّت. آییئے میر و مهتر هئیران بوتنت.

10شَهبانُکا#5‏:10 بوتَ کنت که اے شهبانُک، نابُنایید یا که نبوکدنزرئے جَن بوتگ چێا که کوهنێن هالانَ زانت. وهدے بادشاه و آییئے هاسێن مردمانی تئوار اِشکت، دیوانجاها آتک و گۆن بادشاها گوَشتی: ”او بادشاه! مُدام زندگ باتئے. وتا پرێشان مکن و وتی دێما زَرد مترّێن. 11تئیی بادشاهیا مردے هست که آییا پاکێن هُدایانی روه مان اِنت و تئیی پیرُکئے دئورا گِندَگ بوتگ که آییا باتنی رُژنایی، سَرپدی و هکمت و هُدایانی ڈئولێن داناییے گۆن. تئیی بادشاهێن پیرُک، نِبوکَدنِزَرا اے مَرد جادوگر، ساهر، نجومی و اِستارزانتانی مستر کرتگ‌اَت، 12چێا که اے دانیال، که بادشاها آییئے نام بِلْتِشازَر کرتگ، اِشیا اَجبێن روهے، زانت و سرپدیے هست‌اَت. آ واب و چاچانی#5‏:12 چاچ، بزان چیستان، راز و رَمزی هبر. مانا کنگ و گرانێن جێڑهانی گیشّێنگا سکّ بلد اَت. دانیالا لۆٹاێن، هما ترا اِشیئے مانایا گوَشتَ کنت.“

13گڑا دانیال، بادشاهئے دێما آرگ بوت. بادشاها گۆن دانیالا گوَشت: ”تئو هما دانیال ائے که چه یَهودائے دَرانڈێهان اِنت، هما که منی بادشاهێن پیرُکا چه یَهودایا آورتگ‌اَنت؟ 14من انّون سهیگ بوتگان که ترا هُدایانی روهے مان اِنت و ترا باتنی رُژنایی، سَرپدی و اجبێن هکمتے هست. 15منی دێما انّون دانا و ساهِر آرگ بوتگ‌اَنت که اے نبشتها بواننت و په من مانا بکننت، بله آیان مانا کرت نکرت. 16بله من تئیی بارئوا اِشکتگ که تئو مانا کرتَ کنئے و جیڑهانی گیشّ و گیوارا بلد ائے. اگن تئو اے نبشتها وانت و مانا کرت بکنئے، ترا جَمورنگێن گُد و تلاهێن هارے گْوَرا دئیگَ بیت و تئو، بادشاهیئے سئیمی هُکمران کنگَ بئے.“

نبشتهئے مانا

17گڑا دانیالا گۆن بادشاها گوَشت: ”وتی ٹێکی و تُهپهان وتی کِرّا کن و دادان په دگه کَسێا اێر کن. من اے نبشتها چۆنَها وانان و په تئوِ بادشاها مانا کنان. 18او بادشاه! بُرزێن ارشئے هُدایا، نِبوکَدنِزَر بزان تئیی پیرُک، بادشاهی، مزنی، شان و شرَپ داتگ‌اَت. 19هما مزنیئے سئوَبا که هُدایا داتگ‌اَت، سجّهێن کئوم و راج و هر زبانئے مردم چه تُرسا تئیی پیرکئے دێما لَرزِتنت. کَسے که آییا کُشَگَ لۆٹت، کُشتی و کَسے که آییا کُشگَ نلۆٹت، نَکُشتی. کَسے که آییا مزنی دئیگَ لۆٹت، مزنی‌ایَ دات و کَسے که آییا کمشَرَپ کنگَ لۆٹت، کمشَرَپیَ کرت. 20بله وهدے آییئے دل پُرکِبر و اَرواه چه گُروناکیا پُرّ بوت، چه بادشاهی تَهتا اێر گێجگ و شان و شئوکتی پَچ گرَگ بوت. 21آ، چه انسانانی درنیاما گلّێنگ بوت و آییئے دل جانوَری دلے جۆڑ کنگ بوت. جنگلی هرانی نیاما جَهمنند بوت، پس و گۆکانی ڈئولا کاه و بوچّ وارێنَگَ بوت و چه آسمانئے نۆدان آییئے بدَن تَرّ کنگَ بوت، تان هما وهدا که زانتی که بُرزێن ارشئے هُدا انسانی بادشاهیانی سرا هُکمران اِنت و هما مردما اِشانی سرا هُکمرانَ کنت که وتَ لۆٹیت.

22بله او بِلشازَر، نِبوکَدنِزَرئے نماسَگ! اے سجّهێن چیزِّت زانتنت و اَنگت هم گروناکی‌اِت چه وتی دلا در نکرت. 23تئو وتارا آسمانی هُداوندئے دێما بُرز زانت و لێکِت#5‏:23 لێکَگ، بزان هساب آرگ. و هُکمِت کرت که هُدائے لۆگئے دَرپ تئیی دێما آرگ ببنت. تئو و تئیی میر و مهتِران، تئیی جَنان و سُریَتان اے درپانی تها شراب وارت و تئو نُگره، تلاه، بْرنج، آسن، دار و سِنگێن هُدا ستا کرتنت که نه گندنت، نه اشکُننت و نه سرپدَ بنت. بله تئو هما هُدا شان و شئوکت ندات که تئیی ساه و تئیی سجّهێن راه آییئے دستا اَنت. 24پمێشکا اے دست، چه هما هُدائے نێمگا دێم دئیگ بوتگ و اے لبز نبشته کنگ بوتگ‌اَنت.

25نبشته اِش اِنت: ’مِنے، مِنے، تِکِل، پارسین.‘ 26اے لبزانی مانا اِش اَنت: ’مِنے‘ بزان هُدایا تئیی بادشاهیئے رۆچ هساب کرتگ و هلاس کرتگ‌اَنت. 27’تِکِل‘ بزان تئو شاهێما#5‏:27 شاهێم، بزان تۆر، ترازو. وَزن کنگ بوتگئے و اے هبر زانگ بوتگ که تئو سُبَکّ ائے. 28’پِرِس‘#5‏:28 پِرِس و پارسین یکّێن لبز اِنت که بند بیست و پنچا هم آتکگ. ”پِرِس“ یکّ اِنت و ”پارسین“ جَم اِنت. بزان تئیی بادشاهی بهر کنگ و ماد و پارسان دئیگ بوتگ.“ 29گڑا بِلشازَرا هُکم دات و دانیالِش جَمورنگێن گُد و تلاهێن هارے گوَرا دات و دانیال، بادشاهیئے سئیمی هُکمران جۆڑ کنگ بوت. 30هما شپئے شپ بابلیانی بادشاه، بِلشازَر کُشگ بوت. 31گڑا بادشاهی مادێن داریوشا#5‏:31 داریوش: لهتێن زانتکارئے هئیال همش اِنت که اے داریوش، کورُش اِنت. رَسِت. اے وهدا داریوشئے اُمر کِساس شست و دو سال اَت.

Currently Selected:

دانیال 5: HPKB

Highlight

Copy

Compare