دانیال 1

دانیال و سنگتانی گچێن بئیگ

1یَهودائے بادشاه یِهۆیاکیمئے دئورئے سئیمی سالا، بابِلئے بادشاه نِبوکَدنِزَّر آتک و اورشَلیمی اَنگِرّ کرت#1‏:1 اَنگِرّ کنگ، بزان چَپّ و چاگِردا گِرَگ، پارسیا ”محاصره“.. 2چه هُداوندئے رَزایا یَهودائے بادشاه، یِهۆیاکیمی پرۆش دات. بادشاهئے جند و هُدائے لۆگئے لهتێن دَرپی گۆن وت بابلئے سرڈگارا،#1‏:2 اسلیگێن نبشتانکَ گوشیت شنارئے سرڈگارا. شنار، بابلئے دومی نام اِنت. وتی هُدائے لۆگا آورت و دَرپی وتی هُدائے لۆگئے هزانَگا اێر کرتنت.

3پدا بادشاها وتی دربارئے کارمَستِر،#1‏:3 اسلیگێن نبشتانکَ گوَشیت: گوَهتگێنانی کارمَستر. هئیال همش اِنت که بادشاهئے کار کنۆک گْوَهتگ کنگ بوتگ‌اَنت. اَشپِناز هُکم دات که چه اِسراییلی چُکّان لهتێن اَنچێن بیار که چه بادشاهی نَسل و شرپمندێن هاندانان ببنت، 4اَنچێن وَرنا که هچّ پئیمێن بدَنی ائیبِش مان مبیت و رنگا ڈئولدار ببنت، هر ڈئولێن هکمتا بلَد بئیگئے لاهک، زانتکار و زوت‌پَهم ببنت و بادشاهئے بارگاها اۆشتگا بِکَرزنت. پدا اے وَرنایان بابِلئے اَرَمایی زبان و لبزانکا#1‏:4 لبزانک، بزان ادبیات. بوانێن. 5بادشاها اِشانی هر رۆچیگێن وراک و شراب#1‏:5 پاکێن کتابئے تها هر جاگه که شرابئے لبز آتکگ، اِشیئے مانا چه انگورا جۆڑ بوتگێن شراب اِنت که اِنگرێزیا ”wine“ گوشگَ بیت. چه وتی جندئے وراک و شرابا گچێن کرت و هُکمی دات که تان سئے سالا اِشان شَرّ بوانێنێت و زانتکار کنێت و پدا منی هِزمتا بۆشتارێنێت. 6اِشانی نیاما چه یَهودایا آورتگێن دانیال، هَنانیا، میشاێل و اَزَریا هئوار اَتنت. 7دربارئے کارمَستِرا آیانا نۆکێن نام پِر کرت. دانیالئے نامی بِلتِشازَر، هَنانیائے شَدرَک، میشاێلئے میشَک و اَزَریائے اَبِدنِگۆ کرت.

8دانیالا اِراده کرت که من وتا گۆن شاهی وراک و شرابان پلیتَ نکنان. گڑا آییا گۆن دربارئے کارمسترا دزبندی کرت که اگن تئو رَزا دئیئے، من اے وراکانَ نئوَران و وتا پلیتَ نکنان. 9نون هُدایا کارمسترئے دلا په دانیالا مِهر و همدردی پێدا کرت، 10بله کارمَستِرا اَنگت گۆن دانیالا گوَشت: ”منا چه وتی واجهێن بادشاها تُرسیت. آییا وت په شما وراک و شراب گچێن کرتگ. اگن آ بگندیت که شما چه وتی اے دگه همسرۆکێن وَرنایان نِزۆرتر اێت، گُڑا؟ اے پئیما، شما بادشاهئے دستا منی سرا بُرّاێنێت.“ 11کارمَستِر اشپنازا په دانیال، هَنانیا، میشاێل و اَزَریایا یکّ اپسَرے داشتگ‌اَت. دانیالا گۆن همے اپسرا گوَشت: 12”مهربانی بکن و مارا#1‏:12 اسلیگێن اِبرانی سیاهگَ گوَشیت: وتی نئوکَران. بند سێزدها هم اَنچُش اِنت. تان ده رۆچا بچکّاس#1‏:12 چَکّاسگ، بزان آزمائِش کنگ، اِمتهان گِرگ. و بچار، بِلّ که مارا په ورگا تهنا سبزی و په نۆشگا تهنا آپ دئیگ ببیت. 13پدا مارا گۆن هما وَرنایان دێم په دێم بکن و بچار که شاهی وراکان ورگا اَنت. اگن ما نزۆرتر بوتێن، رَندا گۆن ما هما پئیما بکن که تئیی دلَ گوَشیت.“ 14گڑا اپسرا آیانی هبر مَنّت و تان ده رۆچا آ چکّاستنت.

15دهێن رۆچانی هلاسیا، دیستِش که آ، چه اے دگه وَرنایان جاندْراهتر و پزّۆرتر اَنت که شاهی وراکِش وارتگ‌اَت. 16گڑا اپسرا شاهی وراک و شراب، چه آیانی وراکا در کرتنت و آیانا سبزیَ دات. 17اے چارێن وَرنا، هُدایا لبزانک و هکمتئے هر پئیمێن زانت و هُنر دئیان کرتنت. دانیال هر وڑێن الهام و شُبێن و وابانی مانایا هم بلَد اَت.

18گڑا بادشاه نِبوکَدنِزَّرئے گیشّێنتگێن سئیێن سال که سَرجم بوتنت، دربارئے کارمسترا اے سجّهێن وَرنا آورت و بادشاهئے بارگاها پێش کرتنت. 19وهدے بادشاها گۆن آیان گپّ و تْران کرت، دیستی که دگه کَس دانیال، هَنانیا، میشاێل و اَزَریائے پئیما نه‌اِنت. گڑا اے چارێن بادشاهئے جندئے هِزمتا دارگ بوتنت. 20بادشاها هرچے که جُست کرتنت، دیستی که اے مردم هر پئیمێن هِکمت و سرپدیا چه مُلکئے سجّهێن جادوگر و ساهِران ده سَری#1‏:20 ده سَری، بزان ده برابر، ده رندا، ده همینکچُک. شَرتر اَنت. 21دانیال، تان کورُش بادشاهئے دئورئے ائولی سالا همۆدا منت.

Currently Selected:

دانیال 1: HPKB

Highlight

Copy

Compare