Kulolesibua 14
14
Muana wa Mukoko Emana ga Muiduko wa Siona.
1Nu namonine ku Muana wa Mukoko emana ku muiduko wa Siona, nu bantu babezaga tununu lukama makumi manazi nu tunazi babezaga nage, babezaga neizina liage, nu izina lia Isi, masanzua ga malanga mabo. 2Nu nungule kuiyuki liatukile muigulu, anga kubila kua kiliza kia mazi meingi, nu anga kukulumina kua mukulumino munene; nu nongule kuiyuki liabezaga anga batuti ba zenze bekuimba na zenze zabo: 3nu beimbaga lungo luimbo luto lisa na kisumbi kia bukota, nu lisa na bibumbua binazi bili na kalamo nu bakulu: nu takuabezaga muntu wizi kuiyigisia luimbo luluno umpanga babo tununu lukama makumi manazi nu tunazi, nubo bakunzilue ga kisi. 4Babano bantu ubatamenyine bakikulu; kubuno beli anga bikumi bitemenyua na bamulume. Babano beli bantu bekuyangaga Muana wa Mukoko kunsania kua kuendaga. Bakunzilue ku bantu, buno babe biguma bitangi ku Kalaga nu ku Muana wa Mukoko. 5Nu tabekile buza: kubuno tabeli na matondoki.
Moki Manazi Matukaga Muigulu.
6Nu namonine ku ungo mugenzi walengile muigulu, wabezaga na musagu musoga utanakuzinda kusambala ku beikile ga kisi, nu ku babikanga bansania nu ku babilongo bansania nu ku ba mitendezi insania nu ku bantu bansania; 7nu atendile neiyuki inene bune, Kuazi Kalaga boba, nu muganunazi; kubuno nkungu za lusungio luage zakuka: nu kumbaminazi we wabumbile igulu nu kisi nu bitatenge nu tunua balongo.
8Nu ungo mugenzi weibili, wayangile, nu watendile bune, Wagoa, wagoa Babulona, muino munene, wanusizie babilongo bansania maku ma bongoa bua butazi buago.
9Nu ungo mugenzi weisatu, wabayangile, watendile neiyuki inene bune, Ndi muntu ekukumbamina nyama nu kisusania kiazo, nu kubikua kakengelezio ga malanga mage, aba ku kuboko kuage, 10we nuwe, akanua maku ma bongoa bua Kalaga, masembilue nu tamatopuidue na kansembia mu kituma kia bongoa buage; nu akababazibua mu keiya nu kibiliti buno migenzi basuagibua nu Muana wa Mukoko babamoneko: 11nu muki wa keiya wa kubabazibua kuabo ukuitumuka aba ku nkiko na nkiko zitanakuzinda; tabakumunua musi nu kindi, babo bakumbamine nyama nu kisusania kiazo, nu unsania ukabikua kakengelezio keizina liage. 12Bubuno buli komanizia ka basuagibua, babo bekuanzaga makakizio ma Kalaga, nu bukatizio bua Yesu.
13Nu nongule kuiyuki liatukile muigulu liatendile bune, Sanza, Mbogimbogi ku bakuzi bekukua mu Mukota kutukila kano kaluma: ubukutenda Muuza Wasililila buno, bomunue ku milimo zabo; nu misako zabo zibayanga.
Kongua kua Kalaga.
14Nu namonine ku kimpa kienga; nu gantata gakio gabezaga muntu wasusania muana wa muntu, abezaga na nkumbu za bukota za olo kuitoe liage, nu bupanga bukali bua kukola buabezaga ku kuboko kuage. 15Nu ungo mugenzi watukile mu numba za kukumbamina walalukile neiyuki inene ku wozo wabezaga gantata ga kimpa bune, Isa bupanga buobe bua kukola buno ukole; kubuno nkungu za kukola zakuka; kubuno matubulo ma kisi mela. 16Nu wozo wabezaga gantata ga kimpa eisile bupanga buage ga kisi; nu kisi kiakolilue.
17Nu ungo mugenzi watukile ku numba za kukumbamina zili muigulu, nuwe wabezaga na bupanga bukali bua kukola. 18Nu ungo mugenzi watukile ku kayulo, u wozo uli na buangato bua keiya; nu walalukile neiyuki inene ku wozo wabezaga na bupanga bukali bua kukola bune, Isa bupanga bobe bukali bun kukola, nu ukole bisosolo bia biguma bia kisi kubuno biguma biakio biela nunse. 19Nu wozo mugenzi eisile bupanga buage bua kukola ga kisi, nu akolile biguma ku muzigi wa ga kisi, nu abibikile mu kilunga kinene kia bongua bua Kalaga. 20Nu bakambutuide biguma mu kilunga kuisula lia muino, nu mikila zatukile mu kilunga, zatutile kuba ningi aba nu ku mizigi za kusondelezia mpunda, ku bulazi buazo buli ku kilometele nkama isatu nu makumi mabili.
Currently Selected:
Kulolesibua 14: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
