Baebelo 12
12
Bakite na Bukatizio Buabo.
1Umpanga nuisue bansania ku kuba tuatimbua na musanganano munene wa balongeki, tuikie muzigo na muzigo, nu buagi buatukanda nunse, nu tuitume lubilo na nkiki ku kantangoa katuli nako, 2tukengelazi Yesu, Mukota nu Musililizia wa bukatizio bueitu; ku kabamba ka mbogimbogi zabikidue, ababedue ku muti wa magu, nu ntakule nsoni kugo, nu ekuikalaga ku kuboko kua seidume kua Kalaga ku kisumbi kia bukota. 3Kubuno kengelazi wozo wikalide ku misako za bagi, tamukutue, nu tamutambe nunse. 4Tamuitoa nu tamubasibua mikila, mu kuluana na buagi; 5tondo muse muibilila mano mamuaninue anga bukuanagua bana,
Muana wane, ntubenge lusungu lua Mukota,
Aba ntutambe kungua ekukuzugila;
6Kubuno Mukota ekusungulaga wozo watunda,
Nu ekususulaga babo bekumenya buno beli bana bage. #Misumo 3:11, 12.
7Ndi mualinda mu lusungu lua Kalaga nti esamukitila anga bana bage; kubuno nazi muana utakusungulagua neisi? 8Tondo ndi tamukusungulua, anga bukusungulagua bana bansania, nti muli bana ba butazi, tondo nti tamuli bana bage. 9Nu muizi, tuabezaga na batateisue batubuta nu batusungulaga, nu tuabanzaga: umpanga ndi tatunanza nunse wono Tateisue nu nti tualame? 10Kubuno buligo nunse babano batusunguide bindi bimozi anga bubakengede buno buli busoga; tondo we ku mutali weitu, buno tusililile anga buasililila. 11Na lusungu na lusungu kungua lukusungulua nti talukubogiabogia; tondo kungua luasila kusungulua nti babo basungulagua bese bakita misako zeisanana. 12Ku bubuno lindiazi maboko meinyu makoloboka, nu mazu matamba;#Yesaya 35:3. 13nu isiazi nzila zimukuita muzo, buno wozo uli kitunga anavua kuiba nzila, tondo kionibue.
14Bobelelazi ku bantu bansania, nu ndi tamuasuagibua nti tamukamona ku Mukota: 15kesiazi ntende nunse, buno muntu na muntu ntakuida mponga za Kalaga; buno munavua kuba na kangonongono kakumuagia, nuko kanagia bantu beingi; 16takube kitazi, aba utakuanza Kalaga, anga Esau, buakunzizie bupieni bua bukulu buage kuidia ikeke. 17Kubuno muizi buno gatundagua kukitua mponga, asombilue, kubuno tabunakulungene lingo ganeiyanizie, nu alilile nunse buno azikitue.
Mukanda Mukulu Ukutuitia Boba, Tondo Mukanda Muto Ukutubogiabogia.
18Kubuno tamuakundile ku muiduko unitubibua kugo, waguluminaga keiya, nu wa lutundutundu luina, nu wa kapilo, nu wa kisoa, 19nu kuidaga monze, nu iyuki lia malagi; nu babo bonguaga ku bubo basegile buno tabanongua ku lingo idagi, 20Kubuno tabalindile muidagi idagi lilio libalagilue, Aba nyama ndi zitubia ku muiduko wono nti zalibulua makozi.#Ekesode 19:13. 21Nu bubo bueitizie boba nunse, aba Mose atendile bune, Nkukua boba, nu nkugilimina. 22Tondo inyue muakunda ku muiduko wa Siona, nu ku muino wa Kalaga uli Mulami, u Yelusalema wa muigulu, nu ku bibombo bia migenzi tununu na tununu, 23nu ku musanganano munene u ekelezia lia babo balingile kubutua basanzilue muigulu, nu ku Kalaga Ngatu za bantu bansania, nu ku miuza za bantu beisanana basililizizibue, 24nu ku Yesu mukulumania weidagano ito, nu ku mikila za kusandilua zili misoga kutinga zezo za Abele. 25Umpanga tamusombe wozo ukutenda. Kubuno ndi babo tabonine gabasombile wozo wabanaga ga kisi, embe isue nuisue tatukona ndi tuasomba wozo ukutuanaga uli muigulu: 26kubuno iyuki liage liatengezie kisi: tondo kano kaluma alagile buno, Nkatengia kisi lingo tondo ta kisi tugu kankanka, tondo nuigulu. 27Idagi lilio, limbizi limozi lingo, likulolesia kuigibua kua bibio binavuama kutengibuatengibua, buno binsania bitanavuama kutengibua, bikale.#Haga 2:6. 28Tusime, kubuno tuakasua bukota butanavuama kutengibua, nu kububuno tukumbamine Kalaga neikumbamino liamutananizia na luanzo nu na boba; 29kubuno Kalaga weitu eli keiya kakuguluminaga.
Currently Selected:
Baebelo 12: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
