Liɛnɛsu 5
5
Ndai atoliola Lokasa, ndai atosɔmbɔlɔ bisɔlɔnɛlɔ?
1Limɔ yɛnɛkɛ nda lingasa lia bosamba w’olome wa Inde oyayali se nda kɛka efi, lokasa elosɔnɔmu nd’atiteni la nda bɔkɔngɔ wa loao la elosɔlɔnɔmu la bisɔlɔnɛlɔ bosambale; 2limɔ imi lɔɛnɛ bokitomo wa bofoka oyaamamaka la limiki lifi mbo— ¿Ndai aondu nde ndoliola lokasa la ndosɔmbɔlɔ bisɔlɔnɛlɔ ya loao? 3La angwɛnɛ boto angɔmɔi la nda use la nda nyɛlɛ la ose ya nyɛlɛ, oyasokɔkɔlɔ ndoliola lokasa, ango ko ndoticha nda loao; 4limɔ imi lolelaka finɛ, eoka angwɛnɛ boto angɔmɔi ɛnɛli mbo aondu nde ndoliola lokasa, ango ndoticha nda loao. 5La ɔmɔi wa biange loonga lami mbo— Olelëke, tɛnɛ ngo Simba ya tukela ya Yuda, la Wili wa Dawidi asolonga ndoliola lokasa la bisɔlɔnɛlɔ ya loao.
6La atiteni ya kɛka efi l’eba liwawi banɛi la nd’atiteni ya biange, imi lɔɛnɛ Wana wa bɔkɔkɔ oyemali omao kwa mbo aolomu nde, la ayali la baseke bosambale la baiso bosambale ebale Balimo bosambale ba Mungu ebasotomomo ko nda biese bitotina; 7la Inde lɔkɛ, Inde loaela lokasa nda bosamba w’olome wa Inde oyayali se nda kɛka efi. 8La ɔsɔkɔ Inde lokasa, eba liwawi banɛi, la biange litinda la anɛi lotulama so oso wa Wana wa bɔkɔkɔ, boto la boto lounda likwengu la biengo ya mbela ebitumi la liɛsɛ lia mwɛmwɛ, yengani basomboli ba ebatanu. 9La biange lochwa bɔɛlɛ boyai boko mbo—
Aɛ oondu nde ndoaela lokasa la ndoliola bisɔlɔnɛlɔ ya loao,
eoka waolomoko la waendolelaka Mungu bato ko la bakila baɛ,
bako bato ba tukela bitotina l’eba baoi batotina ba bato la yese bitotina;
10la ososɛl’iyo bɛkɔta la bakanga ende Mungu wasu la bekakalekesa nda biese bitoti.
11Limɔ imi loticha la imi loka limiki lia bakitomo wike ebasolingekela kɛka efi, amamwito l’eba liwawi la biange la loketi loau loyala litunda lia likama la bilɛfu ya bilɛfu; 12iyo loonga la limiki lifi, iyo mbo— Wana wa bɔkɔkɔ oyaolomoko aondu nde ndofomo bofoka, la lifoka, la wɛli, la isosha, la tala, la lifotesi! 13Limɔ imi loka bitoti ebikelomu, biko ebile nda use, la ono se, l’ebile ose ya nyɛlɛ, la nda balia la bitoti ebile ina, yao loonga mbo— Lifotesi la lilitesi, la tala, la bofoka, bifomoko end’Inde oyayali se nda kɛka efi la ende Wana wa Bɔkɔkɔ ko layalaya! 14La eba liwawi banɛi loonga mbo— Ongoma! Limɔ biange loswaka balui se nda lisemokoli.
Currently Selected:
Liɛnɛsu 5: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
