Liɛnɛsu 14
14
Ebaendolomu lochwaka bɔɛlɛ boyai oso wa kɛka ya Mungu
1Limɔ imi loticha la tɛnɛ ngo Wana wa bɔkɔkɔ emali nda löngo loko Siona, la amamwito lande bato bilɛfu mia la bilɛfu kama inɛi la bilɛfu inɛi ebasotomo lina liande la lina lia Sango wande nda toangala twau. 2Limɔ imi loka limiki litosekwa nda Use, kwa elundi ya tolimo twa balia, kwa elundi ya likama, la kwa tongololi twa liomi lia bakwengu. 3Limɔ iyo lochwa bɔɛlɛ boyai oso wa kɛka efi la oso wa eba liwawi banɛi la oso wa biange. Boto angɔmɔi kokɔkɔlɔ ndoeka bɔɛlɛ ona, sakolo ngo ko eba bilɛfu mia la bilɛfu kama inɛi la bilɛfu inɛi, bako ebaendolomoko nda wenda-bo. 4Bende ebatiakwanaka la batomali bokili eoka baitosɔngɔ; bende ebatotutaka Wana wa bɔkɔkɔ l’olo l’olo akakɛndɛk’Inde. Bende ebasoendolomo ende balomboki, bayaleke kwa buka wa eula ewukamesomoko ende Mungu la ende Wana wa bɔkɔkɔ, 5la lilimbakeli litiokomoko nda bɛnɔkɔ yau la bati ango la litwanelo.
Bakitomo lotomomo tomo nda wenda bototina la wɛndi ende bato
6Limɔ imi lɔɛnɛ bokitomo wasi oyatoungwaka atiteni ya use la se, la afomoko Mboli Ilau ya loiko mbo anangoeleke bato abasoyala nda wenda la tukela bitoti la befindi bitoti, la ende bato ba baoi batoti; 7inde loonga la limiki lifi mbo— Wangaka Mungu la faefak’Inde tala, eoka saa ya liatakeli liande esoya; la semokolak’Inde oyakelaka use la se, la eliya efi ya balia la tosolo lisanga.
8Limɔ bokitomo wasi, ewa ambale, lotutel’inde, inde loonga mbo— Bosoukwa! Bosoukwa, boko Babilona, bokenge bofi ebosomwesa bato ba tukela bitoti bänä ba bolenge wa bolëfë wande!
9Limɔ bokitomo wasi, ewa asatɔ, lotutel’inde, inde loonga la limiki lifi mbo— Boto esemola nyama-ye la bɔfɔnɔ wande, la ewachomo chapa nda iangala ango nda bosamba wande, 10inde nd’atomwaka imɔ ko bänä ba bolengi wa Mungu ebasowɛlɔmɔ ko bao, angwɛnɛ ango balia, nda kɔpɔ ya efango yande. Limɔ eokesomoko wale finɛ ko la bosä la boele, oso wa bakitomo batanu la oso wa Wana wa bɔkɔkɔ. 11Limɔ bolilya wa likongolomu liau botolilaka olo nda use ko layalaya la baitwɛuma la löwa la bocho, bako ebasosemokola nyama ena la bɔfɔɔnɔ wande, l’ebasɔɔlɔ chapa ya lina liande. 12Nda loasɔ-lo ɛnɛkɛ to likɔkɔmɛlɛ lia ebatolitesa ndola ya Mungu la liimeli lia Yesu!
13Limɔ imi loka limiki nda use elitoonga mbo— Sɔnɔkɔ mbo ebakaweke ani basoyala la Ngɛnɛ wasu, bende ngo ko la limɛngɔ. Bolimo asoonga imɔ ko mbo— Eingo ko, mbo batɛkumeke kɔni nda bonui wa bakuwa bau, eoka bekeeli yau bitotutakana lau.
Wana wa Boto lotwaka eula ya wenda-bo
14Limɔ imi loticha la tɛnɛ ngo lifita lifufu, la oyayali se nda lifita loyala kwa bɔfɔnɔ wa Wana wa Boto; nda botö wande inde lowata boyoyo wa mbela la nda bosamba wande inde lounda chaka ya lowelo. 15Limɔ bokitomo wasi lokuswa nda Einelo ya Mungu la inde loamamel’Inde oyayali se nda lifita ko la limiki lifi, mbo— Ilyaka chaka yaɛ, twaka eula, eoka mbile yotwa esoya la eula ya wenda-bo esotela. 16Limɔ Inde oyayali se nda lifita, loilyaka chaka yande nda wenda la eula ya wenda lotwomo fɛɛ.
17Limɔ bokitomo wasi lokuswa nda Einelo ya Mungu nda Use, la inde imɔ lounda chaka ya lowelo. 18La bokitomo wasi lokuswa nda etumbelo ya lifaefi, inde loyala la isosha nda bösä la inde loamamel’Inde oyaundi chaka ya lowelo, la limiki lifi, mbo— Ilyaka chaka yaɛ ya lowelo la twaka bekima ya tuma twa elanga ya wenda, eoka tuma twa wao tosotelatela. 19Limɔ bokitomo loilyaka chaka yande nda wenda la inde lotwaka tuma twa elanga ya wenda la inde lokushaka twao nda liyöndo lifi liotwangela tuma twa efango ya Mungu; 20limɔ etwangelo ya tuma lomatekelomoko ko omolo nda liko lia bokenge, la bakila lokuswaka nda etwangelo, bao loelwa helo ko nda kingo ya punda, ndolindesa nyɛlɛ esika kwa tokweelo ɛlɛfu ɛmɔi la mia liambɛ.
Currently Selected:
Liɛnɛsu 14: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
