Liɛnɛsu 13
13
Nyama imbale bisotɛmwa ndokongola bato ba wenda bototina
1Limɔ yɛnɛkɛ nyama eyaeswaka nda balia bafi, eyali la baseke liu la betö bosambale la nda baseke awati beyoyo liu ya bɛkɔta la nda betö baina ba lifekwani bayali. 2La nyama eyɛnɛkɛ’mi yaaka kwa ngɔi la batindi bande bayali kwa batindi ba nyama efi la bɔnɔkɔ wande boyali kwa bɔnɔkɔ wa simba. La Likilɔ lof’inde bofoka wande la kɛka efi yande la isosha sifi. 3La ɔmɔi wa betö osambale lɔɛnɛlɛ kwa mbo waswomoko lifwa lia liwa nde liswa liwau losäsesomo sasosaso limɔ wenda bototi lotuta mbisa ya nyama la limwaali, 4la iyo losemokola Likilɔ eoka afaka nyama isosha shande limɔ iyo losemokola nyama, iyo mbo— ¿Ndai engani la nyama-ye, la ndai atokɔkɔlɔ ndonana lande?
5La nyama lofomo bɔnɔkɔ woonga baoi b’ifaala la lifekwani la inde lofomo imɔ isosha shokela njasɔ yande ko tengai kama inɛi la imbale; 6limɔ nyama loasola bɔnɔkɔ wande ko ndofekwana la Mungu la lina liande, la Ndakɔ ya Mungu la ebasoyala olo nda Use. 7Inde lofomo imɔ ko isosha shonana bita la ebatanu la ndolongel’iyo la isosha shokakalesa bekulü bitoti ya bato, la baoi batoti la tukela bitoti nda wenda. 8Batotina ebayali nda wenda-bo batosemol’inde, bako boto la boto oyatitomo lina ko nda baakowelo nda lokasa loa loiko loa Wana wa bɔkɔkɔ Oyaolomoko.
9Boto eyala la litoi, okeke to! 10Boto eondu nde ndoindomo, ambo atoindomo to; boto eola boto wasi, ambo aondu nde ndoolomo la ambɔtɛ. Nda loasɔ-lo likɔkɔmɛlɛ la liimeli lia ebatanu bitɔɛnɛlɛ.
11Limɔ yɛnɛkɛ nyama yasi eyaeswaka nda nyɛlɛ, inde loyala la baseke bambale kwa eba efembeli ya bɔkɔkɔ, nde limiki liande loyala kwa elia Likilɔ. 12Inde lofomo isosha sha nyama ya oso la inde lokakalesa bato oso wa nyama ena, mbo wenda bototi la bato ebayali ina basemokoleke nyama ena ya oso oyaaka la liswa liwau eliasäsesomoko sasosaso. 13Inde atokelaka bisisho ya likama biko ndoeshaka ango bosä ono se ko nda use fololo nda baiso ba bato; 14la atolimbaka ebayali nda wenda-bo ko la bisisho ebitokel’inde ko la isosha esifomu inde nda baiso ba nyama ya oso, la atoongaka la bato ebayali nda wenda-bo mbo bakeleke bɔfɔnɔ wa nyama ena oyaswomoko lifwa la ambɔtɛ la oyakoyali la liwawi. 15La isosha shafomoko ende nyama shofaefa bɔfɔnɔ ona wa nyama ko luli, mbo bɔfɔnɔ imɔ aongeke la mbo ebatisemokole bɔfɔnɔ wa nyama baolomoko. 16Atowachaka batoti, ko ebafi l’ebakɛkɛ, la bafoka l’ebatouwe, la toote la bɛkɔwa, ko chapa nda bosamba wa olome la nda liangala lia boto la boto, 17la mbo angwɛnɛ boto wɔkɔkɔlɔ ndosomba yeka, kwa ndoungesa yeka, sakolo ngo ko asoyala la chapa eko lina lia nyama ena ango ko loketi loa lina liande. 18Elo lole loasɔ loa wɛlï; inde oyayali la liluwani atangeke to loketi loa nyama, eoka lole ngo loketi loa bolomboki, la loketi loande lole mia liambɛ la kama liambɛ la liambɛ.
Currently Selected:
Liɛnɛsu 13: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
