Emibiri 2
2
Eriandagala ryeKirimu Kibuyirire
1Nekiro kye Pentekote kyabere kyabihika, abosi mobabya hagumaguma. 2Neryo-neryo omulenge mwalwa elubula ngeribuhirira rye rihunga inene, moryusulya enyumba yosi aho babya bikere. 3Neryo mohabutuka kubo ebirimi ibigabene ngebyomuliro; mobikala oko buri mundu. 4Nabosi mobu sulibwa neKirimu Kibuyirire, mobatsuka eribuga omo yindi mibuge, ngoko Kirimu kyahabo eribuga.
5Nikwa habya baYuda abikere eYerusalema, bandu bagenge, erilwa omo bihanda byosi eyikwa oko butuku. 6Nomugulu omulenge oyo ogubawa, endeko moyahindanaho, mobasweka kusangwa oburi mundu owabo bakabuga omo mubuge wuwe. 7Nabosi mobasweka mobumirwa, bati, Lebaya, abakabuga abo sibaGalilaya kwehi? 8Netu tukowa tuti kwehi, oburi mundu omo mubuge wuwe abutawa mo. 9BanyaParti na banyaMedi na banyaElamu nabatula eMesopotamia, Yudea, na Kapadokia, Ponto na eAsia, 10Furigia, na Pamfilia, Misiri nebihande bye Libia kihererenye neKurene, na bageni beRoma, abaYuda na bakwamirebo, 11banyaKrete na Barabu, tukowabo bakabuga omo mibuge yetu emibiri yamaka yoMungu. 12Nabosi moba sweka, mobabula kyeribuga mobabulania, bati, Eki kikahulaki kwehi? 13Nikwa abandi mobanegula, bati, Babirikunda nebinyu bihyabihya.
Eritulago ryaPetero
14Nikwa Petero mwahangana haguma nerikumi na muguma, mwasumba omulenge wuwe, mwabuga nabo, ati, Inywe bandu beYudea, nenyu bosi abikere eYerusalema, eKinywa eki mu minyekyo, mowe ebinywa byage. 15Aba sibakundire ngoko mukaganiraya: kusangwa ni ndambi isatu syeritungi; 16nikwa eki kyabugawa nomuminyereri Yoeli, ati,
17Mungu ati, kikandisyabya oko biro byenyuma.
Nasyutulira eKirimu kyage oko mibiri yosi:
Nabagala benyu nabali benyu basyaminyerera,
Nabalwana benyu basyalola oko nzoli,
Nabasyakulu benyu basyalota:
18Kandi oko biro ebyo oko bagombe bage abalume na bakali
Nasyutulira eKirimu kyage; basyaminyerera,
19Nasyakangania ebyeriswekera omo lubula endata
Nebitikotiko mona kihugo eyikwa;
Omusasi, nomuliro, neritumba ryomuki:
20Eryuba ryasyabindulwa mo mwirimya,
Nomukera mo musasi,
Embere werihika ryekiro kyoMukama,
Ekiro ekyo kikulu ekyeriminyikala.
21Neryo kyasyabya omundundi oyo wasyabirikira erina ryoMukama asyalamibwa.
22Inywe balume baIsraeli, muhulikirire ebinywa ebi: Yesu we Nazareti, omundu usimirwe noMungu busana nenyu oko mibiri yamaka, nebyeriswekera nebitikotiko ebyo Mungu akola busana naye omukati-kati kenyu, ngoko nenyu munasi; 23iye abere abihoterwa ngoko Mungu ahana neriminya ebitebyabya, inywe momwamwita oko muti nerimuholya omo byala bya bandu babi; 24oyo Mungu alubukaya, iniamabibohola eri agalwa ryoluholo: kusangwa moritatokekana akabohwa muryo. 25Kusangwa Dawidi mwabuga busana naye, ati,
Monalola oko Mukama ebiro byosi embere syage:
Kusangwa ari oko byala byamali byage, isinangatundwa:
26Neryo mutima wage mwatsema, no lulimi lwage molwatsanga;
Kandi mubiri wage asikala omo maha:
27Kusangwa siwendisya siga ekirimu kyage omo Kurimu,
Kutse siwendisyaha oMubuyirire wawe erilola okwihonda,
28Mowanyiminyisya esyonzira syengebe;
Wasyanyusulya nobutseme embere syobusu bwawe.
29Balikyetu, ngabuga nenyu neriminyikalya busana na Tata mukulu ye Dawidi, kwa hola kwa tabawa, neyisinda yiwe ine ewetu na lino. 30Kwa bya muminyereri, mwaminya ko Mungu amulahiriraya nerilahirya, asyahira muguma woko lubuto luwe oko kitumbi kiwe kyobwami; 31anye erilangira bitebyabya ahula erilubuka rya Kristo, nakandi mwatamuleka ekurimu, nomubiri wuwe mwatalola okwihonda. 32Yesu oyu Mungu mwamulubukya, netu turi balangiri beritulago. 33Neryo mwa hetukibwa nebyala bya mali byoMungu, nerihabwa nIse erilaga rye Kirimu Kibuyirire, mutula eki mukalangira mukowa. 34Kusangwa Dawidi mwatahetukira elubula: nikwa iye mwabuga ati,
OMukama mwabwira oMukama wage, ati,
Wikale oko byala byage byamali
35Erihika aho nasyayirira esyonzigu syawe mokitumbi kya bisandu byawe.
36Neryo enyumba yosi ya Israeli iminye ndeke, ko Mungu abirimuyira mo Mukama na Kristo oyo mwitira oko muti.
Erikirirya ryaBandu maelfu asatu
37Omugulu bowa ekyo, mobahisibwa omo mitima yabo, mobabulya Petero na bandi bakwenda, bati, Balikyetu, tuyire tuti kwehi? 38Petero mwasubiryabo, ati, Mubinduke, oburi mundu abatisibawe omu rina ryaYesu Kristo mubane erilu sibwa kwe bibi byenyu; kandi mwasyimya erihitya ryeKirimu Kibuyirire. 39Kusangwa erilaga riri busana nenyu nabana benyu noko bosi bari hali, abo Mukama Mungu wetu asyabiri kira kwiye. 40Mwatula neyindi myatsi mingi, nerihanabo, ati, Muyilamaye oko lulengo luhengemire olu. 41Neryo abangirira kinywa kiwe mobabatisibwa: noko kiro ekyo mohatomekerwa kubo nga bandu elfu isatu. 42Neryo mobakwamirira ndeke erikangirirya ryabakwenda nerianzana, neritsutsanga obundu nerisaba.
43Neriubaha moryahika oko buri mundu: nebyeriswekera nebitikotiko bingi mobyakolwa na bakwenda. 44Nabosi bikiriraya mobabya haguma, mobasangira ebyosi; 45moba gulya obusoki bwabo nebindu byabo, mobagababyo oko bosi, ngoko mundu ekyari nobwaga. 46Nekirokiro mobakwamirira nomutima muguma omo hekalu, neritsutsanga obundu eka, mobimya akaryo kabo nobutseme nomutima muguma, 47eri pipa Mungu nerisimwa na bandu bosi. NoMukama mwatome kera kubo ekirokiro abalamibawa.
Currently Selected:
Emibiri 2: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.