Emibiri 10

Kornelio

1Ekaisaria habya mundu oyu kahulawa mo Kornelio, omukulu wa basoda erigana wekihanda kyeItalia, 2omundu mugenge oyu kubaha Mungu iye nenyumba yiwe yosi, iniakahitaya ndeke oko bandu, nerisaba Mungu endambi yosi. 3Hakuhi nendambi yomwenda yeritungi mwalangira ndeke omonzoli omulaika woMungu akasa akabuga naye, ati Kornelio. 4Naye mwamusamarira neriubaha, mwamubulya, ati, Niki Mukama? Naye mwamubwira ati, Erisaba ryawe nerihitya ryawe byabirihetuka emuliro woMungu ngerimwi bukya. 5Na lino utume abandu eYopa, ulete Simoni oyu kahulawa mo Petero; 6ikere na Simoni, omubambi wesyongobi, enyumba yiwe ihererenie nengetsi. 7Omulaika oyo wabuga naye abere abigenda, mwabirikira abagombe biwe babiri nomusoda mugenge oko bakamukolera emigulu yosi, 8abere abibwirabo ebyosi mwatumabo eYopa.

Erilota ryaPetero

9Nengyakya, bakagenda basonda erihika hakuhi nomuyi, Petero mwaya omo nyumba yendata erisaba hakuhi neritungi. 10Neryo mwakwa enzala mwasonda erirya; nikwa omugulu bakokotaya akaryo mwabya ngakalota, 11mwalebya olubula ilukingukere, nekindu ikikandagala, ngolukimba lunene, luka ndagalibawa nesyongonde ini erihika oko kitaka. 12Mulo imuri esyonyama misindo yosi esyemigulu ini nesikakululuka nesyonyonyu syomukyanya. 13Nomulenge mwasa okwiye, ati, Hangana, Petero, usinze urye. 14Nikwa Petero mwabuga, ati, Eyihi Mukama; sindinatarya kindu buyira kutse kibi na kera. 15Nomulenge mwamubwira engendo ya kabiri, ati, Ebyo Mungu abirierya isiwahulebyo mo buyira. 16Omwatsi oyu mwakolwa engendo isatu, nekindu ekyo mokyasumbirwa elubula neryo-neryo.

17Omugulu Petero atikatika mo mutima wuwe ngesyonzoli esyo amalolako nga ni musindoki, lebaya, abandu babiri aba tumawa na Kornelio bamabibulya enyumba ya Simoni, ibana hangene okwirimbo, 18mobabirikira eribulya nga Simoni oyo kahulawa mo Petero nganikeremo. 19Nomugulu Petero abya akaringikania esyonzoli, eKirimu mokyamubwira, kiti, Langira bandu basatu bakakusonda. 20Hangana wandagala, ugende nabo sutikatike; kusangwa ingye natumabo. 21Neryo Petero mwakima mweya abandu abo mwabwirabo ati, ni ingye oyo mukasonda; ekikabaleta niki kwehi? 22Nabo bati, Kornelio, omukulu werigana, mundu mubuya neriubaha Mungu, oyo kasimawa nekihanda kyosi kyabaYuda, abwirawa nomulaika oyu buyirire erikutumirako eriya ewuwe, owe ebinywa byawe. 23Neryo mwingiryabo mo bageni buwe.

Petero na Kornelio

Nengyakya mwahangana mwagenda nabo, nabandi balikyetu beYopa mobagenda naye, 24nengyakya mobingira Kaisaria. Na Kornelio inianalindirirebo, iniabirihindania ekitunga kyabo nabira biwe. 25Petero abere abiingira, Kornelio mwahindana naye mwagwa ahisi oko bisandu biwe, mwamukukamira. 26Nikwa Petero mwamuhangania, ati, Hangana; nage indi mundu. 27Nomugulu akanaya naye mwingira mweya ibahi ndeneho bangi; 28neryo mwabwirabo ati, Inywe munasi ko riganirwe omuYuda akaikala haguma kutse eriyabana abekindi kihanda; nikwa Mungu abirinyikangya ko nde nangahula mundu mo buyira kutse mo mubi. 29Neryo omugulu natu mawa ko monasa mondagana. Neryo ngabulaya ekyaleka imwanyitumirako.

30Kornelio mwabuga, ati, Lino ni biro bini nabya ngateya endambi yomwenda erisaba omo nyumba yage; lebaya, omundu mwimana embere syage nolukimba luhenirye, 31ati, Kornelio, erisaba ryawe ryamogubwa nerihitya ryawe ryamibukwa embere syoMungu. 32Neryo utume eYopa utumire ku Simoni oyo kahulawa mo Petero; ikere omo nyumba ya Simoni mubambi wesyongobi, hakuhi nengetsi. 33Neryo-neryo monakutumi rako, nawe wamayira ndeke ukasa. Lino itwe bosi turi hano emuliro woMungu, eriowa ebyosi ebyo Mukama abirikutegeka.

34Neryo Petero mwakumbula obuno buwe, ati, Kwenene ngalebaya Mungu siariyira butaga, 35nikwa omo buri kihanda oyu kamubaha, nerikola ekitunganene, akaligawa naye. 36Mu nasi eKinywa ekyo atuma oko baIsraeli, eritula engulu yowene yobuholo busana na Yesu Kristo (iye ni Mukama wabosi), 37eKinywa ekyo mokyatulwa eYudea hosi, eritsuka eGalilaya enyuma yolubatisimo eyo Yoane akangiriraya: 38ngokoMungu ahakabaya Yesu we Nazareti neKirimu Kibuyirire namaka; ngoko alendera akakola ebibuya nerilamya abosi bagalibawa neSatani, kusangwa Mungu abya naye. 39Netu turi balangiri bebyosi akola omo kihugo kyabaYuda neYeru salema; mobamwita erimubamba oko muti. 40Nikwa Mungu mwamulubukya ekiro kyebisatu mwamuminyikalya; 41butsira oko bandu bosi nikwa kwitwe abayisogawa noMungu eribya balangiri, itwe twarya neripulya haguma naye enyuma abilu buka omo baholi. 42Naye mwatutegeka eritulago oko bandu, neribuga kwariyo yo Mungu ategeka eribya mutsweri wabariho nabaholire. 43Abaminyereri bosi bakatulago busana naye bati oburi mundu oyu kamwikiriraya akabana eribuyirwa ryebibi oko rina riwe.

44Nomugulu Petero abere akinabuga eki, eKirimu Kibu yirire mokyatogera oko bosi bowa eKinywa ekyo. 45Nabiki rirye omukati-kati kababwene abasa na Petero mobasweka, kusangwa erihitya ryeKirimu Kibuyirire kyutulirawa oko Bihanda nibya.

46Kusangwa mobowabo bakabuga omo mibuge neripipa Mungu. Neryo Petero mwabulya, ati, 47Nindi wangatoka eritagana amagetsi eribatisya abandu aba ababiriangirira eKirimu Kibuyirire ngatwe kwehi? 48Neryo mwategekabo ati, babatisibawe omo rina rya Yesu Kristo. Neryo mobamu bulya bati ikale nabo ebindi biro.

Currently Selected:

Emibiri 10: NTN62

Highlight

Copy