Emibiri 11

Erikania rya Petero busana neBihanda

1Neryo abakwenda na balikietu ababya eYudea mobowa kweBihanda byabiriangirira eKinywa kyoMungu. 2Na Petero abere abihetukira eYerusalema, ababwene mobamuha yira, bati, 3Busana naki waya oko batabwene warira haguma nabo? 4Nikwa Petero mwatsuka erikaniryabo mwatondola kigumakiguma: ati, 5Nabya oko muyi wa Yopa ngasaba; monabya omo bulime monalangira omo syonzoli ekindu kika ndagala, ngolukimba lunene, ilulerembirye nesyongonde ini erilwa elubula; mokyambikako. 6Monasamalirakyo ndeke monalangira syonyama syemihimbi ini, esyahesi nesyomoli, nesikayikura ahisi, nesyonyonyu syomokyanya. 7Monowa omulenge akabuga nage, ati, Hangana, Petero; usinze urye. 8Nikwa nage nyiti, Eyihi, Mukama: kusangwa sihari kindu buyira kutse kindu kibi ekingira omo obuno bwage ne kera; nikwa omulenge mwanyisubirya engendo ya kabiri erilwa elubula, ati, 9Ebyo Mungu abirierya susololebyo eriahulabyo mo buyira. 10Omwatsi oyu mwabya atya ngendo isatu, nebyosi mobyasumbirwa omo lubula. 11Noko ndambi eyo abandu basatu mobahika oko nyumba eyo twabyamo, batumawa kwingye erilwa eKaisaria. 12NeKirimu mokyambwira kiti nyigende nabo butsira eritika-tika. Abalikyetu aba endatu moba genda nage, motwingira omo nyumba yomundu oyo. 13Naye mwatubwira ngoko alangira omulaika inianimene omo nyumba yiwe akabuga, ati, Utume eYopa utumire ku Simoni oyo kahulawa mo Petero; 14asyakutulira omwatsi ngoko wasya lamibwa, uwe nenyumba yawe yosi. 15Nage nabere natsuka eribuga, eKirimu Kibuyirire mokyandagalira kubo ngoko kyatwandagalirako embere. 16Monibuka eKinywa kyoMukama, ngoko abuga ati, Yoane abatisaya omo magetsi, nikwa inywe mwasyabatisibwa omo Kirimu Kibuyirire. 17Omungu ama habo erihitya eryo ngoko atuharyo omugulu twikiriraya oMukama Yesu Kristo, ingye nabya ndi nyiti nangatoka erilwa noMungu kwehi? 18Babere bowa ebyo mobabya bukutu mobapipa Mungu, bati, oMungu abiriha oko Bihanda nibya eribindukira oko engebe.

Eritsuka eriahulwa mo baKristo eAntiokia

19Neryo abapanzawa busana neriendererya eryatsuka busana na Setefano mobalendera erihika Foiniki neKipuro neAntiokia, ibakabwira abaYuda basa eKinywa. 20Nikwa habya abandi bakubo, abandu beKipuro nabeKurene babere babihika eAntiokia mobabuga na baGiriki, bakatula engulu yoMukama Yesu. 21Nebyala byoMukama byabya nabo, nabangi mobi kirirya mobabindukira oko Mukama. 22Nengulu eyi moyahika omo matwi wekanisa eYerusalema, nabo mobatuma Barunaba eAntiokia. 23Abere abihikayo alangira olukogo lwoMungu, mwatsema; mwahanabo bosi ati bakwamirire oMukama nomu tima asikire: 24kusangwa abya mundu mubuya, iniuswire neKirimu Kibuyirire nerikirirya: nendeko nene moyatome kerwa oko Mukama. 25Neryo, Barunaba mwaya Tarso akaya sonda-sonda Saulo; 26abere amubana mwamuleta eAntiokia. Noko mututa mugima mobahindana nekanisa, mobakangirirya endeko nene ya bandu; eAntiokia yabiga batsukira eriahulwa mobaKristiano.

27Noko biro ebi abaminyereri mobalwa eYerusalema bakaya eAntiokia. 28Nomuguma wakubo oyo kahulawa mo Agabo mwahangana mwaminyerera iniabiribwirwa neKirimu, ati, Enzala nene yasyabya omu kihugo kyosi: neki mokyabererera omu biro byaKlaudio. 29Nabiga omo lulengo lweritoka ryo buri mundu, mobaringikania erituma oko balikyabo abikere eYudea ebyeriwatikyabo; 30mobakola batya, mobatumabyo oko bakulu omo byala bya Barunaba na Saulo.

Currently Selected:

Emibiri 11: NTN62

Highlight

Copy