Ba-Loma 12
12
1Lacin’eho, lakoond’ino, bifili, la tosei tona Yakomba, lacina bolekya baonge’anino mbeka iniyaike, inekyama en’oeka, initangama bolotsi eneyali Yakomba; ekumedyo ena Yakomba enakolana l’ino nd’eho. 2Botakilanake l’okotua bon’esik’ene la njokola, ohonde bohalinywa la nnunola lakina ena nkanyi inino, lacinaho bofokole eango ena Yakomba en’olotsi, eango enetangam’olotsi ko l’enonga.
3Lacin’emi lila, lacin’en’isei inifama eneyal’emi, emite, boto l’oto’onino atayofefake ena lokanyi lonande, l’okotua bonofakoli l’ende; ohonde akanelake lokanyi lonakolana, l’okotua bonoki Yakomba okoedyaka boto l’oto lelelo lon’imeedyo. 4Yoka bosambo bonat’iso bilama bike ena yonge limoko, ko bilama bihitu bilayali l’osala bon’okotu’omoko; 5nk’osamb’oho iso, kanya toyali bike, toyali yonge limoko eneyali Masiya, ko boto l’oto ayali nk’elama. 6Koko tomofama nganji inicikitana bosamb’onoyali isei inifamaki eneyal’iso, yotabo mpoladya ena baoyi bana Yakomba, tilake eho yoka bosamb’onoyali lelelo lon’imeedyo; 7yombo ekanibelo en’ekambwa, tokambake; ko ende onolaka, alakake lilako; 8yombo boto’omoi asomy’ato ena lilako, asomyake. Ende onof’ato nganji, aafake ibo l’otem’omoko; onilama ena lifoka, asalake bosala bona lifoka liho la locinji; onokamel’ato isei, aokake isei l’enyanga. 9Nk’ookamel’ato nganji, nganji eho etaatake bosimo. Bokilaka bowe nkila mene; bundamela nk’olotsi. 10Ena likambo lina nganji ena bifili, bokanaka nganji bike; boongya lifikana mpika. 11Botakambake ekambwa la bofedya; boyalamaka la mposa en’olimo; bosaela Nkolo. 12Bonyangela ena lolengedyo; botalembwake en’esike ena nyoma; bocindelana bina Lina ena beondo. 13Hokambya ban’oeka bana Masiya ena biinda bonind’iyo, bosangela befenda. 14Bosakel’iyo banatonyom’ino bosako: bosak’osako, botamomake. 15Bonyangela l’iy’ananyangela; bolela l’ikanelela. 16Boyalamaka la lokanyi lomoko en’atenyi’aninoamene. Botatomake nkanyi inino en’aoyi banakolek’ino, ohonde bambana l’iy’aninda lokumo. Botayotangak’inoamene bato bana bomwu. 17Botacindanyake boto l’oto bowe l’owe. Boongya yila baoyi banakoli nko nkolana en’aiso ban’ato bahatu. 18Yombo inoamene binya, bokend’efili l’ato bahatu. 19In’analangama, inoamene botutodyake nkele, ohonde bocikela nkele ena Yakomba mboka. Lacin’oka yoi limotengama, Mbutodya ena nkele eyali nk’enami; Yawe aila, ate, emamene nongutodya eho. 20Koko yombo bookyi’owe bone aoka njala, ofe toma; yombo aoka mposa, omedy’asi; enil’e yok’osamb’oho ongotadya baala bana nko; en’ote’onande. 21Botakoiyamake l’owe; ohonde bokoiyaka bowe l’olotsi.
Currently Selected:
Ba-Loma 12: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
