Bikambwa Biniki Bikima 23
23
1Ko Paulo aolenda likita lina bingambe ta, ko aila, ate, Bifili, Moyala en’oso bona Yakomba l’otema bonotankoiya yengoko bon’in’one. 2Ko Anania, nkanga en’iyome mene, aosumola iy’anemali mbolimboli la Paulo lacina baofome en’onyua. 3Nkwaho Paulo aila, ate, Yakomba angokofom’e, e boombo bonokyama mpembe ena telele! E okisa nd’ase lacina otende likambo linami bosamb’onoyali basangya, ko osumol’ato lacina bampome bosamb’onofakoli l’asangya? 4Ko iy’anemali mbolimboli, Mbo e osongola nde nkanga en’iyome mene ena Yakomba? 5Ko Paulo ate, Bifili, ntey’oka ayali nkanga en’iyome mene; lacina yoi limotengama, Ofatangaki boto’onoyali la lifoka eneyali bato’ane lotango. 6Ko eneki Paulo oenak’oka boloi’omoi boyaaki Basadoke ko boloi’okina Bafalusi, aololua ena likita, ate, Bifili, emi nde nde Bofalusi, la bon’ona Bofalusi; ko emi lufolama bon’in’one lacin’ena lolendedyo ko l’eetwelo en’ato banawaki. 7Ko eneki’nd’otendaka yok’osamb’oho, Bafalusi la Basadoke baatana ntango bike mene, ko likita yokambwana beloi; 8lacin’oka Basadoke bail’oka efaate eetwelo en’ato banawaki, ko efana ekima, ko efana bolimo; ohonde Bafalusi baimedy’oka baoyi bah’asaso bayali. 9Nkwaho baotom’etomoko mene; ko batengi’amoi ban’ekanda ban’oloi bona Bafalusi baemala, ko baata ntango bike, Mbo iso tofene yoi lin’owe eneyali boto’one; ko yombo bolimo yombo ekima ena loola atendaki l’ende, a koko nai? 10Ko eneki ntango osokwaka bik’ike, commandant aanga nko mbanga mene, lacina Paulo atongokambolama bitenyi l’iyo; aotoma soldats lacina bakite, ko baumole Paulo eneyal’iyo la locili, ko bayi l’ende ena litonga lina soldats.
11Koko boco bona loi Nkolo aemala l’ende, ate, Kiky’otema; nk’eyok’onok’oyalamaka temoin enami ena solosolo ena Yelusalema, okoli lacina oyalame temoin enami ena solosolo ena Loma nkoho.
12Eneki bina okyaka, Ba-Yuda bamoi baoteelana lisangya, ko baoteha biteho, Mbo iso tofayale ko tofamelaki yengoko kuma toyaka Paulo nko tu. 13Ko bato banatehaki lisangya line baleki ntuk’inei. 14Ko baoya eneyali nkanga ina toome la bingambe, iy’ate, Iso tomoteha lisangya lina likolo, tofayale iyema yengoko kuma toyaka Paulo. 15Ko isanga ino la likita lina bingambe bosumole commandant lacina akokitsedy’ende, yok’ino bolanga lacina bosisole likambo linande nsisola mene; koko iso tomokolana lacina enesokoolam’ende mbolimboli toyake nko tu. 16Koko bon’ona mbangela ena Paulo aoka eango eho en’eyakelo; ko aotua ena litonga lina soldats ko aosumola Paulo. 17Ko Paulo aelela capitaine emoi ena soldats eneyal’ende, ate, Tola bofeng’one eneyali commandant, lacin’oka ayali la yoi litutuma lacina aosumole. 18Ko amotamba, amotola eneyali commandant, ko aila, ate, Paulo onoyali en’onyolo aombelelaka, aonsumolaka nkoyele bofeng’one, lacin’ende ayali la yoi oyokosumol’e. 19Ko commandant amosuka la likasa, ko amosuma ena lokuko, amuufola, ate, Yoi linalang’e lacina onsumole lika nai? 20Ende ate, Ba-Yuda bamimedya lacina bakufol’e, lacina okitsa Paulo loi ena likita lina bingambe, lacin’eho osisole bokotua bona likambo linande nsisola lakina. 21Ohonde e taimedyake tutu; lacin’oka bato’aniyo banaleki ntuk’inei bamokongamela, ko bamoteelana lisangya iy’ate bafayale ko bafamelaki yengoko kuma bamoyaka tutu; ko bamokolana, balengedya nk’esemba eneyal’e. 22Ko commandant aofa bofeng’oho etelo lacina acu, ko amosumola, ate, Tasumolake boto’omoko omontuma baoyi’ane. 23Ko aelela capitaines ife, ate, Bokolanya soldats bekam’efe, la soldats ina mpunda ntuku nsambo, la soldats banasuka bakonga bekam’efe, bacu ena Kaisalia, ko baemwa en’esike ena neuf heures. 24Ko amasumola lacina batambe mpunda, ko batadya Paulo ena mpund’iho, ko baotole bolotsi eneyali Felika, nko gouverneur. 25Ko aoteng’okanda yok’osamb’one; ate,
26Emi Kulaudio Lusia lakees’e Felika, gouverneur onoleki lokumo, Bote! 27Boto’one aundamaki la Ba-Yuda, ko asokoyakama l’iyo, koko emi loya eneyal’iyo la boloi bona soldats ko lomotungola, eneki’m’ononganyak’oka ayali bise Loma. 28Ko eneki’m’olangak’oka njeye ncina enek’iy’oakolak’ende, lomokitsa ena likita liniyo; 29ko len’oka bamoloakola baoyi bana basangya baniyoamene, ohonde batoakola ende la yoi linalikoli l’ewedi yombo l’enyolo. 30Ko eneki’m’ookak’oka bamoangela boto’one eango en’owe, lomotoma isasanga eneyal’e, ko mosumola baakoli’anande lacina batende yoi liniyo lacin’enande nk’en’oso’oneamene.
31Ko soldats baotamba Paulo, yok’onok’iy’otomamaka, ko baoya l’ende l’oco ena Antipatuli. 32Koko en’ina bona loi baocika ban’aise mpunda bacu l’ende, ko iyoamene bauta la mbusa ena litonga lina soldats. 33Eneki ban’amoi oyelaka Kaisalia, baofa gouverneur bokanda, ko baolekya Paulo eneyal’ende. 34Eneki gouverneur oandaka boho, aufola bonyang’onande, ko eneki’nd’oeyak’oka ayali bise Kilikia, 35aila, ate, Enengi baakoli’ane oya, nongoka yoi line lihalitu. Ko aotom’onyua lacina baotombanya en’otumba bona Pretoire bona Elode.
Currently Selected:
Bikambwa Biniki Bikima 23: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
