Apocalipse 9

Quinto nai tsumã hawẽ trombeta mawakĩ txã anikiaki, na hãtxarã

1hanushũ ha quinto nai tsumã hawẽ trombeta txã akaya bixi keska mai anu kawani tĩ ika ẽ uĩayã mai kini keyatapa shãkĩhaira hanu yushĩ txakabu hiweabu anu hawẽ bepẽti chave ha bixi keska Deusũ nai tsumã inãkẽ 2bixi keskatũ hawẽ kini bepẽayã hanua txi kuĩ mirima bai ewapa kua keskai mexu tuenabaĩkĩ bari inũ nũ hawẽ huĩsinamis mexu waya 3kuĩ puebainai nakui xinĩwã mirima mai anu pai butuabu nibu keska wakĩ Deusũ hatu paepawakĩ pubẽwãkĩ 4yunukĩ: “Mai anushũ basi piama hamapai mibã xarabu piama hi piama yurabu habũ betũkuki Deusunabu hawẽ unãti netãbuma besti pikĩ hatu itxakawakubaĩtãkãwẽ, 5cinco ushe hatu isĩ tenemabiakĩ tsua tenãmarã”, hatu wa bushũ yurabu itxakawakĩ nibu keskakĩ hatu pikĩ hatu isĩhaira tenemakubainaibũ

6ha hatu haska waitiã yura mirimabu isĩ tenei mawakatsis ibiai huĩti shukubiai mawabuma ishãkanikiki.

7Ha xinikiri matu yuinũ nĩkakãwẽ. Habũ yurarã, cavalo hawẽ detenametanũ ishũ pewamisbu keska inũ, shanẽ ibũ ouro mane maiti maia keska inũ, habũ besu huni kuĩ besu keskaki. 8Ha inũ, habũ bu aĩbũ bu keska inũ habũ sheta inu pubẽ leãonẽ makushpi txaipa keskaki. 9Ha inũ, habũ yura atximati mane kuxipahaira sawea inũ habũ pũyã peiwẽ nuyai cavalo mirimatũ hawẽ tarãbaĩtiwẽ tarãbaĩkĩ detenameaibu iyui banabainaibu keskabuki. 10Ha inũ, habũ hina nibu hina keskawẽ yurabu pikĩ hatu txakabuwa ushe mekẽ bestiti isĩ tenekubaĩshãkanikiki. 11Ha inũ, xinĩ shanẽ iburã, ha kini keyatapahaira hatũ yunumis nai tsumaki. Hawẽ kena Hebreu hãtxawẽ Abadomki. Ha inũ, hawẽ kena Grego hãtxawẽ Apoliomki. Ha inũ, hãtxa kuĩwẽ kenarã, Yamawanikaki.

12Hanua ha dukũ mesehaira atimapa keyukainaya hanua dabe tashniriama hayayuaki.

Sexto nai tsumã hawẽ trombeta mawakĩ txã anikiaki, na hãtxarã

13Ana ha sexto nai tsumã hawẽ trombeta txã txã akai ẽ nĩkaya Deusũ besuuri ha Deus kẽwãti ouro mane tapu anu ha dabe inũ dabe deshũ tibi haki mani tximei txãkã tsamia anua hui tashni hãtxakĩ 14ha nai tsuma trombetaya yuikĩ: “Ha nai tsuma dabe inũ dabe henewã Eufrates dapi neshea pekatã hatu nitxĩriwe”, aka 15haska was ha nai tsuma dabe inũ dabe hatu peka mai hirabi anu yura tibi manibaunabu hau na habia hora inũ, dia inũ, ushe inũ, ano terça parte hau hatu tenã atanũbũ nai tsuma betsã ha nai tsumabu dabe inũ dabe hatu nitxiã tashnibainaibũ 16habũ soldadobu cavaloki katsaũwãburã, duzentos milhõesti yuikãshu haskashanaibu ẽ matu keneshunaii.

17Ẽ nama keskatã haska ẽ uĩshu inũ haska ẽ nĩkaxina matu yuinũ nĩkakãwẽ. Huni tibitũ hawẽ shutxi atximati mane taxipa txi keska inũ, nãketapa jacinto keska, inũ paxinipa enxofre keska saweabũ habũ cavalo bushka inu leão bushka keska hayabũ hawẽ hashpa anua txi inũ, kuĩ inũ, enxofre paxinipa kui tashnibainaya 18dabe inũ besti pakea anu yurabu ha dabe inũ besti isĩ txakabu ha cavalo hashpa anua kaĩkaĩkĩ txi inũ, kuĩ inũ, enxofre kaĩkaĩkĩ hatu tenã keyukẽ 19ha cavalo hawẽ hina dunu keskaki, hawẽ hina inũ, hawẽ dekĩ inũ hawẽ sheta paepawẽ yurabu hatu txakabuwairã.

20Hakia ha yura tesheabu isĩ txakabuwẽ habu mawabuma habũ txakabuwakubaĩkĩ heneama yushĩ txakabu kẽwãkĩ heneabumariki. Ha inũ, yushĩ dami betsa ouro mane inũ, prata mane hushupa inũ, bronze mane taxipa inũ, mixki dami inũ, hi dami ha dami betsa betsapabũ uĩtiruma inũ, nĩkatiruma inũ, maputiruma kẽwãkĩ heneabumaki. 21Ha dikabi detenamei heneabuma inũ, yushĩ txakabũ shuũ itiwẽ daunãnaĩ heneama inũ, huni inũ aĩbu betsa betsapabube txutanamei heneama inũ, yumetsui heneama txakabupakeshanaibu ẽ Joãonẽ haskashanaibu ẽ uĩshuki.

Currently Selected:

Apocalipse 9: cbsBR

Highlight

Copy

Compare