Apocalipse 10
10
Una pixta sebi bepemana nai tsumã benikiaki, na hãtxarã
1Hanua nai tsuma kuxipa betsa nai anua butuai ẽ uĩshu matu yuinũ nĩkakãwẽ. Hawẽ yura nai kuĩnẽ yabua inũ, hawẽ bushka nawã bai tapia keska inũ, hawẽ besu bari keska txasha inũ, hawẽ bikerã txi dekẽ keskaki. 2Ha inũ, una pixta sebi bepemana tsumabirana hawẽ tae txixabukũtã hawẽ tae yusiuri iãnẽwã bepaia inũ hawẽ tae yusmauri maiki paiaki. 3Ha nai tsuma sai iki inu leão pubeĩ tekerẽ imis keskai hui kuxipawẽ sai ikẽ hanua seteki hui tashni tĩ ikaĩkaini keska ẽ nĩkaxinaki. 4Hawẽtxaĩs seteki dẽke iki betsa betsapai hãtxa nĩkatã hawẽ hãtxa kenẽnũ ishũ ẽ pewaya naiurishũri hui betsawẽ tsuãra ea yuikĩ: “Ha hawẽtxaĩs ha seteki dẽ iki betsa betsapai mĩ nĩkabiashurã, ha keneama hunewe, tsua yuiyamarã”, ea waya
5hanua ha nai tsuma iãnẽwã bepaia inũ mai anu paia hawẽ mekẽ yusiuri naiuri sanãtã 6ha hiweibi hiweni hiwea hatũ nai wani inũ mai wani inũ iãnẽwã wani dasibi habu hawẽ hiwebaunabu hakiri hãtxa betsa watimakiri yuikĩ: “Bari hawẽ heneirã, hatishũ bestiki. 7Ha sete nai tsumabu hawẽ henea sétimõ hawẽ trombeta txã akaya Deusũ tsumabu hawẽ hãtxa yuishunikabu haska inũbariaikiri Deus hune yubakapauni ma hatishũ besti meneshanikiki”, ikaya
8ha hui nai anua tashniai ẽ nĩkaxinatũ ana ea yuikĩ: “Ha nai tsuma hawẽ tae betsa iãnẽwã bepaia hawẽ tae uke betsa maiki paiatũ una pixta sebi bepemana tsumaki nukushũ mebĩwẽ”, ea wa 9kashũ yuikĩ: “Ha una pixta sebi bepemana mĩ tsumarã, ea inãwẽ”, ẽ aka ea yunukĩ: “Naki, piriwe. Mĩ pia mĩ hana buna bata keska ibiatã mĩ hatu mukahairaikiki”, ea wa
10ha una sebi pixta nai tsumã tsuma mebĩtã ẽ pia ẽ hana buna bata keska batabiakaini ẽ hatuki nanekĩ muka wabainaya 11hanushũ nai tsumabũ ana ea yuikĩ: “Deusũ mia ana yunuairã, mia yuinũ nĩkawe. Mae betsa betsapa anu hiweabukiri inũ, nawa mai pakea betsa betsapakiri inũ, hãtxa tibi hãtxaibukiri inũ, shanẽ ibu kuxipahaira betsa betsapakiri hawẽ hãtxa bena shabakabi hatu keneshũkĩ haska Deusũ hatu haska washanai hatuki txaniriwe”, ea wa ẽ nĩkashuki.
Currently Selected:
Apocalipse 10: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
