Malaquias 3
3
1Senhor Deus kushipa dasibi binu keyuatũ matu yuikĩ: “Ẽ hãtxa bunika ea bebũ ẽ nitxĩshanaii, hau hatũ ẽ hanu kashanai bebũkiri hau ea bai pewashũshanunã, ikĩ Senhor Deus ẽ matũ shanẽ ibu mã ea benakubaĩmisbu hanu eki nukuti Templo anu hawairakaĩ ẽ hikishanunã. Haska ẽ yubakani ẽ hãtxa matu bushuĩ ma kaikiki, ha uinũ ika mã ikubainaiburã”, ikaya
2txanima ha shabatiã Senhor Deus hui tashnikiranai tsuã nematiruma ishanikiki. Tsuãra huai uĩ hanu ni txaipatirumaki, hawẽ txakabuwẽ taearã. Nuku pewai huirã, bai kuabu txi here keska hushanikiaki. Nukũ detsis sabão kushipawẽ txuka keska washanikiaki. 3Hua tsaushũ Israelĩ huni bake Levĩ enabu nukunabu Deusbe hãtxashunikabu unãti wakĩ hatu pepa washanikiaki, mane prata hushupa inũ mane ouro tashipa txi anu kukatsa akĩ hawẽ detsis urẽkĩ has wamisbu keska matu wakinã. Ma matu pewakẽ haska Moisĩ hatu yusini txibãkĩ inabu nami inũ hawẽ sheni has menukĩ hatũ shinã pepawẽ Senhor Deus kẽwãkĩ uĩmakubaĩshãkanikiaki. 4Judá enabu inũ Jerusalém anu hiweabũ Senhor Deus inãkuĩkubainaibũ Senhor Deus ana benimashanikiaki, hatũ shenipabu uatiã hiwei peshũ benimawapaunibu keska wakinã.
5Senhor Deus kushipa dasibi binu keyuatũ ana matu yuikĩ: “Eã matu unãti watã txakabu inũ pepabu matu kupi ẽ hushanaii, eska hiwemisburã: yushĩ txakabũ kushipa hayabu inũ, hawẽ aĩma inũ hawẽ benemabe txutanamebaũmisbu inũ, yura betsa yubakai txanitxakamisbu inũ, tsuãra dayarubu inũ aĩbuaibu ma hawẽ bene mawabu inũ bakeishta ibuumabu itxakawakubaĩmisbu inũ, nawa betsabu beaibu hatu itxakawamisbu inũ, ewẽ datei ea nĩkaisbuma hatũ txakabuwẽ taeshũ ẽ hatu kupi hushanaii”, iwanã,
Deusunabũ hamapai tibi hatũ daya pei pashkashũ inãtikiri hatu yusinikiaki, na hãtxarã
6“Ea ẽ Senhor Deus maei ẽ hawa betsaismaki. Mã Jacó enabuwẽ taeshũ ẽ matu yamawakatsi ismaki. 7Haska matũ shenipabũ ẽ hãtxa henenibu keska wakĩ matũri ẽ yunuti hãtxa inũ ẽ nemati hãtxa henekĩ mã hawa txibãkatsi isbumaki. Ea ẽ Senhor Deus kushipahaira dasibi binuatũ ẽ matu yuiaii. Ea shinaĩ ea anu ana txĩtũbirãkãwẽ. Mã haskaibũ eari matu anu ẽ txĩtũriashanaii, matu ana mekekubainirã. Hakia matũ ea yukakĩ ‘Hawa wai mia anu nũ ana txĩtuaĩ?’ mã ikaya 8eãri matu yukakĩ: ‘Huni parananãkĩ tsuã Deus anua yumetsutirumẽ?’ mã ea wa matu kemakĩ: Txanima mã ea parãkĩ meribi betsa enabiakẽ mã ea yumetsũmisbuki. Haskabia mã ea ana yukakĩ: ‘Hawa mia parãkĩ nũ mia yumetsumismẽ?’ mã ea wa ẽ matu yuiai ea nĩkakãwẽ. Hawara hau ea menushũbũ inũ, matũ bai anushũ ma tseka meribi dízimo ea inãti inũ, ea inãkuĩti enabiakẽ yaushikĩ eskarabes ea inãkĩ mã ea yumetsukubaĩmisbuki. 9Txanima dasibi matũ mai pakea anua matunabu dasibibu yaushikĩ ea parãkĩ yumetsukubainaibuwẽ taeshũ ẽ matu txakabuwakĩ yupushanaii. Ẽ haska hãtxabiai ea Senhor Deus kushipahaira dasibi binu keyuatũ ana ẽ matu yuiaii. Nĩkakãwẽ. 10Matũ bai anua inũ matũ inabu anua haska Moisĩ matu yusini dízimo ena bekĩ eki nukuti Templo hanu arukĩ meketi dĩtu anu hatu inãkubaĩkãwẽ. Mã haska wakĩ ea uĩmaya eki nukuti Templo anu piti pepa hayakũkainaya eanã, matuna binumakĩ nai anua pepahairawẽ ẽ matu duawakubainai uĩkatsirã, ea dukũ unãti wamakãwẽ. 11Matũ bai anu yunu inũ matũ uva bai anu hawẽ bimi shenã inũ hawara sharabũ txakabuwamisbu matu anu ẽ ana yunuama ishanaii. 12Matũ mai pakea hawẽruahairawẽ taeshũ uĩkĩ yurabu shukuabu tibi hiwebaunabũ matukiri yuikĩ: ‘Deusũ hatu benimawakĩ hatu duahairawakubainikiki’, akĩ matu yuikubaũshãkanikiki. Eska ea Senhor Deus kushipahaira dasibi binu keyuatũ ẽ matu yuiai nĩkakãwẽ”, itã,
Habu hawenabu kayabibunã, hawẽ hãtxa nĩkamisbu Deus hatuwẽ nuishanikiaki, na hãtxarã
13Senhor Deusũ ana hatu yuikĩ: “Hãtxa kushipawẽ shabakabi mã ea yuãkubirãmiski, ẽ matu wa ea kemakĩ: ‘Hawa mikiri hãtxa kushipawẽ nũ mia yuãmismẽ?’ akĩ mã ea yukamisbuki. 14Eska shinaĩ mã hãtxanamemisbuki: ‘Deus duawai nũ dayashũbiakũkainai nũ hamẽki, hawamarã. Haska nuku yunumis akubaini nukũ txakabuwẽ dakekĩ tari besha sawea Senhor Deus kushipahaira dasibi binu keyua bebũ nũ hiwekũkainairã, hawa nuku manakukĩ inã nũ bishanai? 15Hakia nukũ hatu uĩkinã, habu ibubis keĩ benima bestiaibu nũ uĩmiski. Ha inũ, hunibu txakabubiakĩ mabu mirima itxawakĩ bikubaĩmisbuki. Habunã, Deusũ hau ea kupinũ, iwanã, unãti wamabiabu hawa Deusũ hatu kupiai meriabumaki’, ikĩ mã shinãkubaĩmisbuki”, hatu wanikiaki.
16Hamẽ betsarã, eska txanikiki. Tsuabũra Deus duawakĩ kẽwaĩ hãtxanamei mapushũ hatũ hãtxa habũ yuiai Senhor Deusũ hatu nĩkakĩ hatu betxipaiaya hanua naiurishũ haska habũ shinãkubainaibu Senhor Deus bebũ hawẽ hatu shinãmati una kenekĩ hatũ kena tibi habũ Senhor Deus duawamisbu tanakĩ kenekĩ netanibukiaki.
17Haskawẽ taeshũ Senhor Deus kushipahaira dasibi binu keyuatũ matu banabimakĩ yuikĩ: “Israelĩ enabu hau ea anu ana txĩtũshanũbũ shaba betsa ẽ hatu pewashũkubainaii. Huni betsa hawẽ huni bakẽ hawẽ epa dayai merabewakubainai hawẽ epa hawẽ nuimis keskai eari enabuwẽ ẽ ana nuishanaii, matũ txakabu ana shinãmarã. 18Haskakẽ habũ mã ea ikũwaĩbu duawakĩ hanua habũ ea nĩkaisbuma yupukĩ ẽ matu haska waitiã mã betsahaira uĩshanaii, hanu ekiri shabakabi unãkinã. Hakia natiã ẽ matu haska washanai mã tapĩriabumaki”, itã,
Currently Selected:
Malaquias 3: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.