Malaquias 2
2
1“Ebe matunabu hãtxashunikabuũ, ana ea Senhor Deusũ ẽ matu hãtxa wai nĩkakãwẽ. 2Ea Senhor Deus kushipa dasibi binuatũ matu yuikĩ: Matubunã, ea nĩkakĩ ikũwã kayabikĩ ea duawakubaĩshãkãwẽ. Mã haska ea wamakẽ ẽ matu yupushanaii. Shinãkĩ txanimawẽ mã ea duawamawẽ taeshũ matunabu mã ebe hãtxashunika ikubainai haska matu duawabiamisbũ betsa wakĩ eã ẽ matu txakabuwashanaii, yupukinã.
3Haska wakĩ matũ kushipa mebĩtã habũ ea kẽwãkatsi ikĩ hatũ ina beabu hatũ inapã pui matũ besuki ẽ putashanaii. Txipu habũri hatũ inapã pui matuki tsamia hayabi maturi putashãkanikiki. 4Ẽ matu haska wa unãtã na yunuti hãtxa Jacó huni bake Levĩ enabube ea ẽ yubakani hawa heneama hau haska apakeshanũbũ matũ shenipabu inũ matu ẽ habias yunukubaĩmis dasibibũ hau unãkĩ tapĩkubaĩshanũbũwẽ”, matu atã Senhor Deus kushipahaira dasibi binuatũ ana matu yuikĩ:
5“Ẽ yubaka hãtxarã, hiweti hãtxa inũ unanuma hiweti Levĩ enabu ẽ ashuniki, na yunuti hãtxa hatu inãkĩ habu eki meseti inũ dateti wakinã. Haskawẽ taeshũ habũ ea uĩmai ewẽ datekĩ ea nĩkakĩ duawapaunibuki. 6Levĩ hatu yusĩkinã, hawa txakabu hatu yuiama txanima hãtxa hatu yusĩkubaĩkĩ hau txakabuwayamanũbũ Israelĩ enabu mirima nemakĩ unanuma pepai ebe ketashamea ikubainibuki. 7Maturã, ea Deus dasibi binuatũ mã ẽ hãtxa bunikabuwẽ taeshũ ekiri hatu yusĩkĩ txanima mã hatu ea unãmanikabuki. Matu anu yurabu beshũ matu anua ẽ hãtxa kaiaĩ tapĩkĩ bikubaĩshãkanikiki.
8Hakia ebe matunabu hãtxashunikabuũ, hiwea pepa ea anua mã ma ea pashkabuki. Mã hatu yusĩ txakaiwẽ taeshũ yura itxapabu benukanikiki. Haska wakĩ ẽ Levibe yubakani matubũ txakabuwakĩ mã atimapawaii. 9Ẽ hãtxa nĩkakĩ mã txibã pewama Israelĩ enabu yusĩbiakĩ yurabu dasibi habiaskas duawakĩ mã hatu uĩmaismawẽ taeshũ Israelĩ enabu dasibibũ hau matu danã paepa wakĩ matukiri hau pe shinãyamanũbũ ẽ hatu shinã txakamariashanaii”, akĩ Senhor Deus kushipahaira dasibi binu keyua matukiri haska hãtxaikiki.
Israelĩ enabu Deus hatube yubakabiani hawa hawẽ hãtxa txibã pewama ikubainibukiaki, na hãtxarã
10Israelĩ enabu huni dasibibuũ, ẽ ea Malaquiasĩ matu yuinũ ea nĩkakãwẽ. Nuku dasibirã, nũ Epa bestitxai hayamamẽ, dasibi dami wanitũ nuku katunirã? Haskai nukubu nukumebi nũ parananãbukũmisbumẽ, haska Deus nukũ shenipabube yubakani danãkĩ txakabuwairã? 11Deusũ Judá yubabiani Judá enabũ hawẽ hãtxa txibã pewakĩ ashuãbuma Jerusalém anu hiweabu inũ Israel dasibi hiwebaunabu txakabui mã atimapakũkainaii. Hanu haki nukuti Templo Senhor Deusũ betxipaihairakĩ meribi wabianikẽ Judá enabu hunibu ibubis atimapakĩ txakabuwakanikiki. Haska inũ, nawa betsa aĩbuaibũ yushibubu kẽwãmisbu matunã, Deusũ yunuti txibãma hatu aĩwãkĩ mã bikubainaii. 12Ha nukunabu haskai hiweshũ txakabuaiburã, tsuabũra haska txakabuwakubainaibuwẽ taeshũ hamamaki hau Senhor Deus dasibi binua ewẽ nuinũ ishũ hawẽ inãkuĩwẽ Senhor Deus daewanũ ishũ ina tesẽshũ hatu menumashũbiaibũ habu kupikĩ nukunabu nukũ mai pakea anua Senhor Deusũ hau hatu yamawakĩ keyushanũwẽ.
13Ha dikabi mã txakabu betsa wakubaĩmisbuki, eskairã. Matũ inabu mã hatu menumakubainai benimakĩ Senhor Deusũ ana betxipaiama danãkubainaiwẽ taea bis bis iki kasha txakayamai matũ beũ henewẽ Senhor Deusũ kẽwãti hiwe hemaĩtĩ anu hawẽ txi tapu mã metxahaira wamisbuki. 14Hakia: “Haskakĩ nukũ inãkuĩ nami Senhor Deusũ nuku dananaĩ ikimẽkaĩ?” ika mã yuka ikairã. Eskaki, matu yuinũ nĩkakãwẽ. Berunã aĩyãtã hawa heneama habe hiwekũkaĩkatsi mĩ habe yubakabiani mĩ haska habe yubakani habe hiwei ikibi ikama itxakawakĩ putai mimebi mĩ parananaĩ Senhor Deusũ matu uĩkĩ unaĩwẽ taeshũ matu danãkubainikiki. 15Na habias Deusunã, nukũ yura inũ nukũ yushĩ nuku inaĩsmamẽ? Deusũnã, eska betxipaimiski. Tsuabura hawenabus meribi pepabu watã hatu hiwemakatsis imiski. Haskawẽ taeshũ berunãtũ aĩbu mã aĩwaĩ habe yubakani hawa kaneama habe hiwekĩ matũ yushĩ ibubis pe mekekubaĩkãwẽ. 16Senhor Deus Israelĩ enabu mekenika Deus kushipa dasibi binu keyuatũ huni dasibibu yuikĩ: “Matũ aĩ mã yubani parãkĩ hawa heneama matũ yushĩ ibubis mekekubaĩkãwẽ. Tsuãra hawẽ aĩ henebaĩkĩ txakabuwai hatũ tari detsis keska wamisburã, eã ẽ haska betxipaismaki. Haskawẽ taeshũ ana matũ aĩ tibi heneyamakubaĩkãwẽ”, hatu wanikiaki.
Hawenabu Senhor Deusũ hatu unãti wakubaĩshanikiaki, na hãtxarã
17Senhor Deusũ matũ hãtxa nĩkai ma matuki txikishi hatsãhairabiakẽ nĩkamas matũ ana yukakĩ: “Nuku nĩkai hau hatsanũ hawa nũ hãtxa txakabu yuiai?” iwanã, mã yukakubainaii. Hakia matũ yuikĩ: “Nũ txakabu wabiaya Senhor Deus nukuwẽ benimaikiki, shinã txãkainã”, iwanã, hãtxakĩ mã yuikubainaii. Hakia matuburã, Deus pepama dabanẽ mã ikũkainaii, hawa ikũwãmarã.
Currently Selected:
Malaquias 2: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.