Malaquias 4
4
Ha shabatiã shanẽ ibuhaira hushanaitianã, habũ Senhor Deus duawaibu benima txakayamashãkanikiaki, na hãtxarã
1Senhor Deus kushipahaira dasibi binu keyuatũ matu ana yuikĩ: “Bai anua hamapai mibã tsekashũ hawẽ shaka itxawakĩ hanus mãtxĩshũ kuamisbu keska wakĩ ibubis kẽmisbu dasibi inũ txakabubu dasibi kupikĩ txi hi ikai anu ẽ hatu menukĩ keyushanai ha shaba txi kushipaya ma tashni kemaikiki. Ha shabatiã hukirã hawa betsa teshewama ẽ hatu menu keyushanaii. 2Hakia matubu ewẽ datekĩ mã ea duawakubaĩmisbu bari pesheai keska ẽ pepa matu txashashũshanikiki, ana hawa matu isĩ tenemama ẽ kupiti matu nemashunirã. Haskaiwẽ taea benimai matubu mã ishtxu ishtxu ikũkaĩshanaii, kene meranua ina awa bake kaĩkainai keskairã. 3Ha shabatiã ẽ matu pewashũkubainai huni txakabubu mã pema pema akubaĩshanaii, mai mishpu pema keska wakinã.
4Ha inũ, betsarã, Mati Horebe anushũ ẽ tsuma Moisés ẽ yusĩti hãtxa ẽ inãni heneama shinãkubaĩkãwẽ. Ha yunuti hãtxa inũ ha nemati hãtxa Israelĩ enabu dasibibũ nĩkakĩ hau txibãkubainũbũwẽ.
5Uĩkãwẽ. Ha shaba mese dasibi datemakĩ ea ẽ Senhor Deusũ kupiaitiã huriamakẽ ẽ hãtxa yuishunika Elias hiwepaunirã, ana matu anu ẽ yunushanaii. 6Elias hushũ epabu inũ habũ huni bakebu sinatanameaibu pewakĩ hatu daenamemakubaĩshanikiki, hatũ shinã betsa wamakinã. Hamẽ Elias hushũ matunabu yusĩkĩ pewamakẽ hakia ea kayabis hushũ matũ mai pakea dasibi kupikĩ ẽ matu yamawakĩ keyui hushanaii”, akĩ Senhor Deusũ hatu yui txani keyunikiaki.
Currently Selected:
Malaquias 4: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.