Malaquias 1
1
Israelĩ enabu Senhor Deus hatuwẽ nuikĩ hatu betxipaikubainikiaki, na hãtxarã
1Deusũ hãtxa yuishunika Malaquias hãtxamakĩ hawẽ hãtxa Senhor Deusũ Israelĩ enabukiri yuimakubainikiaki.
2Israelĩ enabu Senhor Deusũ yuikĩ: “Eanã, ẽ matu betxipaikĩ heneismaki”, ẽ matu wa, hakia matũ ea kemakĩ: “Mĩ nuku betxipaiai haskatã nũ unãkubainai?” mã ibiaya ẽ ea Senhor Deusũ matu kemakĩ: “Ẽ matu haska keska wai shinãkãwẽ. Esaú inũ Jacó hawẽ betsahairabiakẽ matũ shenipabu Jacó besti betxipaikĩ duawakĩ 3Esaú betxipaiama ẽ dananiki. Esaú mai pakea mati matipa pepabiakẽ betsa wakĩ ha mai ẽ atimapa waniki, yunu benetima wakĩ yuinaka besti hanu hiwetirubu hatu pewashũkinã. Hakia matuna txakabuwakĩ ẽ haska wama iniki”, ẽ ikaya
4hakia Esaú enabu Edom nawabu yuinamekĩ: “Nukũ maiwã pakekauana Deusũ txakabuwabiani ana bena wakĩ nũ pewakubaĩshanaii”, ikaibu hatu nĩkatã ea Senhor Deus kushipahaira dasibi binuatũ hatu kemakĩ: “Matubunã, matũ mai pakea mã ana bena wabiaya ẽ ana matu txakabuwãkĩ keyushanaii”, ẽ iniwẽ taeshũ hatũ mai pakea kenakinã: “Mai pakea txakabuwẽ yupuni maiki”, ashãkanikiki. Hanua: “Ha Esaú nawabuki Senhor Deus sinatatiani hawa hatu heneama hatuki sinatapaketi warianiki”, hatu haska wanikẽ 5Esaú ẽ haska wani habias matũ beruwẽ mã uĩtirubuki. Hanushũ matu Israelbũ yuikĩ: “Nukũ Senhor Deusũ kushiparã, nukũ mai pakea binua hawẽ kushipa uĩtirubuki, nenu bestimarã, iwanã, mã yuikubaĩshanaii”, iniki, Senhor Deusrã.
Hawenabu habe hãtxashunikabu txitekĩ Senhor Deusũ hatu ha anikiaki, na hãtxarã
6Senhor Deus kushipahaira dasibi binu keyuatũ habe hawenabu hãtxashunikabu hatu yuikĩ: “Huni bakebũ hatũ epa nĩkakĩ hatu duawakubaĩmisbuki. Hawẽ tsumabũ hawẽ shanẽ ibu nĩkai haki datekubaĩmisbuki. Hakia earã, ẽ matũ Epa kayabiki. Haskakĩ ẽ hãtxa nĩkakĩ mã ea duawaismamẽ? Ha inũ, ẽ matũ shanẽ ibubiakẽ haskai ea nĩkai mã eki datekũkaĩsmamẽ? ẽ ibiaya ea danãbiakubaini hãtxa txakabukĩ yuikĩ: ‘Hawa haska wakĩ nũ mia danãmismẽ?’ mã ikaya 7-8matu yuikĩ: Ẽ kẽwãti txi tapu anu misi meribima ea mãtxĩshũ birãbirãbiai ana hamamaki ea yukakĩ: ‘Hawa haska wakĩ mia berabĩwãkĩ nũ mia sinatamamismẽ?’ mã ea wai matu kemakĩ yuinũ ea nĩkakãwẽ. Senhor Deusũ kẽwãti txi tapu pema duakabiki, iwanã, ina bekũbu inũ, ina tiribu inũ, ina isĩ teneaibu ẽ kẽwãti txi tapu anushũ mã ea menushũkubaĩkĩ: ‘Nũ hawa txakabuwamaki’, ikĩ shinãkubaĩkĩ mã ea sinatamamisbuki”, ẽ matu waiwẽ taeshunã, ha ina bekũbu inũ, ina tiribu inũ, ina isĩ teneaibu inãkuĩkĩ matũ yununika shanẽ ibubu anu bushũtãkãwẽ, mã hatu bushuã benimakirã matu mebĩkanimẽkainã? Haska betxipaisbumaki. 9Hau nukuwẽ nuinũ matubunã, menã hawaira Deus yukarikãwẽ. Hakia inabu atimapa sharabu mã hawa shinãma mã menushũmisrã: “Deusũ ea betxipaishũkĩ ewẽ nuishanikiki”, ikĩ manakĩ haska shinãyamakubaĩkãwẽ. Deus kushipa dasibi binuatũ eska matu yuikiki: 10“Matuwẽ ẽ hawa benimamaki. Inabu tesẽshũ txiwẽ mã ea menushũbia ana benimama ẽ danãkubaĩshanaiwẽ taeshũ ẽ kẽwãti txi tapu anu hanu mã hamẽ ana txi keti wayamashanũbũ eki nukuti Templo hemaĩtĩ mishki kenebaunibu hikiti shui beputi tibi tsuã mã beputirumẽkaĩ? iwanã, ẽ shinaiĩ. 11Yura shukuabu tibi matunabuma mai hirabi anu manibauna ewẽ datekĩ hanira hiwebaunabu anushũ ea kẽwãkĩ sheni inĩti ea inãkuĩkĩ kuakubaĩkĩ hawara pepa besti ea menushũriamisbuki. 12Hakia shinã txakakĩ: ‘Senhor Deus kẽwãti txi tapu inũ hanushũ hawara nũ menushũmis meribi wama Moisĩ yunuti hãtxa ana txibãma haska nũ akatsi ikai nũ atiruki’, ikĩ ea berabĩwãkĩ mã ea sinatamamisbuki. 13Hakia matũ ana yuikĩ: ‘Ha dasibi Deus nũ ashũmiswẽ taea bika tenekĩ nũ ma hatsãki’, ikĩ mã ea danãmaii. Ea haska wabiakĩ ea benimawatanũ ishũ inabu minama yumetsukirã inũ, ina awa tiribu inũ, ina betsa isĩ teneaibu ea inãnũ, iwanã, mã ea beshũkubainaii. 14Hawẽ txashuwã shukuabu anua txashuwã bene pepa hawa isĩ teneama mã tsuara haya ea yubabiaimashũ hakia txipu txashuwã txakabu beshũ ea inãkĩ matu menumakĩ ea matu parãmaibu ha huni txakabuwamanikarã, kupikĩ ẽ yupushanaii. Hanua betsarã, nawa shukua betsa betsapa ewẽ datekubaĩkanikiki, matu keskamarã. Shanẽ ibuhairatũ shanẽ ibu dasibi binu keyuarã, ẽ eaki. Ea paranũ, iwanã, hau shinãyamakubainũbũwẽ”, akĩ Senhor Deus kushipahaira dasibi binu keyuatũ haska matu yuikiki.
Currently Selected:
Malaquias 1: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.