Filemom 1
1
Paulõ Filemomkiri xinãnikiaki, na hãtxarã
1Ẽ Paulo Jesus Cristokiri kakape ẽ yusĩbaunai ea nemakĩ beshtenũ ishũ ea bitxikĩ akawanibu inũ nukũ betsa Timóteobetã mĩ nukube dayamis nukũ haibu pepa Filemoom, ẽ mia keneshũ bumaii, 2ha inũ, habu mibetã Jesus Cristo ikũwaĩbu mĩ hiwe anu itxamisbu anurã, nukũ pui Áfia inũ nukũ betsa Arquipo, nukubetã Jesus Cristokiri kakape yusĩkĩ bika tenemisbu anurã. 3Mã unãnuma hiwekubaĩshanũbũ haskatã ibubis mã hawa watirumabiakẽ Epa Deus inũ nukũ Shanẽ Ibu Jesus Cristo matuwẽ nuikĩ matu merabewakĩ hau matu duawakubainũbũwẽ.
Paulõ Filemom kẽwãkĩ Deus yukashũkubainikiaki, na hãtxarã
4-5Nukũ Shanẽ Ibu Jesus Cristo abukĩ ikũwãkĩ mĩ txibãkubainai inũ dasibi hawenabu meribiwẽ nuikĩ mĩ hatu duawamiskiri kakape nĩkatã benimakĩ hanu ẽ Deusbe hãtxaitiã mikiri xinãkĩ ẽ Deus ẽ mia kẽwãshũkubaĩmiski. 6Mia haska washũkinã, nũ haska Jesus Cristo ikũwãkĩ txibaĩ keska miãri haska xinãkĩ hawẽ pepawẽ Deusũ nuku dasibi duawamis mĩ nĩka pewanũ ẽ mia Deus yukashũkubaĩmiski. 7Jesus Cristowẽ ẽ betsaã, mĩ nuikipawẽ taea miwẽ taea benimai ẽ xinã txãkaiĩ, ikũwaĩbu Deusunabu meribi huĩti xinã txãkãwãkĩ mĩ hatu nuikipa wakubaĩmiswẽ taearã.
Paulõ Filemom hawẽ escravo dayaru Onésimo ea ashunikiaki, na hãtxarã
8Haskawẽ taeshũ ea ẽ Cristõ kuxipayabiatũ ẽ mia yunua ẽ yunua txibãkĩ mĩ atirubia 9haskakiri ẽ mia xinãma hakia nui nũ haibunameaiwẽ taeshũ ẽ mia ea akaii. Earã, ẽ ma mestebuaii. Haskabiakẽ Jesus Cristo ẽ dayashũkũkainaiwẽ taeshũ natiã ea bitxikĩ akawashũ ea meneshimabuki. 10Haskawẽ taeshũ mia daewakĩ mia anu Onésimo ẽ nitxiaiĩ, hau mia dayashũri kanunã. Nenu ea meneshimabu anu hiweshũ Onésimo Jesus Cristo ikũwãmakĩ ẽ xinã betsa wamaimawẽ taea mĩ dayaru escravo ẽ bake keskaki.
11Uatiã mĩ escravo daya txakabui mia anua pashabiaima ikis nukubetã Jesus Cristo ikũwaĩwẽ taea ana haskamaki. Nuku dabe merabewatiruki, nuku duawakinã. 12Onésimo ẽ abuhairai mia anu ẽ ana nitxiã kaikiki. Haki dakeama mĩ ea atiru xinãkĩ haska keska washãwẽ. 13Jesus Cristõ kakapekiri datã akĩ ẽ yusĩkubaũpanã bitxikĩ ea nemaimabu mĩ ea haska washũ merabewatirumakẽ miwẽ Onésimõ ea merabehairawakubaini yauxikĩ ẽ nitxĩkatsi ikamabia 14mĩ ekiri xinãkĩ yunuama ibianikẽ ẽ mia haskãwãtirumaki. Mĩ xinãnẽ mĩ ea yunu bestiai haska ea abukĩ mĩ ea amashũtiruki. 15Txanima uatiã haskatãra Onésimõ mia heneyubiranima natiã ana txĩtũkaina uatiã mĩ habe imis keskama ma mibetã ikũwaĩwẽ taea mĩ betsa kayabi keska ipakeshanikiki, 16ana mĩ dayaru keskama mĩ dayaru pepa binua mĩ abuai mĩ betsa kayabi keskarã. Eã ẽ abutxakayamabiaya miã abukĩ mĩ ea binumashanimẽkaĩ. Dayaru escravo besti hayama hakia dayaru binũa keskai mibetã Jesus ikũwaĩwẽ taea mĩ betsa keska mĩ hayashanaii.
17Haskawẽ taeshũ ebetã Jesus ikũwãkĩ mĩ ea haibuwaniki. Haska ekiri xinãkĩ mĩ ea duawai keska wakĩ ewẽ taeshũ Onésimo ana irishãwẽ. 18Mia haska wakĩ itxakawabiranimamẽkaĩ. Mia devematã pashaimamẽkaĩ. Haskarara ikiranimarã, ẽ petxiki netãwẽ, 19ẽ mia pakashanairã. Ẽ mia Jesus unãmaniwẽ taeshũ miãri mĩ ea devehairaki. Haskakiri ea xinãwẽ. Na mia keneshũkinã, ẽ mekẽ kayabiwẽ ẽ Paulõ ẽ mia ashuaiĩ. 20Ẽ betsaã, eskaki, xinãwẽ. Mĩ ebetã Cristo ikũwaĩnã, nukũ Shanẽ Ibu benimawanũ ika ana haki sinatama ewẽ nuikĩ Onésimo ea haska washũshãwẽ, ea huĩti xinã txãkãwãkinã, haska nũ Cristõ betsawẽ taearã.
21Ẽ hãtxa mĩ nĩkakĩ txibãmis unãkĩ ẽ mia keneshũ bumaii, haska ẽ mia ea akai binukĩ mĩ pepawashanai xinãkinã. 22Ha inũ, Deusbe hãtxakĩ mã ea yukashunaiwẽ taeshũ Deusũ hawawama hau hatu ea nitxĩmashanũ ikũwãkĩ ẽ manaii, dateamarã. Haska inũ, matu uĩ ka hanu ẽ iki kashanai anu ẽ ushati ea pewashũshãwẽ.
23Jesus Cristo ikũwaĩ atxishũ ebe Epafras meneshabu hawẽ hãtxari mia bumaikiki. 24Marcos inũ, Aristarco inũ, Demas inũ, Lucasĩ ea merabewai dayamisbũ habiaskari xinãkĩ hatũ hãtxa mia bumariakanikiki.
25Nukũ Shanẽ Ibu Jesus Cristõ hawẽ pepawẽ hau matu duawakubainũwẽ.
Hatiski, ẽ hãtxarã.
Paulo
Currently Selected:
Filemom 1: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
