2 Coríntios 1
1
Paulõ hatukiri xinãnikiaki, na hãtxarã
1Ẽ Paulo Jesus Cristõ kuxipayawakĩ Deusũ hawẽ xinãnẽ ea katunikẽ nukubetã ikũwaĩ nukũ betsa Timóteobetã ẽ Paulõ ẽ ana matu kene bumaii. Deusunabu Corinto mae ewapa anushũ mã ikũwaĩbu inũ dasibi nukubetã Jesus txibaĩbu Acaia mai pakea anu manibaunabu ẽ matu kene bumai uĩrashãkãwẽ, haska mã unãnumamẽkainã. 2Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ duawakubainũbũwẽ.
Ikũwaĩbu betsabu bika tenei huĩti nixmabu hatuwẽ nuitikiaki, na hãtxarã
3Nukũ Shanẽ Ibu Jesus Cristõ Epa Deus, habias nukũ Epari nukuwẽ nuikĩ nukũ huĩti punu nukai tsiũ ikai nuku daewakĩ benimawakubaĩmisrã, kẽhairawakubainãkãwẽ. 4Hamapai tibi mei nũ bika teneaya Deusũ nuku daewakĩ nuku benimawamiski. Nuku haska wamiswẽ taeshũ Jesus Cristo ikũwaĩ betsabu hawara mei bika tenei huĩti nixmaibu Deusũ ma nuku merabewamiskẽ hatuwẽri nuikĩ nũ hatu benimawariatirubuki. 5Haskakẽ haska Cristo bikahaira hiwekĩ tenekubaini keska nũ hawenaburi hawẽ taea dayariai bikabiakẽ nũ hiweaburã, tsuabura habũri ikũwaĩ dayashũkĩ teneriaibu Cristo hau hatuwẽri nuinũ habu huĩti nixmabu binumakĩ hatu benimawakĩ xinã txãkãwãkubainãkãwẽ. 6Ea inũ Timóteo hamapaiwẽ nuku bika tenemaibũ nukuwẽ taea nukukiri xinãtxakai mã huĩti nixmama mã Jesus Cristo ikũwanũbũ nũ tenekubainaii. Ha inũ, Deus nukuwẽ nuikĩ nukũ huĩti tsiũ ika nixmabiakẽ nuku benimawamisshũ haska maturi memaibu merabewati xara nũ tenemiski. Haskakẽ hawa dateama habiaskari maturi akaibu mã teneriairã, hawẽ kuxipakubaĩkãwẽ, maemairã. 7Haska inũ, nũ imis keskai bika hiwekĩ mã teneaibũ haska merabewai nukuwẽ nuikĩ nukũ huĩti nixma Cristõ nuku benimawamis keska wakĩ habiari matuwẽ nuikĩ matũ huĩti nixma benimawashanai matukiri dateama nũ manakubainaii.
8Ẽ betsabu inũ ẽ puibuũ, eska Ásia mae pakea namakis anushũ nũ hatu yusĩaĩwẽ taeshũ haska bikahaira nuku hiwemaibu nũ tenekubaĩyama matuki ana txaninũ nĩkakãwẽ. Hawara bika nukũmebi haska nũ tenetiruma inũ nũ binutiruma hamapai txakabu tibi tenei nukũ hiwea ma benua keska 9xinaĩ: “Natiã daki nuku ma tenãkanikiki”, ikĩ hawara nukũmebi nũ atiruma ibubis nũ xinãbiaya Deusũ nuku yusĩkĩ haska hatũ mawabu bestẽwãshanaitũ nukũ hamapai tibi nuku ashũtiru nũ ikũwãtirubu Deusũ nuku haska binumakubaĩyamaki. 10Ha inũ, nũ mawapanã haska Deusũ nuku mekeyama keska wakĩ nuku ashũkubaĩshanai hawa dateama ikũwãkĩ nũ manakubainaii. 11Nũ haskamiskẽ nukukiri xinãkĩ merabewakĩ Deusbe hãtxakĩ nuku yukashũkubaĩkãwẽ. Itxapabũ mã nukukiri Deus yukakubainaibũ Deusũ nuku mekekĩ duawaya itxapabũri nukukiri nĩkakĩ Deus kẽhairawatiruburiki.
Hawawẽ haskatima hawẽ yuba betsa Paulõ hatu banabimanikiaki, na hãtxarã
12Hamẽ nukukirirã, haska yurabũ Deus unãbumã xinaĩ kẽmis keskama hakia Deusũ nuku xinã betsa wamatã huĩti pepa nuku waniwẽ taeshũ haska Deusũ abumis nuku xinãmaya tsua parãma duapa bestikũkaini matuwẽ nuihairai nũ kẽkũkainaii, matuwẽ taea txanima benimairã. 13Matu kene bumakinã, hãtxa huneawẽ matu keneshunama hãtxa shabakabi mã uĩkĩ pe nĩkatirubu besti nũ matu keneshũkubaĩmiski. Ana mã nĩkakĩ pehairawakẽ eãri matu nĩkai ẽ benimashanaii. 14Nukukiri mã nĩka beshmas waii. Hakia nukũ Shanẽ Ibu Jesus ana huaya mã pepaibu matuwẽ keĩ nũ benimaya nũ matu yusĩ pewamiswẽ taea inũ nukuwẽri taea benimakĩ mã nuku kẽwãriashanai ẽ manakubainaii.
15Haskawẽ taea matuki txiti ikĩ haska ẽ xinaiĩ. Haska matu anu kashũ matu uĩkatsis ikĩ ha dukũ ẽ xinaĩma keska dabeki matuki bai kai 16Macedônia mai pakea anu hiweabu dukũ uĩatãbaini hanua matuki bakĩ matu benimawatã hanua txĩtũkirani hui matuki ana bakĩ ana ẽ matu benimawaya hanua Judéia mai pakea anu hiweabu anu ẽ kaya matũri mã ea merabewatiru xinaĩ: “Ẽ matuki bai kashanaii”, matu watã ẽ haska matu keneshunimaki. 17Matu anu bai kanũ ika txanima ẽ yubakaimaki. Haskawẽ taea ẽ xinã dabewaisma mã ekiri xinãtirumaki. 18Ẽ xinã betsa betsapa ẽ maewama Deusũ unaĩkiki. Haskawẽ taeshũ mã nuku ana ha atirubumaki. 19Ea inũ Timóteo inũ Silvanonã, Deusũ bake Jesus Cristokiri besti nũ matu yusĩmiski. Hawẽ bake Jesus Cristokiri yubakai hãtxani Deusũ betsa waisma haska menenishũ betsa wama akubaĩmiski. 20Ha inũ, Deus yubakani hawẽ bakewẽ dasibi shabakabi kaka kaĩmaniki. Haskakẽ yurabũ Deus kẽwãyã habũ hãtxa abukĩ Cristõ kuxipawẽ yuikĩ: “Hãtxa txanimaki. Habiaskaki”, ikĩ nũ kẽwãmisbuki. 21-22Haska inũ, nuku dasibibũ Cristo nũ txibaĩburã, hawẽ kuxipawẽ Deusũ Yushĩ Pepawẽ unãti xarawatã hawenabu benutimawakĩ nuku ibuwaniki. Haska wanishũ nuku heneama duawapakeshanai mestẽwaĩ Deus yubakaniki. 23Haskakẽ matu dake tenemakatsi ikama haskai mã Corinto anuabu ẽ kariama hau nukũ Epa Deusũ matu shabakabi unãmanũwẽ, ẽ txanitxakama ea unaĩkikirã. 24Ha inũ, nukũ Jesuskiri nũ matu ikũwãmamisrã, nukurã, nũ ibumaki. Jesus ikũwaĩ ibubis matũ xinã ewai mestẽtã kuxipai mã benimakubainũbũ matu merabe bestiwai nũ matu dayashũkũkaĩmiski.
Currently Selected:
2 Coríntios 1: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
