2 Coríntios 2

1-4Haska matukiri xinãkĩ matũ huĩti punu nukawakĩ tsiũ akatsi ikama haska ẽ matuwẽ nuihairai mã ea unãnũbũ, iwanã, matu xinãkĩ kashabetanã matu merabewanũ, iwanã, ẽ matu kene bumaimaki. Matu anu hikituxitã tsuabura ẽ matu huĩti punu nukawakĩ tsiũ akaya tsuã eari benimawatirumaki, ẽ matu punu nukawatuxikenã. Hanua mã ma pewaxĩkẽ ea benimawaya maturi ewẽ mã benimashanaii. Haskakẽ natiã matu anu ẽ kakatsi iyuamaki.

Hunĩ ikũwãbiai txakabuwayama ana has xinãma hakimawatikiaki, na hãtxarã

5Ha hunĩ kanekĩ ea punu nukawakĩ ea besti akama matu dasibiburi akima ikũ mã unaiĩ. 6-8Na besti ẽ matu yuiai nĩkakãwẽ. Hawẽ txakabuwẽ taeshũ mã ha tashnimaima matube ana itxatiruma tenehairakubaĩkĩ hatishũ mã bika tenemaima henetã ikũwaĩ hau heneyamanũ matu mã hawẽ nuiai hau unãnũ ana itã beyawakĩ daewarikãwẽ. Hakiri hawẽ txakabu ana xinãma hakimawakĩ maturi hakimarikãwẽ. 9Haska inũ, ẽ matuki txiti itã haska ẽ matu yusĩkubaĩmis ha txibãkĩ mã amis unãnũ, iwanã, matu keneshũri bumakĩ hakiri ẽ matu haska yunuimaki. 10-11Haska Satanásã nuku parãkatsis ikai nũ unãhairaya hau nuku txakabũ maemayamanũ hawara ha hunĩ akubaĩyama hakimakĩ hari hakimawatã mã ana xinãbumakẽ matũ xinã pe unãkĩ eari hakimai ẽ ana xinãmariki. Merabewakĩ ẽ matu kuxipa wakatsi ikaii. Cristõ ẽ xinã ea bebũshũ unãyã hawara txakabu mã hakimaimakẽ eãri ha hunĩ txakabuwayama ẽ ana haska hakiri xinãtirumariki.

Deusũ Cristoki nuku dasiwatã hamapai bika nuku binumamiskiaki, na hãtxarã

12Ha inũ, Deusũ kakape Cristokiri datã akĩ yusĩkatsis iki Trôade mae ewapa anu ẽ hikiaya yura itxapabu Deusũ ea nĩkamaya tsuabũra ea nemamabiakẽ 13Cristowẽ taea ẽ betsa Titoki ẽ nukuriama inũ matukiria hawa bana nĩkariama ẽ huĩti punu nuka kayashũ hatu yuikĩ: “Ẽ ma kaii”, itã Macedônia mai pakea anu Tito benai ẽ kaĩkainimaki.

14Hakia Cristoki nũ dasia nũ hawenabukẽ hamapai bika Deusũ nuku habetã binumakubaĩmiski. Ha inũ, nukuwẽ hawẽ kakape yurabu Cristokiri mae tibi anua yusĩmakĩ nuku hatu unãmamiski. Nukuburã, nũ nis hawẽrua keskabuki. Haskawẽ taeshũ Epa Deus kẽwanãkãwẽ. 15Ha inũ, hawẽ Epa benimawakĩ Cristõ hawẽ hiwea sheni ininipa keska inãkubaini haska keska yusĩkĩ Epa Deus benimawakĩ yurabu anu nũ bumiski, Cristokiri yurabu dasibi, betsabũ Cristo ikũwaĩbu inũ betsabũ nĩkabiakĩ ikũwãbuma benushanaibu anurã. 16Haska xinaĩbutunarã, nukũ yusĩanã, ikũwãbumã nuku nĩkamarã, atimapa yura mawa pisi mayai keska shetekĩ aka wakanikiki, nuku danãkinã. Hakia dasibibũ nukũ yusĩa nĩkakĩ Cristo ikũwãkĩ nukũ yusĩa ininipa keska abukĩ benukatsi ikama haska niti ikama Deusbe hiwekuĩshanaibu bikubaĩkanikiki. Hakia Cristokiri shabakabi yusĩa mesekenã, tsuabũra nũ xinã txakai, ha hiweakirirã? 17Haska xinãbuma yusĩnã betsabu Deusũ hãtxaki meseama kemukĩ pei besti binũ, iwanã, bukubaũkĩ yusĩmis keskama nukuburã, Deusũ nuku yunukĩ hawẽ kuxipa nuku inãkẽ matu parãma hãtxa txanima nũ matu yusĩayã hawẽ hãtxawẽ taea nũ Cristoki dasiabũ txanima Deusũ nuku pe uĩayã Jesus Cristokiri nũ yusĩkubaĩmiski.

Currently Selected:

2 Coríntios 2: cbsBR

Highlight

Copy

Compare