1 Coríntios 16
16
Haska watã Jerusalém anua ikũwaĩbu Paulõ hatu merabewakatsi inikiaki, na hãtxarã
1Yunuti betsa matu yuinũ nĩkakãwẽ. Jesus ikũwaĩbu Jerusalém anuabu nuitapakanikiaki. Nũ hatu merabewanũbũ haska ikũwaĩbu Galácia anuabu ẽ hatu yunuyama keska wakĩ ẽ maturi yuiai nĩkakãwẽ. 2Matu anu ẽ kariama ea manama domingo tibi matũ dayawẽ mã pei biai itxapa mã biaitũ pei itxapa aruaya eskarabes mã biaitũ pei eskarabes arukĩ ea manakãwẽ. Mã ma itxawaxĩkẽ 3hanua ẽ kai hikiaya pei mã itxawaxina Jerusalém anu mã bumakatsis ikĩ huni betsabu katutã ẽ kene hatu bumashanaiyabi ha merabewati pei mã itxawaxina hatu inaĩ butirubuki. 4Hamẽ ẽ haska xinaĩnã, ea dikabi ẽ kayarã, habu ebe butirubuki.
5Nenua kaĩkainirã, Macedônia mai pakea anu kakũkaini hanua atimas Corinto anu ẽ matu anu hikishanaii. 6-7Matu anu kabia ẽ hĩ hĩ ikaĩkatsi ikamaki. Hamẽ nukũ Shanẽ Ibũ ea nemama ushe dabe kasmai ui debuaya matube hiwekatsi iki hawaira ẽ kakatsi ikamaki. Hanushũ ea duawakĩ ea merabewakĩ harakirira ẽ kaya mã ea nitxĩkĩ pewatirubuki.
8Ha Pentecostes habiatiãri ikũwaĩbu itxabuki Yushĩ Pepa hatuki butuni besiaibutiã ushe junho keyuaya nenu Éfeso anu ẽ habianu baxikushũ hatu uĩyuaii. 9Éfeso anushũ Jesuskiri kakape yuii ẽ dayai itxapabũ ea nemai eki sinatabiaibũ Deusũ hãtxa betsabu ẽ yusĩkubainaya itxapabũri ea nĩkakanikiki.
10Nukũ betsa Timóteo matu anu hatiara kaya nukũ Shanẽ Ibũ daya ẽ ashũmis keskari akaiwẽ taeshũ hikiai ishũ duawashãkãwẽ. 11Matubũ tsuãra danãma duawakĩ hamapai tibi bikatsis ikai merabewakĩ inãtã benimawakĩ unãnuma hau eanu hunũ nitxĩshãkãwẽ, nenushũ ikũwaĩ betsabubetã hatubetã ẽ manairã.
12Ea kene bemakĩ Apolokiri mã ea yukaima matu yuinũ nĩkakãwẽ. Ẽ yunubiakubaina natiã matu anu kayutirumakiaki. Hanu hatiara hawẽ xinãnẽ kashanikikirã.
Hatũ hãtxa hatu bumanibukiaki, na hãtxarã
13Kuxipai hawaki teama Jesus txibaĩ txĩtuãma hamapai txakabu danaĩ mestẽnepakubaĩkãwẽ, niti ikamarã. 14Hamapai tibi mã akairã, yura betsabuwẽ nuikĩ hatu duawakĩ ashũkubaĩkãwẽ.
15Ẽ betsabu inũ ẽ puibuũ, Acaia mai pakea anushũ Estéfanas inũ habe hiweabũ habu dukũtũ Jesus ikũwãkĩ taewanibũ ikũwaĩbu dasibiwẽ nuikĩ hatu merabewakubaĩmisbu mã unaiĩ. 16Habu keska nĩkakĩ ikũwaĩbu betsabũ nukũ Shanẽ Ibu Jesuskiri kakape dayamisbu hatu nĩkariakĩ dasibi hatu merabewakubaĩkãwẽ.
17Mã txai hiwekẽ matumaki Estéfanas inũ, Fortunato inũ, Acaico ea anu bexĩshũ hawara mã ea ashũtiruma ea ashuaĩbuwẽ taea ẽ benimahairaii. 18Habũ mã ea ashũtiru keska wakĩ ea anu bexĩshũ ẽ huĩti xinã txãkãwãkĩ ea benimawakanikiki. Ikũwaĩ betsabu haska keskabu duawariakubaĩshãkãwẽ.
Hawẽ kene Paulõ keyunikiaki, na hãtxarã
19Ikũwaĩbu Ásia mai pakea anushũ matukiri pe xinãkĩ habũ hãtxa matu yunukanikiki. Ha inũ, Áqüila inũ Prisca inũ dasibibu hatũ hiwe anu itxamisbũ matukiri pe xinãriakĩ habũri hatũ hãtxa matu yunukanikiki. 20Nenushũ ikũwaĩ dasibibũ habũ hãtxa matu yunuriakanikiki. Ikũwaĩ betsaki nukutã hatube benimai yuka iki ikukunãkubaĩkãwẽ.
21Kenekĩ keyukĩ ẽ tsumapã ana ea ashũama ẽ Paulõ emebi ẽ matu kene keyushunaii.
22Tsuabũra nukũ Shanẽ Ibu abuamarã, hau Deusũ yupunũwẽ.
Nukũ Shanẽ Ibu nũ manai hawaira hau ana menã hurinũwẽ.
23Nukũ Shanẽ Ibu Jesusũ hau hawẽ pepawẽ matu duawakubainũwẽ. 24Matubetã ẽ Jesus Cristo ikũwaĩwẽ taea matu xinaĩ ẽ matuwẽ nuikũkainaii.
Hatiski, ẽ hãtxarã.
Paulo
Currently Selected:
1 Coríntios 16: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
