1 Coríntios 15
15
Jesus mawaxina Deusũ bestẽwã uĩnibukiri yusĩnikiaki, na hãtxarã
1-2Ẽ betsabu inũ ẽ puibuũ, Deusũ kakape Jesuskiri ẽ matu yusĩayã nĩkakĩ xinãtxakayamakĩ unãshubira abukĩ Jesus mã ikũwãnishũ txibãkĩ xinãkubaini txĩtuãma mã kuxipakũkainaya ha kakapewẽ Deusũ matu mekeawẽ taea mestẽtã mã hamẽ ikũwãma ini unãkĩ matu ana yuinũ nĩkairakãwẽ. 3Haska dukũ eã unãkĩ tapĩnishũ ẽ matu yusĩtanirã, eskaki, nĩkairakãwẽ. Haska Deusũ hãtxa yuishunikabũ kene tibiwẽ yuini keskai yusĩkĩ: “Nukũ txakabu buanũ ika Messias Cristo mawashanikiki”, inibu haska kenenibu meneni keska nũ matu yusĩkubaĩtaniki. 4Ha inũ, Jesus mawa maiwabu shaba dabe inũ besti kaya Deusũ bestẽwanikiaki, haska bebũkiri Deusũ hãtxa yuishunikabũ hakiri kenenibu keskariairã. 5Haska waxinabu hanua Simão Pedro, hawẽ kena betsa Cefasrã, haki dukũ Jesus tashnitã uĩmatã hanua hawẽ kuxipaya 12 hunibu haburi uĩmarianikiaki. 6-7Hanuari hawẽ betsa Tiago hakiri nukutã Jesusũ kuxipaya betsaburi habukiri nukutã hatu uĩmaxĩkẽ hanua habũ txibãkĩ ikũwãmisbu mirimahaira 500 binuabutikiri Jesus hatuki nukutã uĩmarianikiaki. Hatiri ma debua inũ itxapa hiweriayuabuki.
8-9Hanushũ Jesus ikũwaĩbu itxakawakĩ ẽ hatu mesewakĩ itimaska wakubainaiwẽ taea ẽ atimapa txakabubia Damascokiri ẽ kaya hawẽ henei eki nukui Jesus tashnitã ea uĩmarianiki. Ẽ bake atimapa kaĩyã kaũma hiwemis keska ẽ ikaya hawẽ kuxipaya betsa tsuabũra ea kenatirumabiakẽ ẽ hawẽ tsuma betsabu kuxipaya keska Jesusũ ea wani hatu keskabia ẽ xinãnã, ẽ beshmaski. 10Earã, txanima ẽ hawẽ tsuma kuxipaya betsaki. Haska ea wakatsi Deusũ ea duawakĩ ea katunishũ hamẽ ea katuama hawẽ daya akĩ Jesusũ kuxipaya betsa dasibibu ẽ hatu binumakubainaii. Hakia emebi dayama Deusũ ea duawakĩ ea merabewaya ẽ dayashũkũkainaii. 11Nũ tsuabura Jesusũ kuxipaya betsabu inũ ea nuku dasibibũ Deusũ Jesuskiri kakape nũ matu yusĩkubainaya ea kasmai huni betsabu matuki txaniaibũ mã Jesus ikũwãkĩ taewaniki.
Jesus bestẽwani keska wakĩ ikũwaĩbu mawakubainaibu Deusũ hatu bestẽwãriashanikiaki, na hãtxarã
12Hamẽ betsarã, Cristo mawaxina Deusũ bestẽwanikiri nũ matu yusĩbiamiskẽ haskakĩ: “Mawabũ yura ana besteãma ishanikiki”, iwanã, hatiritũ xinãkĩ Corinto anushũ yuimisbumẽ? Mã haska xinaĩbu matu ana yusĩnũ nĩkairakãwẽ. 13Mawabu hawẽ yura ana besteãma ishanaibunã, Cristorã, hawẽ yura ana besteãma iniraka, mã xinaĩ? 14Deusũ Cristõ yura ana bestẽwãma inikenã, haska Cristokiri hawẽ kakape nũ yusĩmisrã, hawama inũ mã Jesus txibaĩnã, matũ xinãwẽ mã ikũwaĩnã, hawamari ikeanaii. 15Ha inũ, Deusũ Cristõ yura bestẽwani nũ hawẽ kuxipayabũ matu yusĩkĩ mawabu hatũ yura ana besteãbuma ibiashanaya hamẽ matuki txani nukũ hãtxawẽ matu paraĩ nũ txanitxaka bestikũkaĩkeanaii, Deus haska yubakabianikẽ nukũmebi hawẽ hãtxa betsa wakĩ Deus danãmairã. 16Mawabũ habũ yura besteãma ishanaya Cristori Deusũ bestẽwãma iriakeaniki. 17Haska inũ, Cristo besteãma inikẽ mã Cristo ikũwaĩ hawamawẽ taeshũ matũ txakabu tsuã buama mã habiaskas hiwekeãkanaii, hawa kuxipa hayamawẽ taearã. 18Haska inũ, Cristo besteãma inikẽ Cristo ikũwaĩbu hamẽ mawatã benukeãkanaii. 19Ha inũ, na hiweawẽ besti Cristo ikũwãkĩ nũ manakaiburã, nũ nuitapatxakayamakeanaii, haska betsabũ nuku danãkĩ nukukiri xinãtiruburã.
20Hãtxa txanima matu yuinũ nĩkairakãwẽ. Cristo mawaxina ha dukũ Deusũ bestẽwaniwẽ taea yuraburi mawakubainaibu hawẽ taeari besteĩ keyushãkanikiki. 21Adãonẽ txakabuwakĩ yurabu dasibi mawati baiwashuniki. Haska keskariwakĩ Cristo mawa ana bestẽnishũ habiawẽri taea yurabu dasibi mawa bestẽshãkanikiki. 22Adão ini keskariai yurabu dasibi mawashãkanikiki. Hakia Cristo bestẽtã ana hiwenikẽ haska keskariai yurabu ikũwaĩ ana bestẽtã hiweriashãkanikiki. 23Hanua Cristo hawẽ yura Deusũ bestẽwanikẽ ha habũ ikũwaĩbu hawenabu mawabu haska Cristo ini keskai ana Cristo huaya dasibi hatũ yura Deusũ bestẽwãkĩri keyushanikiki. 24-26Hanua dasibi pewakĩ keyunũ ika Cristo Shanẽ Ibuhaira hushũ dasibi hatũ kuxipa tibi hatu mebĩkĩ shanẽ ibu betsabu mitanumabu wakĩ dasibi yununika kuxipabu yamawakĩ dasibi yushĩ yamawakĩ dasibi hawẽ haibuaibuma maemakĩ yamawakĩ keyutã atimas hawẽ yurabu mawamis keyu maematã Cristo ana Shanẽ Ibuama henetã Epa Deus besti yunua ha bestitũ dasibi mekei Shanẽ Ibushanikiki. 27-28Dasibi Deusũ damiwani Cristõ hatu maemamakĩ keyutã haska habe yubakai yuinameni hawẽ Epa Deuski shanẽ ibuama Epa Deusũ ha damiwani mekekubaĩmisshũ yunua Cristõ hatu maemakĩ binumatã dasibi betsa betsapa habetã damiwani Epa Deusũ mekekĩ dasibibu binui ha besti shanẽ ibuhairashanikiki, Epa Deusrã.
29Haska inũ, betsarã, ẽ haska matu yusĩsmabiakẽ yurabũ ikũwaĩ naxiriama debuabu hatiri yura betsabũ merabewanũ ika naxishũmisbuki. Mawabu Deusũ ana bestẽwãma ibiashanaya, haskai ha yura mawa mã hatu naxishũmisbumẽ, ana bestẽshanai mã ikũwãmabiarã? 30Haskabiakẽ Deusũ kakape nũ yusĩayã txakabu mese tenei nũ ikũkainaya mawa nũ ana besteãma ibiashanaya, haskakĩ hiwea bika bari tibi nũ tenekubaĩkanai? 31Ẽ betsabu inũ ẽ puibuũ, nukũ Shanẽ Ibu Jesus Cristo mã ikũwãyã txanima benimahairakĩ hãtxa kayabi matu yui: “Bari tibi ẽ mawakeãkũkainaii”, ika ẽ txanitxakamaki, haska ẽ ikũkainairã. 32Nũ ana besteãma ishanaya ẽ hamẽ hiweawẽ taea Éfeso anua pubẽhairabube hatube ha iki ẽ xinãnẽ besti ẽ hawa maemama ini mã xinaĩ? Txanima mawabu nũ ana besteãma ishanayarã, haska yurabũ ikũwãbuma hãtxai: “Beyus bestikĩ pinãkãwẽ, vinho anãkãwẽ, mexukiri mawatã nũ hawa piama ana beyusama ishanairã”, ikaibũ nũ habiaskari xinãriakeanaii. 33Haska xinãbiakubainaibũ hãtxa kayabi matu yuinũ nĩkairakãwẽ. Hau matu parãyamanũbũ tsuabũra nukũ yusĩa danãkĩ mã beya pepa txibãbiaya hamakiri xinãmakĩ matu txakabuwamakĩ henemakatsis ikaibu ana hatube haibunameyamakãwẽ. 34Matu dakewanũ, iwanã, na haska ẽ matu yuaii. Yurabu Deusũ bestẽwãshanai betsabũ ikũwãma kanekanikiki. Matubu niti itã hatũ hãtxa ana nĩkai txakabuwama matũ xinã bestẽwãtã pe besti Deuskiri xinãkubaĩkãwẽ.
Yura mawakubainaibu besteĩ haskashanaibukiri Paulõ hatu yusĩnikiaki, na hãtxarã
35Hamẽ tsuara yuka iki: “Haskara ishãkanimẽkaĩ, yura mawabu Deusũ bestẽwanã?” iki: “Hatũ yurarã, haskara hayashãkanimẽkaĩ?” ikĩ nuku yukamisbuki. 36Haska mã yuka ikairã, hawa unãmabia mã ikaii. Heshe banakiri yusĩkĩ haska nukũ yura bestẽshanai ẽ matu nĩkamatiruki. Eskaki, nĩkairakãwẽ. Yunu heshe bana hawẽ bimi txapuaya hawẽ heshe peshei hukuĩ betsai ana hiwemiski. 37Hanua shekiwã heshe bana hukuĩ hawẽ hi dami beneama hakia hawara heshe tibirã, shekiwã keskarã, hawẽ bimi damimisbuki. 38Heshe tibi Deusũ haska benemanishũ haska tibi betsa wama yumewamiski.
39Ha inũ, yura dasibirã, betsa tibi haskas nami hayamaki, huni kuĩ nami inũ, yuinaka nami inũ, peiyabu nami inũ, baka namirã. 40Haska keskari nai anua inũ mai anua yura haska keska dabes wama iniki. Ha inũ, yura besu naiuria hawẽrua wakĩ mai anuari yura besu hawẽrua betsa warianiki. 41Haska inũ, bari inũ ushẽ txasharã, haskasmaki. Ha dikabi bixi dasibi haskas txashamariki. Betsa txashahaira inũ betsa beshmas txashaya Deusũ dasibi txashamamiski.
42Nukũ yura bestẽwãkĩ betsa washanairã, habiaskari tibi nuku washanikiki. Mawa maiwabu yura txapumiski. Hamẽ bestẽwãkĩ yura bena txapuisma nuku tibi inãshanikiki, Deusunã. 43Mawabu hawẽ nami abuama maiwakĩ putabiabu hanua hawẽ yura ana besteaĩtiã yura bena txapuisma bi bestẽshãkanikiki. Yura mawa nami babu maiwabiabu Deusũ txipu bestẽwã hawẽ kuxipa inã hayashanikiki. 44Yura kayabi himia mawa maiwabu ha yura besteĩnã, Yushĩ Pepaya nũ bestẽshanaii. Yura kayabi nũ ma hayakẽ yura bena hawẽ Yushĩ Pepatũ hiwemaya nũ hayashanaii.
45Deusũ yunua Moisés kenekĩ: “Huni wakĩ taewakĩ Adão damiwatã Deusũ hiwemaniki”, aniki, Moisésnã. Hamẽ Cristõ yura Adão keskari bia nuku mawashũkĩ hiwekuĩa Deusbe niti ikama hawẽ Yushĩwẽ hiweti nuku washuniki. 46Nuku damiwakĩ taewakinã, ha dukũ yura kayabi Deusũ nuku waniki. Ha katxu Deusũ nuku bestẽwãyã hawẽ Yushĩ Pepatũ yura bena nuku inãshanikiki. 47Ha dukũ huni Adão wakĩ Deusũ mai mixpu bishũ hawẽ yura damiwanikiaki. Hamẽ yura Cristorã, nai anua hui huni kuĩ yura bitã kainiki. 48Mai mixpu bishũ damiwakĩ Adãonẽ yura wani habias nukũ yura mai mixpukẽ ha yura nũ mawabu txapui keyui nukũ yura ana hawẽri mai mixpu besti ishanikiki. Hamẽ Cristo nai anua huni habiauriri kani keskai nukuri nai anu habe hiwei kai nukũ yura Yushĩ Pepatũ kuxipa haya yura benaya nũ hiwekuĩshanaii, niti ikamarã. 49Ha dukũ mai anu hiwea Adão damiwani hawẽ yura keska nũ hiwea Deusũ nuku bestẽwãkĩ nuku betsa wa Cristõ yura keska nũ ishanaii. 50Ẽ betsabu inũ ẽ puibuũ, ana matu yusĩkubainũ nĩkairakãwẽ. Nukũ yura kayabi txapumiswẽ taea hiwekuĩ niti ikama nũ hawẽ itirumawẽ taea habias yura kuĩ nai anu Deusbe hiwetirumaki.
51Yubakatã Deusũ hawẽ hãtxa huneni matu shabakabi yuinũ eskaki, nĩkakãwẽ. Jesus nũ ikũwaĩburã, mawaira hatira nũ mawama ishãkanaii. Jesus ana huaya nuku tibi betsa washanikiki, yura bena betsa nuku wakinã. 52-53Bari hawẽ henei keyuaitiã hawaira nũ betsupe imis keskai Jesus Cristo huaya Deusũ nai tsumã trombeta txaã akaya mawabu Deusũ bestẽwãyã yura kayabi txapumistũ hawara txapuisma bikĩ yura bena ana mawatiruma biaya nuku nũ hiweyuabu nuku dasibi dami wakĩ betsa wariashanikiki. 54Haskai kaikiri Deus yuishunika Isaíasĩ kenekĩ: “Ana tsua mawama iki kai Messiasĩ mawa maemashanikiki”, ini shabakabi txanima ani nũ unaiĩ. 55Deusũ hãtxa yuishunika betsa Oséiasĩri kenekĩ: “Deusbe hiwea niti ikamarã, nũ mawamawẽ taea nũ ana hawa tenetiruma ishanaii”, ini mã nĩkariatiruki. 56Eskaki, matu yuinũ nĩkairakãwẽ. Txakabukũkaini txakabuwẽ mawai nũ datemiski. Haska inũ, dasibi Deusũ nemati inũ hawẽ yunuti Moisés kenemani nũ txibãtirumawẽ taea xinã txakabũ nuku atxishũ nuku txakabuwamakubaĩmiski. 57Haska binumakĩ nukũ Shanẽ Ibu Jesus Cristo nuku mawashũkĩ nukũ txakabu buanikẽ mawai nũ hawa ana dateama ishanaiwẽ taea Deus kẽwãkubainãkãwẽ, benimawakinã.
58Haskakẽ ẽ betsabu inũ ẽ puibuũ, hawara nukũ Shanẽ Ibũ matu yunua heneama akĩ mã hamẽ dayama mã unaĩwẽ taea Jesus txibaĩ txĩtuãma xinã betsa wama nukũ Shanẽ Ibuki shukua pehaira dayakĩ apakekãwẽ.
Currently Selected:
1 Coríntios 15: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
