San Mateo 4
4
1Pa lhechesh pa yicha'jey pa Espíritu ja Jesús ja cotsjaat ampapu ca nôv'e' pa jaspa yic'alhtana pa tsich'e'.#4.1 He 2.18; 4.15.
2Cuarenta pava nalhus, cuarenta shta pava tulhis ti ninatsaccun, pa lhechesh pa yiyipcun. 3Pa yamey pa tsich'e' ja Jesús pa yic'alhtana pa yit'esha:
—Ca yijô'taja ca a Dios Lhaôstaja, pa ayôjaa nava utes ca yucuveeesh.
4Taj ti yit'esh ja Jesús ti yicuulh:
—Yit'esh nava Chiyi'sesh'e: ‘Nive'lhaa pa vatôc ca nimônlhanit pa nivacle, vooy shta lhacôm'a cava lhclishay ja Dios ti yit'esh.’#44.4 Dt 8.3.
5Pa lhechesh pa yicha'jey pa tsich'e' ja Jesús ja Jerusalén, jan lhanquey Is yitsaat, pa yicha'jey lhôtôj ja uj vatishjanjavat 6pa yit'esha:
—Ca yijô'taja ti Lhôs'ash pa Dios pa avatcôtjata cotsjaat; lhayaash ti yit'esh nava Vani'sesh'e:
‘Yiyôjaa jayu ja Dios japi lh'ángeles
jaspa vanujumatsen'ash jayu.
Japi lhech natcumesh'ajulh jayu java lhpôcôtôy,
jaspa tanca nivoomtan nava afoc nava utes.’#4.6 Sal 91.11-12.
7Pa yicuulh ja Jesús pa yit'esh:
—Yit'esh shta nava Vani'sesh'e:
‘Ya aj ca ac'alhtaneshem pa ja Anvacle Dios.’#4.7 Dt 6.16.
8Pa ve'lheesh yicha'jey shta pa tsich'e' lhpa yaashchisham utiyuc ja Jesús, pa nôclitem lhacôm'a pa lhavtsateyish yie' na cotsjaat shi' pa lh'acôjiyashiin; 9pa yit'esha:
—Jajut'ay jayu lhacôm'a navôque ca u'tajsha'ne acjatsuy ca aalhtajyi.
10Pa lhechesh pa yit'esha ja Jesús:
—Ay'e, Satanás, lhayaash ti yit'esh nava Vani'sesh'e: ‘Oclôjey ja Anvacle Dios, pa ve'lhaa lhavaatsha ca acu'mem'in.’*xu*
11Pa lhechesh pa tayjop pa tsich'e' ja Jesús, pa nam papi ángeles pa t'acumem'in. #4.10 Dt 6.13.
Pa Jesús tôlhesh'e pa lhcumjayash yiey pa Galilea
(Mr 1.14-15; Lc 4.14-15)
12Meelh ti tpeeycheyish ja Jesús ja Juan ti chiychajey lhja vatvanc'ôcfajayte, pa yichey ja cotsjaat Galilea.*xv* 13Taj nimônlhaa'e' ja Nazaret, t'ajuyey ja Capernaum pa lhech mônlhee. Jô lhech yitsaat Capernaum shalheema ja lhjôycha lhey Galilea, yi'shi' ja lhcootsjat ja Zabulón shi' ja Neftalí.*xw* 14Cavôque vaclan yôfisch'e jan t'ônash pa chiytôyjata pava ti vaclan Isaías ti yisesh'e:
15“Lhcootsjat ja Zabulón shi' ja Neftalí,
shalheema ja lhjôycha,
lhum'ôcjinucjulh ja tovôc Jordán:
Galilea, jan yie' japi nijudiosa.
16Japi nivacle japin yi'shi' pa tulhitaj
yi'van lhpa uj catiis,
vooy japin yi'shi' pa lhajpec pa vatvafi'
pjumtsejem lhpa uj catiis.*xx*
17Lhech tôlhesh'e ti vanqu'eyjatsjanesh ja Jesús cava Dios lhasinôc, pa yit'esh: “Atatvaych'aclajshelh pava ajunashelh, lhayaash ti shalhac'oya ja lhanvacleyash ja Dios.”#4.12 Mt 14.3; Mr 6.17; Lc 3.19-20.,#4.13 Jn 2.12.,#4.15-16 Is 9.1-2.,#4.17 Mt 3.2.
Pa Jesús tôney papi yitshatjulh sajech lhavos
(Mr 1.16-20; Lc 5.1-11)
18Yichjop ja Jesús ja lhjôycha lhey Galilea, pa yi'van japi napu' lhtatvelheyech. Ve'lha ja lhey Simón, lhey shta Pedro, vooy jeelh lhey Andrés. Japi lhech sajech lhavosesh, pa yu'jam'in lhpa lhaschaat ja lhjôycha. 19Pa lhechesh pa yit'esha ja Jesús ti yiyôjaa:
—Atatvoelhyich'e, c'asnatshelhjop jayu ca avoelhey papi nivacle, nanlhjunash ti lhavoelhey pava sajech.
20Pa nôôy tatsha java lhaschatiy, pa voqu'evatich'e.
21Pa tac'uy clee ja Jesús, pa yi'van tatsha jap'elh napu' lhtatvelheyech: Ja Jacobo shi' ja Juan, lhcles ja Zebedeo. Yieelhjop ja lhtata lhja lhôvjatshi ti yashtilhsha'ne java lhaschatiy. Pa tôney ja Jesús. 22Pa yivôômjop tatsha lhja lhôvjatshi ja lhtata, pa voqu'evatich'e.
Pa Jesús yeyjatsjan papi acloj nivacle
(Lc 6.17-19)
23T'ôtaych'e ja Jesús lhacôm'a ja Galilea pa vanqu'eyjatsjan'ôcji java vatvanqu'eyjatsjanjavtes. Vanqu'eyjatsjanesh pa lhanvacleyash pa Dios. Yilhjenesh lhacôm'a papi nalhjunash'in pa t'aôytiyash.*xz* 24Tpeeycheyesh lhacôm'a papi yiey ja cotsjaat Siria pava yisnatesh ja Jesús. Pa yicha'jeyvatich'e lhacôm'a japi aôytes'in, pa nôquee japi ancojoyesh. Vooy ja Jesús yilhjensha'ne. #4.23 Mt 9.35; Mr 1.39.
25Acloj japi tanaôycheelh tôlhey ja Galilea shi' jap'elh tôlhey jav'elh yitsates lhey Decápolis, jan yie' java diez yitsates, shi' japi Jerusaén lhavos, nôquee japi tôlhey ja Judea shi' jap'elh tôlhey ja lhum'ôcjinucjulh ja tovôc Jordán.
Currently Selected:
San Mateo 4: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.