Hechos 7

Vanijôtjat pa Esteban

1Pa lhechesh pa niyôsesh pa lhanvacleesh papi vatcasinôc pa yit'esh:

—¿Yijô' ti lhech lhjunash lhacôm'a côque?

2Pa yicuulh pa Esteban pa yit'esh:

“Napi yenjas yivelhavot shi' napi vatanavot, ach'anelhyi cum: Pa cas Dios lhasnôyech tanôcliteshem pa catsict'ech p'alha Abraham ti yie' pa Mesopotamia, ti yujeey ca nôquey ca nôv'e' pa Harán, 3ti yit'esha: ‘Ayjop na acootsjat shi' napi avelhavot, ca meey ja cotsjaat ti janôclit'am jayu.’*xi* 4Pa lhechesh pa tay'e pa Abraham pa Caldea pa yichey ti yie' pa Harán. Pa nijooylha ti vaf pa lhtata. Pa vooy pa Dios pa nichajey pa Abraham pa lhech cotsjaat nan lhôvelh'e avaatsheelh nôqueesh.*xj* *xk* 5Taj ti ampa ca nitisesh ca nitsôôtjatesh pa lhech cotsjaat, ey ca lhecha pa ca lhjuc'aach'e jô ca nôv'e', jô'lhaa ti apis ti nifaclem ca nijutem paelh ca nivaftaj pa vo'ya papi lhantôclishjes pa nô'vey, lha'ma amtajem pa Abraham papu ca lhclesa pa lhech nalhu.*xl* 6Yit'esh shta pa Dios ti nifaclem: Papi antôclishjes yie' jayu pa cotsjaat nilhavtsat'a, pa lhancavosesh jayu atesha pa tanca chinasclaneshi pa nôqueshch'e pava cuatrocientos lhnincôpes. 7Taj ti yit'esha shta pa Dios: ‘Jivalha jayu pa cat'eelhtajeesh papu ca nicumjataj atesha, pa lhecheesh pa nitay'een ts'ivee jayu pa nôque nôv'e' yiey nôque cotsjaat pa natcumyam'in ts'ivee.*xm* 8Pa yisnatshem pa Dios pa ve'lha vatpeya'shelh pa Abraham ti yijutem pa t'ajuya ti chivancaseej chinôôclhanitsha pa ti chivatpeya'esh. Pa lhe'naa ti meelh ti nivat'aj pa lhaôs Isaac, pa Abraham ti nôjeshch'e pava pu'janayama nalhus pa yiseej, pa lhech lhfanishesh yitsha pa Isaac pa lhaôs Jacob. Pa lhech lhfanishesh vitsha pa Jacob papi lhcles, papi lhech lhnavot'esh papi doce t'ajôôjjam pa Israel.*xn* *xñ* *xo* #7.2-3 Gn 12.1.,#7.4 Gn 11.31.,#7.4 Gn 12.4.,#7.5 Gn 12.7.,#7.6-7 Gn 15.13-14; Ex 3.12.,#7.8 Gn 17.10-14. #7.8 Gn 21.2-4.,#7.8 Gn 25.26.,#7.8 Gn 29.31-35.18.

9Papi lhech lhcles pa Jacob vatjutsa' catsicchevot, caajem pa lhavancajuctsenjayashem pa lhch'inish José, pa tcashayesh ts'ivee jaspa chinchajey pa cotsjaat Egipto. Pa vooy pa Dios yi'jop pa José,*xq* *xr* *xs* 10pa yilhjeneshey lhacôm'a pava tavijataytajem. Pa yijutem pa lhtôycheyash pa jaspa nenesh pa faraón, lhanvacleesh pa Egipto. Pa lhech yetônjop pa José ca lhanvacleaesh pa Egipto shi' pa lhajpôyich.#7.9 Gn 37.11.,#7.9 Gn 37.28.,#7.9 Gn 39.2,21.,#7.10 Gn 41.39-41.

11Pa lhechesh pa vaclan pa uj yipcu' yiey pan tc'a'e pa cotsjaat Egipto shi' na Canaán. Pa ampa ca ni'van ca nituj papi catsicchevot.*xu* 12Meelh ti yaya'esh pa Jacob ti yie' pa Egipto pa vatôc, pa yicheney papi lhcles, papi lhech vatjutsa' catsicchevot. Pa lhech vatjutsa' lhôcjaya'shey pa Egipto. 13Ti napuesh ti yichey pa lhechesh pa tanôôclhanitlhavnec'oya pa José papi lhcheclavot. Pa nôque lhjunash ti yitô'ya pa faraón papi tô'lha pa José.*xv* *xw* 14Pa nijooylha ti tayôjijanesh pa José pa lhtata Jacob shi' lhacôm'a pat'ajôôjjam, papi lhech setenta y cinco pat'ajôôj, ca nachey pa Egipto.*xx* *xy* 15Pa nôque lhjunash ti yamey pa Jacob pa Egipto; pa lhech vaf'e' shta. Pa lhech vaf'esha'ne shta papi catsicchevot.*xz* *xa* 16Vooy pa t'elhesh pa chiychajey pava lhanus pava nivalhjey yiey pa Siquem, pavan tcashaya lhapesh pa Abraham, pa yichenjulh pava lhpesoc papi lhcles pa Hamor yiey pa Siquem.#7.11 Gn 42.1-2.,#7.13 Gn 45.1.,#7.13 Gn 45.16.,#7.14 Gn 45.9-10.17-18.,#7.14 Gn 46.27.,#7.15 Gn 46.1-7.,#7.15 Gn 49.33.,#7.16 Gn 23.3-16; 33.19; 50.7-13; Jos 24.32.

17Meelh ti shalhac'oya pa t'aplhu' ca nôfisch'e pava nifaclem lhapesh pa Dios pa Abraham, pa vatclonat'e papi Israel lhavos yiey pa cotsjaat Egipto, pa yaash pat'ajôôj. 18Pa lhechesh pa caaj pa nich'a lhanvacleesh pa Egipto, pa lhech ninantôfa'clesh pa José.*xc* 19Pa lhech lhcaanvacle yijôts'ôclôn'in papi catsichifas pa ninasclaneshi papi catsicchevot; pa tayôjijanesh ca chintif'e papi nich'a nivat'as yitsjôy.*xd* *xe* 20Pa lhech t'aplhuqu'e ti nivat'aj pa Moisés. Pa lhech taôvclaj nishamesh pa Dios, vooy papi lhnavot vanujumatsenesh ti yiey pa lhajpôyich pava pu'jana jive'clas.*xf* 21C'oya ti yayjatlhavcop pa vooy lhpa lhôse pa lhcaanvacle faraón, pa t'acum'e ti vanujumatsenesh pa yijôney pa yitsôt'ajesh lhaôs.*xg* 22Pa nôque lhjunash ti chiyeyjatsjaneshjop pa Moisés pa lhcajôysha papi Egipto lhavos, jô'tajesh ti t'unesh'in pava lhclishay shi' pa lhcumjayash. #7.17-18 Ex 1.7-8.,#7.19 Ex 1.10-11.,#7.19 Ex 1.22.,#7.20 Ex 2.2.,#7.21 Ex 2.3-10.

23Meelh ti yameyshi pava cuarenta lhnincôpes pa Moisés pa yen ti yijôchiey papi Israel lhavos, lhayaash ti yitsôt'ajesh ti lhchifas. 24Lhech yie' ti yivanesh pa Egipto lhavo' ti ninasclaneshi papi ve'lha pa lhchifa, pa yicheshey pa Moisés ti vanequetsenesh ti t'atshaayjulh pa yiclôn lhavaatsha. 25Pa lhech Moisés yaychavalhtajemey papi lhavelhavot, papi Israel lhavos, ca nitô'yishc'oya ti lhech jayu lhavaatsha ti yicumjat'e pa Dios ca nalhjenesh jayu papi lhchifas, taj ti nintô'yishc'oya ts'ivee. 26Paelh nalhu pa yivanesh pa Moisés papi napu' lhtachifas ti yishansha'ne, pa yitajeshey ca nivôômvach, pa yit'esha: ‘A'lhtatvelhavot'elh avenna avaatsheelh, ¿pa ta t'e lhayaash ti naataasclanelh?’ 27Pa lhechesh pa yit'esh pa nicômclôqui pa lhavelh, pa yu' pa Moisés pa yit'esha: ¿She papi nanvacleyan ca atsiisclanelhvatjulh? 28¿Lhentaj jayu ca asclôn, jan lhjunash can'ut ti lhclôn pa Egipto lhavo'? 29C'oya ti yipe'ya côque pa Moisés, pa yiclôt pa t'ajuyey pa cotsjaat Madián. Pa lhech yie'in ti nichinantôfa'clesh pa caaj papi napu' lhcles.*xh* #7.23-29 Ex 2.11-15.,#7.29 Ex 18.3-4.

30“Vooy ti nôjeshch'e pava cuarenta lhnincôpes ti yie' pa ampapu ca nôv'e', shalheema lhpa utiyuc Sinaí, pa tanôclitem pa ve'lha ángel yi'shi' lhpa c'utjaniyuc yichesh. 31Pa nitôyiyjat pa Moisés pa lhech ti yi'van, pa meelh ti tac'uya pa ujesh ti yovalhsha'ne, pa yipe'ya pa t'ôjôj pa Lhcaanvacle ti yit'esha: 32‘Yivaatsha yalhech lh'Diosyish papi acchevot. Ya lhech lh'Diosyish pa Abraham, pa Isaac shi' pa Jacob.’ Pa lhech tôlh'ejop pa Moisés ti yits'anaanjat pa t'ajovayi, pa ninfi'ya lhavach ca novalhsha'ne. 33Pa lhechesh pa yit'esh pa Lhcaanvacle: ‘Anclanshi nava acfiyis, lhayaash ti is'e' nan lht'ôs'e jayu. 34Javaney jô napi yichifas ti uj ti tanclôyitsjaysha'ne yiey ja Egipto. Jape'ya ti nicôtsitajesh pa janameyshicham ca c'alhjaneshey. Pa lhe'naa ti janach'ay ca c'acheney ja Egipto.'#7.30-34 Ex 3.1-10.

35“Lha'ma ti yicônitshitaj ts'ivee pa Moisés ti yit'eshaan ts'ivee: ‘¿She papi netôn'ash ti alhcaanvacleesh shi' ti lhatcaasclanchaysha'ne?’, vooy pa Dios yijutem ti lhcaanvacleesh shi' ti qu'ilhjeyesh, tôlhesha pa ángel ti tanôclitem ti yiey lhpa c'utjaniyuc. 36Pa nôque lhjunash ti yayjat'e pa Egipto papi catsicchevot, pa yivclanjatem pava nimatasa papu ca nitô'yish, shi' pava yinôôclhanitsha pa'na. Pa yicheshch'e pava cuarenta lhnincôpes ti yiesh'e pa lhech'e cotsjaat, yiey pa Tovôc Yucshi, pa yiey shta pa ampa ca nôv'e'.*xk* *xl* *xm* 37Pa lhech lhavaatsha pa Moisés, pan yit'esha papi israelitas: ‘Pa Dios yitôlhjatelh'atsham jayu avaatsheelh pa ve'lha chiytôyjata pava ti vaclan yiey nan yijunash.’*xn* 38Pa lhech Moisés tayelhvane lhapesh papi lhchifas Israel lhavos ti yiey pa ampa ca nôv'e', shi' ti tasinô'yelh pa ángel ti yiey lhpa utiyuc Sinaí, shi' papi catsicchevot; pa shi' ti chiyjuteem pa ya'clishesh pa vatmônlhajayash pan nameshjooy casvaatsha nôqueesh.*xñ* #7.36 Ex 7.3.,#7.36 Ex 14.21.,#7.36 Nm 14.33.,#7.37 Dt 8.15,18. #7.38 Ex 19.1-20.17; Dt 5.1-33.

39“Taj ti papi catsicchevot ninteesh ca nanc'ashamesh ts'ivee, pa yen ti yiv'ojiyan ts'ivee pa yen ca napecley'in ts'ivee pa Egipto. 40Pa yit'eshaan ts'ivee pa Aarón: ‘Asnatshelhyam pava ca yadiosicleeshelh ca nôyinelhyic'oya, lhayaash ti ninastôye'shelh pa lhjunash ja Moisés jan tsayjatelh'e ja Egipto.’ *xo* 41Pa lhechesh pa yisnatesh pa ve'lha yijônch'e pa vôcô lhaôs, pa yiclônjop'in pava lhclôy pa jaspa tisesh'in ts'ivee, pa yisnateshjop pa lhc'usiyash'in ti yôclôjesh'in ts'ivee pan yisnatesh diosesh.*xp* 42Pa lhechesh pa tanuc'oya pa Dios papi lhech pa yin'ateesh ti t'a'lhaan pava catiis yi'shi' pa vôôs. Lhech côque vani'sesh'e lhapesh pa lhqu'isjayanach papi chiytôyjata pava ti vaclan ti yit'esh: #7.40 Ex 32.1.,#7.40 Ex 32.2-6.

Israel avoselh,

¿Lhastiseshelh ajalh pava aclôyelh

ti cuarenta pava yincôpes

ti lhôvelh'e ja ampa ca nôv'e'?

43Am, vooy ja lhatsha'nuvoesh

ja chiydiosiyan lhey Moloc

lhcha'jelh'achesha'ne

shi' lhpa catiis adiosshelh lhey Refán'

nava lhech lhajpeclesesh adiosecleshelh

lhasnatshelh pa lht'alhelhaan.

Pa lhe'naa ca c'ayjatelh'e jayu avaatsheelh

pa c'amjatelhey t'ôyiish ja Babilonia.#7.42-43 Am 5. 25-27.

44“Papi catsicchevot p'alha caajem pa lhatsha'nuvojop pa chiyvatpeya'esh yiey pa ampa ca nôv'e', pa lhech yisnatesh yiey pan t'ônasheshem pa Dios ti yiyôjiesha pa Moisés ti yit'esha ca nasnatesh ca nijôneshch'e pan lhjunash ti yi'van.*xr* 45Pa lhech tsha'nuvoesh ts'ôtiyesh lhapesh papi catsicchevot pa nichaaj ts'ivee ti tavoqu'e pa Josué ti tanjuyey na cotsjaat Canaán. Papi lhech nijôclesh pa lhcootsjat papi lhech'e, vooy pa Dios yefenesh papi lhech ti yayjatem'e. Cavôque yamjey pava lhnalhus pa David.*xs* 46Pa lhech lhcaanvacle David yivan'e t'ajuyish pa t'efenjayasha pa Dios, pa yen ti yisnatshem pa ve'lha ca nôv'ôcji pa lh'Dios pa Jacob; *xt* 47taj ti vooy pa Salamón yisnatshem pa Dios pa lhishjanjavat.*xu* 48Lha'mataj pa Dios ti yaashchisham ninteesh ca nôv'ôcji pava jpôyjey lhasnatsjes papi nivacle. Yiey nan t'ônashesh pa chiytôyjata pava ti vaclan: #7.44 Ex 25.9,40.,#7.45 Jos 3.14-17.,#7.46 2 S7.1-16; 1 Cr 17.1-14.,#7.47 1 R 6.1-38; 2 Cr 3.1-17.

49‘Na vôôs yic'ovat'esh,

vooy na cotsjaat javôlhesh'e nava yifoc.

¿Ta lhjunash pa jpôyich chiyisnateshyam jayu?,

yit'esh pa Lhcaanvacle.

¿Ta yie' jayu pa ca jôv'e'

ca jayichay'e,

50ya lhech yivaatsha jasnatesh lhacôm'a

cavôque matas? #7.49-50 Is 66.1-2.

51“Taj ti avaatsheelh,—ve'lheesh yit'esh shta pa Esteban— yajatesh ti ayôjijamat'elh, ninteesh ca nach'ana nava acfeyelh shi' nava acachi'clelh. Yajatesh ti lhatjuyeelhjulh pa Espíritu Santo. Ajunashelhjulh papi acchevot'elh.*xw* 52¿Naô t'e pa yie' papi t'ôn'e' papi chiytôyjata pava ti vaclan ti ninasclaneshi papi acchevot'elh? Yiclônsha'ne pan yie' papi tasinô'yesh pa lhnamjayash jô lhech yivo'yeshch'e, pa nôqueesh jô lhech yivo'yeshch'e jan namelh'ay avaatsheelh ti lhavanqu'eyjateshelh pa lhclônelh shta. 53Avaatsheelh chiyjutelh'ay nava vatyôjijates tô'lha papi ángeles, taj ti naanc'ashamshelh.” #7.51 Is 63.10.

Pa lhavafi pa Esteban

54Meelh ti yipe'yeesh ts'ivee cavôque matas, pa yisuyiyan jum pa yijuujvatjulh pava lhtsevtey ti t'ajuyjulh pa Esteban. 55Taj ti pa lhech yamqu'een jum pa Espíritu Santo pa yovalheychisham pa vôôs pa yi'van pa lhasnôycheyash pa Dios, shi' pa Jesús ti vatsavat'e lhfayishey pa Dios. 56Pa lhechesh pa yit'esh:

—¡A'va! Javaney na vôôs ti tatc'aatsham, shi' na Lhaôs na nivacle yiey lhfayish pa Dios.

57Taj ti papi lhech yip'ojisha'nec'oya pava lhacfey, pa yisitsenesh ti tônvatsham'in pa t'eclet'a vatam ts'ivee pa lhech. 58Pa tayeshi ts'ivee pa yitsaat ti yôôtjatesh'in pava utes; vooy papi yic'aclanem niclanshic'oya pava t'uyjatshiyis pa yinujumatsenjayanesh pa ve'lha nich'ayech lhey Saulo.

59Jôjjeclay ninvô'mesh ti yôôtjatesh'in ts'ivee pava utes, pa t'aalh pa Esteban pa yit'esh: “Lhcaanvacle Jesús, acuumjulh na yisôc'ôclit lhshayc'u.”*xx* 60Pa nijooylha ti yu'jane t'acjatsuy pa yisitsenesh ti tôn'in: “¡Lhcaanvacle, ya aj ca at'esha ca natmenesh lhavach nôque sasch'e!” Vooy ti tifeshch'e côque ti yit'esh, pa vaf.#7.59 Sal 31.5; Lc 23.46.,#7.60 Lc 23.34.

Currently Selected:

Hechos 7: NIVA

Highlight

Copy