Zɛkɛrâya 14
14
Zerusâlɛŋ da ǹɔii-ŋuŋ-ŋai
1Ká gáa, Yâwɛɛ ŋɔɣelei káa pâi tãi da pâi kásãâi ŋáa kɔlɛ̂i la káŋɛi dí gùla káyêei. 2Yâwɛɛ a pâi pâi a ǹɔii-ŋûŋ-ŋai kwaa tɔ̂nɔ ma dí kɔ́ pɛ́lɛ Zerusâlɛŋ ma, dí daai yée mɛi ɣále dí bɛ́rɛ-ŋai wólo dí ǹɛyâai kɛ́ a dínɛyâa a wála-wâla-laa. À kɛ̀ tí, daâi m̀éla tɔnɔ a pâi liî luɛ-lâa su, m̀éla gbéli é lɛ́ɛ naa. 3À kɛ̀ tí, Yâwɛɛ a pâi kɔ́ pɛlɛ̂i ǹɔii-ŋuŋ-ŋai dîa yɛ̂ɛ berei a kâa gɛ̀ la a bɔlɔ a kɔ́-kɔ tãi. 4Maa ɣêlei tí, a pâi tɔɔ̂i Ŋ̀úlɔ-wuru Yeei tôŋ su nyii gáa Zerusâlɛŋ vóloi-kulâi-perei. Gɛ̀ ní Ŋ̀úlɔ-wuru Yeei su a pâi ƃêlai feerɛ é síɣe vóloi-kulâi-pere é lí ǹiî-pere. Nàa a pâi kɛ̂i a tiŋ-tiŋ su. M̀ɛni ma ǹyée-ƃela feerɛi ŋí dɔnɔ a pâi liî ǹɔii-ŋûa-pere, gbéli é li ǹɔii kwára-pere. 5Ka pâi pûi a ŋáyêei ŋɔtiŋ-tiŋ su-pere nyii ǹyéei ŋáa kɔ̀lɛ gîei feerɛ. Ka pâi pûi yɛ̂ɛ berei ká wɔ́lɔ pù la Zuda kaloŋ Uzia ŋɔtãi ma tãi ǹɔii è wɔ́lɔ kpɛ̀liŋ lai. Gɛ̀ ní Yâwɛɛ nyii gáa a Káɣâlai a pâi pâi da ŋɔpôlu-ƃelai kélee.
6Maa ɣêlei tí kɔ́lɛ fé pâi kɛ̂i naa kpaa máŋ lúu. 7Ǹyaŋ ɣele ƃɔ́ɔ nɔ́ ƃé pâi kɛ̂i naa, (Yâwɛɛ nɔ́ ƃé gɔ́lɔŋ) ɣele ƃɔ́ɔ da kpíni dífe pâi kɛ̂i naa, kpɛ́ni fêi, a kɛ̀ a ɣele wûlii tãi, ɣele ƃɔ́ɔ a pâi kɛ̂i naa.
8Maa ɣêlei tí fúlu-laa ya a pâi kulâi Zerusâlɛŋ é li Ǹyúo Saai su vóloi-kulâi-pere, m̀éla tɔnɔ é li Mɛditɛrenia Yuoi su vóloi-liî pere. A pâi kɛ̂i nɔ́ tí a fólo-laa ƃóɔɔ da sama-ya ɣele. 9Gɛ̀ ní Yâwɛɛ a pâi kɛ̂i a kâloŋ ǹɔii gwaa kélee. Maa ɣêlei tí Yâwɛɛ a pâi kɛ̂i nɔ́ tɔnɔ, ǹyaŋ ǹáa kɛ́ ƃò tɔnɔ.
10À kɛ̀ tí ǹɔii gáa Zerusâlɛŋ-taai kwára-perei, é síɣe Giƃa é lí Limɔŋ a pâi kɛ̂i a tiŋ-tiŋ su. Kɛ́lɛ Zerusâlɛŋ a pâi lɛɛ̂i nɔ́ ǹyéei ma é síɣe Bɛŋsima ŋɔsiɣãŋ lá é lí ziɣãŋ pɔlɔi lá, é lí zônoŋ su-siɣãŋ lá, é kúla Ananiɛ Yeŋkêŋ lá é lí gâloŋ ŋɔŋwã̂ai-kpɛtɛ teei lá. 11Ǹyaŋ ǹûa da pâi naa, foo-wôo fé pâi kɛ̂i ŋɔ́nɔ dípôlu. Zerusâlɛŋ-ƃelai da pâi seêi naa a díŋuŋ-maa ƃóɔɔ.
12Gɔlɔ-fela nyɔ́mɔɔi Yâwɛɛ a pâi dɛɛ̂i ǹûai kélee mɛni ma da kɔ́ pɛ́lɛ Zerusâlɛŋ mai, ǹyaa ká ŋí: Da pâi lɛɛ̂i a dífulu díkɔlɔ kɛ́ lùla dîa, díŋɛi-gao kɛ́ lùla díŋɛi-gònoŋ su, dínɛŋ kɛ́ lùla dí lá.
13Maa ɣêlei tí, Yâwɛɛ a pâi kpunɛ̂ŋ kɛ́tɛ têei ǹûai loai, núu tɔnɔ kɛ́ m̀arâŋ-nuu kpɛ̀, m̀arâŋ-nuui kɛ́ gɔlɛ-ma-nuui kpɛ̂. 14Gɛ̀ ni Zuda-ƃelai máŋ da pâi kɔ̂i Zerusâlɛŋ ŋɔkpɔara-ƃelai pɔ́. À kɛ̀ tí da pâi tɔɔ-sã̂a kulâi ǹɔii-ŋûŋ-ŋai su naa kɔlɛ mai, sɛŋ kɛ́ɛ yɛ̂ɛ gôo, káne, da yokpo kpaya-kpaya támaa.
15Ǹyaŋ gɔlɔ-fela tɔnɔi ŋí a pâi kɛ̂i máŋ Zerusâlɛŋ kpɔara-ƃelai dítaa-sûa-ŋai mɛ̂ni ma: Dísoo-ŋai, niŋa ŋai, zoo-faleŋ-ŋai é pɛ́lɛ daa-sûa-ŋai kélee ma dítaai sui.
16Mɛni ma ǹɔii-ŋuŋ kélee kɔ́ pɛ̀lɛ Zerusâlɛŋ ma, ǹyaŋ zu-ƃelai nyii-ŋai kùla gɔ́i sui, gáa a sɛŋ dí lí Zerusâlɛŋ a kóraŋ kélee dí Yâwɛɛ Ŋ̀wála-wâla kélee Ɣala fɛ́li nyii gáa a Gâloŋ. À kɛ̀ tí, dífe kpèra Díƃûu su Kuui kɛ́ɛ ma a kóraŋ kélee díƃûu-ŋai mu. 17À kɛ̀ ǹɔii-ŋûŋ-ŋai ŋ̀éniɛi sui da fé li ní Zerusâlɛŋ a gɛɛ é Gâloŋ fɛli nyii gáa a Ŋ̀wála-wâla kélee Yâwɛɛi, tuna fé pâi pûi dílɔii su. 18À kɛ̀ Ize-ƃelai da wàla lí Zerusâlɛŋ dí M̀ûui su Kuui kúla, gɛ̀ ní Yâwɛɛ a pâi a gɔlɔ-fela tɔnɔi tí dípɔ nyii pà ǹɔii-ŋuŋ-ŋai pɔ́ diai dífe lí ní a gɛɛ dí gúui ŋí kula. 19Nyíŋi ƃé pâi kɛ̂i a mɛni-kula-maa kɛɛi Ize mɛni ma da ǹɔii-ŋûŋ-ŋai kélee nyii-ŋai dífe li ní Zerusâlɛŋ a gɛɛ dí M̀ûui su Kuui kulai.
20Ǹyaŋ maa ɣêlei tí, kɔlɔ pɔ̃̂yɛ da a pâi kɛ̂i zoo-ŋai dítaniŋ-ŋai dîa ǹyɛɛi, “Maa waâi Yâwɛɛ mɛni ma.” 21Gɛ̀ ní ǹeɣi-ŋai kélee gáa Zerusâlɛŋ da Zudai da pa kɛ̂i a dímaa waa Ŋ̀wála-wâla kélee Yâwɛɛ mɛni ma, à kɛ̀ núu da kélee a ŋ̀wɛ̂lii é sâla sɛŋ ɣíli zu yɛ̂ɛ sua, a pɔ̂ri ziɣêi é ŋ̀íli zu. Ǹyaŋ maa ɣêlei tí pɔni tɔɔ-nûu fé ŋɔ́nɔ pâi kɛ̂i Ŋ̀wála-wâla kélee Yâwɛɛ ŋɔpɛ́rɛi mu.
Currently Selected:
Zɛkɛrâya 14: KWB
Highlight
Copy
Compare
Share
Want to have your highlights saved across all your devices? Sign up or sign in
