Mâki 5
5
Zîsɛ è nyînaŋ nyɔ́mɔɔ kpɛ̀ Gɛnɛsara naloŋ pôlu
(Maafîu 8:28-34; Lûu 8:26-39)
1Nya ƃe Zîsɛ da ŋɔpôlu-ƃelai dí sèri Galalii Poai pôlu, Gɛnɛsara lɔii kpiniŋ su. 2È kùla kpɔ́ nɔ́ ǹyá ŋá-keleŋ su, da nalôŋ tɔnɔ da dí kɔ̀yaŋ a kùla m̀olôŋ sãŋ su pere. Nyînaŋ nyɔ́mɔɔ è kɛ̀ ǹalôŋ ŋí pôlu. 3Ǹalôŋ ŋí è kâa ǹyiî m̀olôŋ sãŋ su. Núu da fa kâa pɔ̂ri ǹalôŋ ŋí ɣirîi kpaa máŋ é doo yɔlɔ ŋá. 4Dí dòo kpɔnɔ da yɔlɔ ŋá a ɣele támaa, kɛ́lɛ, va kâa lɛ̀ɛ naa. È kɛ̀ kpɔ́ a gbonôi kpanaŋɔɔ núu da kélee yée fa pɔ̂ri kɛ̀ ma a gɛ́ɛ é ŋ̀á yéŋ. 5A kâa kɛ̀ siâi m̀olôŋ sãŋ su da ǹyéei su a Ɣele ƃɔ́ɔ da kpíni kélee, gɛ́ làɣi, gɛ́ gbîŋ tee-tee a kɔni ƃela-ŋa. 6Ɣele tɔnɔ da è kɛ̀ kwaa kôyaa ma é Zîsɛ káa. È kîrɛ sìɣe é lí bɔ́ naa é tóo gɔ́ɔ mu 7é láɣi ǹyɛɛ mai, “Zîsɛ, Ŋ̀âlai Gɛ́tɛi Ǹóŋ, lé ƃé yâ ŋ̀wɛ̂lii í gɛ́ a ńyãai? Ɣâla láai su ŋa íkpera fêi, ífe ŋ́ɛi maa nɔ̃ɔ!” 8È nyíŋi ƃò, kpɛ́ni fêi, è m̀ɛni Zîsɛ lá ǹyɛɛi, “Yá nyînaŋ nyɔ́mɔɔ, sìɣe ǹalôŋ ŋí pôlu!” 9Zîsɛ è m̀arê kɛ̀, ǹyɛɛ mai, “Ílaa ƃa gbɛ̂ɛ?” Ǹyɛɛ mai, “Ńaa ƃa kpɔŋ. Kútamaâi.” 10È Zîsɛ kpera fè kpɔ́ a ŋ̀ánaa a gɛ́ɛ vé díkpɛ ǹɔii tí ma. 11Kwíi-ƃoi kpɔŋ kɛ́tɛ díkɛ̀ naa díkɛ dílaa mii ǹyéei pɛ̂rɛ ma. 12Ǹyînaŋ nyɔ́mɔɔ-ŋai dí Zîsɛ kpera fé, dîyɛɛ mai, “Kútɛɛ m̀oi-ŋai pɔ́ naa pere a gɛ́ɛ kúlɔ díkponôi kú ƃo naa.” 13Nya ƃe Zîsɛ è fàa ma. È ǹyînaŋ nyɔ́mɔɔ-ŋai kùla ǹalôŋ kponôi é dípili m̀oi-ŋai kponôi. M̀oi-ŋai dí kɛ̀ a wála feerɛ. Dí gbotoloi yèŋ a kîrɛ dí lí ǹyuo-loŋ su dí lɛ̀ɛ zu. 14Ǹya ƃé m̀oi mɛi káa-ƃelai dí pù a kîrɛ dí li dí m̀o daai su ǹûai da gbâlaŋ-ŋai lá-ƃelai dîa. Ǹûai ŋí dí pà dí m̀ɛnii káa kɛ̀i. 15Nya ƃe dí pà Zîsɛ pɔ́, dí ǹalôŋ káa ǹyînaŋ nyɔ́mɔɔi è kɛ̀ bôlui. È kɛ̀ seêni, m̀aa ɣiriɛ, gíli ŋá ponoɔɔ. Dí yào kpɔ́ a ŋ̀ánaa. 16Diai m̀ɛnii ŋí naa kàai, dí mò daai su-ƃelai dîa berei m̀ɛnii è kɛ̀ la a ǹalôŋ ǹyînaŋ nyɔ́mɔɔi è kɛ̀ bôlui da m̀ɛnii kɛ̀ a m̀oi-ŋai. 17Nya ƃe dí Zîsɛ marê kɛ̀ a gɛ́ɛ é kúla díkpinîŋ su. 18Zîsɛ kɛ́ɛ pilîi ǹya ŋá-keleŋ sui, ǹalôŋ nyînaŋ nyɔ́mɔɔi è kɛ̀ bôlui, è gbera fè a gɛ́ɛ da ǹyaa dí li. 19Kɛ́lɛ, Zîsɛ fé fáa ní. È mò ǹalôŋ ma ǹyɛɛi, “Ye lí pôlu ípɔ naa m̀ɛni kɛ́tɛi Ínuu-namui ímalôŋ káa a gɛ́ yɛ̂i, í m̀ó ínûai dîa.” 20Nya ƃe ǹalôŋ è lì m̀ɛnii kélee Zîsɛ è gɛ̀ m̀ii gɛ́ m̀ó Daa-puu-lɔii-kpiniŋ su-ƃelai dîa da m̀ɛni kɛ́tɛ lɛ́lɛɛi è gɛ̀ mìi. Ǹûai kélee pɛ́lɛ è pù m̀ɛnii ŋí mɛniɛɛ dîɛi.
Zailɔ ǹóŋ-nɛnîi da ǹɛnîi Zîsɛ ŋɔyokpoi sòŋ
(Maafîu 9:18-26; Lûu 8:40-56)
21Zîsɛ è lì ŋɔ́nɔ ǹyái pôlu ǹya ŋá-keleŋ su. Kpɔŋ kɛ́tɛ è ŋ̀á tɛ̀ ma gɔlɛ ǹyuo-loŋ kɔlɛ. 22Ŋ̀âla fɛli-kerei mɛi-nuui dɔnɔ, ǹáa ƃé kɛ̀ a Zailɔ. È pà é gáa, é tòo gɔ́ɔ mu, 23é vɛli, ǹyɛɛ mai, “Ńoŋ-nɛnîi a kɛ́ saâi. Pá í íyee pɛ́lɛ ma, a gɛ́ɛ vé saa, kɛ́lɛ, é ƃálo.”
24Nya ƃe da ǹyaa dí lì. Kpɔŋ kɛ́tɛ è pìlaŋ bôlu dítinaŋɔɔ ma.
25Nɛnî tɔnɔ è kɛ̀ gwaai ŋí ma kɔlɛ ma. Ŋãa kɔlɔ-fela è kɛ̀ ma kóraŋ puu kao feerɛ yée mu. 26È lì zóo támaa pɔ́ naa a gɛ́ɛ dí zále. È ǹyée ŋá pù a dámaa sále-ŋa mɛni ma. Kɛ́lɛ, vé ƃálo ní. Ŋɔpalai su è kɛ̀ nɔ́ kɛ̂tɛi. 27È Zîsɛ tuŋ mɛ̀ni é pá bɔ́ naa gbɔŋ su bôlu-pere é ŋɔyokpoi soŋ. 28È mò ǹíi su pere ǹyɛɛi, “À kɛ̀ nɔ́ ŋà ŋɔyokpoi tí sòŋ, ŋa pâi ƃálôi.” 29È lɛ̀ɣɛ kpɔ́ nɔ́ Zîsɛ ŋɔyokpoi wóŋ ma, ŋ̀ãai é kpèra pûi é gɔ́lɔŋ gbîŋ kponôi pere a gɛ́ɛ a ƃálo ŋɔmɛni kpɔ̂lui yêei. 30Zîsɛ ǹyaa máŋ è gɔ̀lɔŋ gbîŋ kponôi a gɛ́ɛ ŋɔwála-wala-laai da é lì. È tìnaŋ a maa félaa gbɔŋ su é dímarê kɛ́, ǹyɛɛ dîai, “Gbɛ̂ɛ ƃé lɛ̀ɣɛ ŋáyokpoi mai?” 31Ŋɔpôlu-ƃelai dí mò ma, “Íkaa gbɔŋ sãŋ ŋí kâai íkɔlɛ ma, díkɛ sɔ̀ɔ yâ, íkɛ kúmarê kɛ́, ‘Gbɛ̂ɛ ƃé lɛ̀ɣɛ ŋáyokpoi mâi?’ ” 32È gɔlɛ kàa a gɛ́ɛ é ǹúui káa m̀ɛnii ŋí kɛ̀i. 33Kɛ́lɛ, ǹɛnîi è kɛ̀ yaôi m̀aa kɛ́ kpɛ̃liŋ, é tóo Zîsɛ kɔ́ɔ mu é dɔ̃yâi kélee ƃó ma. 34Zîsɛ è m̀o nɛnî-looi ma ǹyɛɛi, “Ńoŋ-nɛnîi, ílaa-lai a íƃalo, lí lii-sêe su, ŋa íkɔlɔ-felai ƃálo.” 35Zîsɛ kɛ́ɛ kɛ̀ lônoi, kéla-ŋa dí kùla Ŋ̀âla fɛli-kerei mɛi-nuui ŋɔpɛ́rɛi lá, dí m̀o Zailɔ ma dîɛi, “Íloŋ-nɛnîi aâ saa. Lé ƃé íkaa fũa-fũa tɔɔ̂i la Kaamɔ̂ɔ ma ŋɔ́nɔi?” 36Zîsɛ kɛ́ɛ a díwoo mɛ̀nii, vé ŋ̀oli tɔ̀ɔ ní mà. Kɛ́lɛ, è mò ǹalôŋ ma ǹyɛɛi, “Ífe yào. Láa nɔ́ a Ɣâla.” 37Vé kɛ̀ fáa ní a gɛ́ɛ núu da é pîlaŋ bôlu, fɛ̂ɛ nɔ́ Pitɛ, Zĩi da ǹêɣe Zɔ̂ŋ. 38Dí páa Zailɔ ŋɔpɛ́rɛi lái, è kpɔŋ kàa díkɛ ƃò wúlee, díkɛ wɔ̀lɔ. 39Zîsɛ è lɔ̀ bɛ́rɛi mu ǹyɛɛ dîai, “Kákaa wúlee, kákɛ wɔ̀lɔ lé mɛni ma? Ǹólôŋ ŋí fé saa ní. Gáa nyiî.” 40Dí ɣɛ́lɛ-maa kùla Zîsɛ kponôi. Kɛ́lɛ, è díkelee kpɛ̀ dí kúla ŋ̀énei ŋá. Ǹyaa, ǹôloŋ ǹâŋ, ǹôloŋ ǹee da diai kɛ̀ gɔlɛi mai nɔ́ ƃé lì ƃɛ́i ǹôloŋ è kɛ̀ laai ni naai. 41È ǹôloŋ yée sòŋ ǹyɛɛ mai, “Talida, kumi.” Zu-kulâi ƃa, “Nɛnî-loŋ, ŋa mò yâ, ímu siɣe.”
42È mò kpɔ́ nɔ́ ti, nɛnî-looi é m̀u sìɣe gɛ́ sìa. Ǹɛnî-looi ŋí è kɛ̀ a kóraŋ puu kao feerɛ-loŋ. M̀ɛnii ŋí è ǹûai kélee pɛ́lɛ pù a zu gɛ́tɛ. 43Kɛ́lɛ, Zîsɛ è dília-woo ƃò a gbanaŋɔɔ a gɛ́ɛ dífe m̀ɛnii ŋí ƃo núu da kélee ma, ǹyɛɛ diai, “Ka mii-sɛŋ tɛɛ bɔ́ é m̀ii.”
Currently Selected:
Mâki 5: KWB
Highlight
Copy
Compare
Share
Want to have your highlights saved across all your devices? Sign up or sign in
