SALMOS 145
145
Visqui ingac apyimtalhnamo
1Lhip Dios Visqui ajac, actimec coo siyayo lhip.
Olhenic sat mataa lhip apvisay.
2Otnejic sat siyayo lhip aclhamoclhojo acnim.
Olhenic sat lhip apvisay cotmongvoycamlha nelha.
3Apyimtalhnamo apanco lhip Visqui ingac.
Colhic sat mataa ayaco lhip.
Aptomja apyimtalhnamo apanco, mongyasamquejec acvamlha apyimtalhnamo.
4Apquiltimec apquilayo aplhamoclhojo enlhitaoc najan aptovana, ayinyema lhip aptamjaycam simpilapquiscama.
5Aplhenacpec mataa lhip aptemaclha apyimtalhnamo apanco.
Apquillingasquic mataa actemaclha aptamjaycam simpilapquiscama.
6Aplhenacpec mataa lhip aptemaclha apyimtalhnamo najan apmopvan jintovacsic.
Apquilyipsatquic mataa actemaclha aptamjaycam simpilaquiscama.
7Apquillingasquic mataa lhip aptomja singasicjayo cotmongvoyam nelha.
Apquiltimec mataa apquilayo lhip aptomja appeyvomo.
8Visqui ingac aptomja singasicjayo najan singimlaycmo.
Avanjec anco singasicjayo, mepqui appecjescama yoyam elvoc.#Sal 103.8; Stg 5.11.
9Visqui ingac aptomja apquilasicjayo aplhamoclhojo enlhitaoc.
Aptomja apcasicjayo aclhamoclhojo asoc apquilantipquiscama nic nat.
10Visqui ingac, innec ayaco lhip ayinyema asoc apquilantipquiscama lhip.
Innec ayaco lhip ayinyema lhip apquilyacyescama.
11Colhic sat ayaco lhip aptomja Apvisqui apyimtalhnamo.
Colhenalhcac sat lhip aptemaclha apmopvan.
12Elyascasingvomoc sat aptemaclha apmopvan nipyesicsa enlhitaoc.
Najan aptemaclha gloria lhip apyimtalhnamo.
13Comasquingvomejec sat mataa lhip apcanamaclha.
Lhip aptomja Apvisqui cotmongvoycamlha nelha.
14Visqui ingac, lhip aptomja apvitayclha aptomja apsilhnanomap apanco.
Aptomja aptamilquisquiyam naysicsa apquillingaycamco acyimtalhnama.#Sal 146.8; 147.6.
15Ningilanoc mataa lhip naysicsa ningiljalhanma.
Aptomjac singmescama nintom ningvamlha nac jay.
16Am emyavac lhip lhama asoc yoyam jingilmecsic.
Inquilyipcanacmec mataa aclhamoclhojo aleyvam as nalhpop, ayinyema lhip apquilmescama.
17Inpeyvoc anco aptemaclha Visqui ingac.
Najan aptemaclha mataa singasicjayo.
18Ningatoc apnac Visqui ingac naysicsa ningeveycam.
Ningatoc apnac naysicsa ningeveycam yoyam jingilpasmoc.
19Apjalhnoc mataa ningilmalhnancama ningiltomja ningilayo.
Jingilpasmoc sat mataa, jingvomsic sat tap.
20Singmasma aptomja Visqui ingac ningiltomja ningilasicjayo.
Enatovasacpoc sat enlhitaoc apquilmapsomcaa.
21Olngacsic sat mataa actemaclha ningayo Visqui.
Incaymalhquic eltimjic apquilayo apvisay Visqui ingac aplhamoclhojo enlhitaoc cotmongvoycamlha nelha.
Currently Selected:
SALMOS 145: ENHL
Highlight
Copy
Compare
Share
Want to have your highlights saved across all your devices? Sign up or sign in
