SALMOS 135
135
Actemaclha ningayo Dios
1Innec ayaco Visqui ingac.
Eltime apquilayo apvisay Visqui ingac.
Eltime apquilayo quellhip apquiltimesaycam Visqui ingac.
2Quellhip apquiltamilquiscama Visqui tingma pac apponquinomap.
Quellhip apquiltamilquiscama nipyava Dios tingma pac apponquinomap.
3Eltime apquilayo Visqui ingac, ayinyema aptasoc apanco Visqui ingac.
Singasicjayo nac Visqui ingac.
Elminaycmas sat apvisay apanco.
4Aptomja apquilyacyescama nic nat Jacob apquilmolhama, apquilvisay Israel.
Eltimjic sat apquilmolhama apquilponquinomap.
5Acyasamcoc coo, apyimtalhnamo apanco Visqui ingac, am elhno poc dioses.
6Apquillanac mataa apmayjayo ellana.
Najan maa netin, najan as nalhpop.
Najan maa yingmin acvanyam, najan maa ayaptovnilha.
7Apcapajasquic mataa yipjopay alinyema nelha lhopactic (lhapop).
Aptimescasquic mataa tacja (alyinmayam) yoyam comamá.
Aptimescasquic mataa alhcajayam najan piyam apvanyam.#Jer 10.13; 51.16.
8Apquilnapquic nic nat aptiyam apmamyi sicaa najan actiyam amamyi ninatoscama.
9Apquillanac nic nat asoc monquinatquiscama najan simpilapquiscama Egipto.
Apquillingamcoc nic nat apvisqui faraón najan apquilasinancama.#Ex 12.29-30.
10Apquilnapquic nic nat aplhamoclhojo cotnaja ingmoc.
Najan maa apquilviscaa apquilyimtalhnamo.
11Apvisay Sehón, apvisqui nic nat nipyesicsa amorreos.
Apvisay Og, apvisqui nic nat nipyesicsa co Basán.
Najan apyovoclhojo apquilviscaa co Canaán.#Nm 21.21-35.
12Apquilmilasquic nic nat yoclhilhma apancaoc, yoyam ellhocac Israel apquilmolhama.
13Visqui ingac.
Innec ayaco lhip apvisay cotmongvoycamlha nelha.
Colvoncamejec mataa lhip apvisay cotmongvoycamlha nelha.
14Visqui ingac etnejic sat apyicpilquemo apnaymacoc (apquilpeyvescasquiclha).
Visqui ingac etnejic sat apcamliyam nipyesicsa apquilancam.#Dt 32.36.
15Cotnaja nimpayvomó lhama apancaoc quilaycmasquiscama actomja oro y plata.
Enlhit apanco apquillanay mataa quilaycmasquiscama.
16Yitne inyicje atong quilaycmasquiscama, cotyepejec mataa acpayvam.
Yitne inyicje ataoc quilaycmasquiscama, colvitay mataa asoc.
17Yitne inyicje ajaycaoc quilaycmasquiscama, mepqui allingay mataa asoc.
Mepqui ayinamam, mepqui acyimnatem anquenyic quilaycmasquiscama.
18Apquilno enlhit apquiltomja apquillanay quilaycmasquiscama.
Apquilno enlhit apquiltomja apquilayo quilaycmasquiscama.#Sal 115.4-8; Is 44.9-20; Jer 10.1-16; Ap 9.20.
19Quellhip Israel apquilmolhama, eltime apquilayo Visqui ingac.
Quellhip sacerdotes, eltime sat apquilayo Visqui ingac.
20Quellhip Leví apquilmolhama, eltime sat apquilayo Visqui ingac.
Quellhip apquilyiplovquiscama Visqui ingac, eltime sat apquilayo Visqui ingac.
21Innec ayaco Visqui ingac tingma Sión.
Apmaclha apanco tingma Jerusalén.
Innec ayaco Visqui ingac.
Currently Selected:
SALMOS 135: ENHL
Highlight
Copy
Compare
Share
Want to have your highlights saved across all your devices? Sign up or sign in
