PROVERBIOS 31
31
Aplhanmaclha Lemuel
1Aplhanmaclha apvisqui Lemuel co Massa, actomja ilhnic nat altimnascama inquin:
2Lhip sictamongvoyam, sictimquiscama alhta lhip, apjalhenmo Dios silmalhnancama. Ingyeylhojo sicpayvam:
3Notne nasa apcayo quilvanaa naysicsa altemaclha ancaoc. Altomja alhta mataa quilvanaa alsilhnanoncama apquilviscaa.
4Notingya nasa anmin, somcoc mataa apyinaycaoc apquilviscaa anmin najan uva ayingmenic.
5Yitnec sat ancoc anmin ayajem, colvoncamoc sat singanamaclha Dios, colvoncamoc sat apquilpeyvescasquiclha enlhit mepqui apquilnatam.
6Ingyane sat elyinamcoc anmin enlhit acyajapmo apquilvalhoc.
7Elyinamcoc siclho, natamin colvoncamoc sat apquillingaycamco mepqui asoc, najan apquillingaycamco acyimtalhnama.
8Iyimnaticsojo sat lhip appayvam, elmiyovacpoc sat enlhit melyimtalhnamo.
9Iyimnaticsojo sat lhip appayvam, jingiltingyasquis actemaclha acpeyvomo. Elmiyovacpoc sat mepqui apquilnatam najan mepqui ayajamalhco apquilvalhoc — nic nat intomjac inquin.
Mayayoclha quilvana acvascapma
10Silhtec mataa ningvitay quilvana mepqui actamongvaycmolhma. Actomja ningayo as quilvana acyitsomalhca asoc acmamnave.
11Apyasamcoc atava actemaclha anco acpeyvomo. Colhic sat acmesa asoc alaymomalhca.
12Actomja ayasicjayo atava najan ayimlaycmo aclhamoclhojo acnim.
13Intingyac mataa nipquesic apva najan tamama collana asoc ningilmaycam.
14Cat mataa amay aclhingam actingyey asoc alaymomalhca.
15Alhtooc mataa aclhaticjay, cotyapma acnim. Intingyascasquic mataa actom ayitquic najan acmolhama altimesaycam.
16Inyinyovquic alhta acyanmongam acmam amyip ningilcacjam. Inquinaclhec yamit ayitcoc solyatictama.
17Ayimpejic innac as quilvana. Intamjam mataa mepqui acyampay.
18Inlhamaseclhec mataa alnatam ayinyema actamjaycam. Ajolhec mataa actamjaycam alhtaa.
19Avanquic acyipnatem apava najan acnilhpongam.
20Actomja ayimlaycmo melyimnatem najan apquiljalhemap.
21Apyitnec apava ningalamalhca, mongacyejec piyam matsamange.
22Avanquic collana ningalamalhca manto. Apyitnec apava apquilhyevay.
23Apnec mataa atava natingma nipyesicsa ningayo apquilpamejitsomap.
24Inquillanac mataa ningilantalhnama najan ningyapmam cotac acyanmongam.
25Ningayo actomja as quilvana. Cacyejec mataa asoc yoyam covac sat.
26Acyascamco anco as quilvana. Avanquic coyascasingvomoc anaymacoc.
27Acmovan innac colhingsic actamjaycam tingma ac, mepqui ayanjingvoyam.
28Innec ayaco ayinyema atava najan ayitquic:
29Tasoc anco lhiya, am colhno moc quilvana lhalhma anco — aptomjac mataa.
30Comascoc sat actemaclha singayo ingmoc. Colhic sat mataa ayaco quilvana actamilaycam avalhoc.
31Ellingas sat natingma actemaclha mayayo as quilvana. Ellingas sat actemaclha acmovan najan acvascapma as quilvana lhalhma anco.
Currently Selected:
PROVERBIOS 31: ENHL
Highlight
Copy
Compare
Share
Want to have your highlights saved across all your devices? Sign up or sign in
