PROVERBIOS 30
30
Aplhanmaclha Agur
1Eycaso appayvam aplhanmaclha Agur, Jaqué apquitca, apquinyemac tingma Masa. Aptomjac nic nat Agur apcanya Itiel najan Ucal:
2Paj coo acyascamco evalhoc, malha ayanem coo nipyesicsa enlhit.
3Mepqui sicyascamco coo, paj oyasingvocmoc mocjam apvisay Dios apyimtalhnamo.
4¿Apmiyaclhe ya netin enlhit? ¿Apvayventa ya mocjam apyascamco enlhit? ¿Soc enlhit apmaycam apmic alhcajayam najan piyam? ¿Soc enlhit aptalhnama actomja ayalomalhca yingmin acvanyam? ¿Soc enlhit aptimesquiscama acvamlha navayc as nalhpop? ¿Apyasamco ya lhquip apvisay apanco, najan apvisay apquitca?
5Visqui ingac aptomja singmasma, acyitna inlhojo mongyasquiyam. Mongilyascamejec mataa appayvam aplhanma mepqui apyeycajascaoc.#2 S 22.31; Sal 18.30.
6Mongvanquejec ongilpalhacsic nimpayvam inganco, jingilyascasingvomoc sat Dios ningiltomja ningmovan amyaa.
7Dios Visqui ingac, anit asoc pac olmalhnac jimquecsic naysicsa sictiyascam.
8Jeyas sat actemaclha movan amyaa najan ningyinimquiscama. Nongyane nasa otyisam mepqui silnatam, paj najan acma silnatam. Jimques sat sictom acmenmalhem as ningvamlha nac jay.#Mt 6.11.
9Colhenejec sat evalhoc lhip, acyitna inlhojo cascama silnatam, mepqui siclhanma lhip apvisay. Ominyilhic sat coo, mepqui inlhojo silnatam, cotnejic sat sicvenéycam lhip apvisay Dios Visqui ingac — alhta actomjac coo — nic nat aptomjac Agur.
10Mongvanquejec ongilyamnam enlhit aptimesaycam napato apvisqui pac. Apvanquic jingilyamnam nincoo lha, onlingamcojoc sat acyanmongayclha.
11Apquiltemaclha enlhit: apquilyamnam apquilyap, mepqui apquilayo inquin.
12Apquiltemaclha enlhit: apquilanem ayalhnayo apquilvalhoc, mepqui mataa apquilalhnascama.
13Apquiltemaclha enlhit: apquilanem apquilyimtalhnamo, apquilvenam mataa poc.
14Apquiltemaclha enlhit: apmaoc alyitsomalhca sovo alvinatem, yoyam elnapoc enlhit mepqui apquilnatam lhalhma anco.
15Nincoo ningyitsomalhca siyaning, mataa actemaclha anco: ¡Mocjam, mocjam!
Mocjam tres asoc acvaycmo cuatro, mepqui mataa ayastingam:
16Acvisay malhic tacjalhop, moc acvisay quilvana cotay ayitca, moc acvisay lhopactic acyamay ayaymalhca yingmin, moc acvisay talha ayaymalhca alhpongja.
17Yitnec sat ancoc ningvenéycam tata ingac najan meme ingac acvanyam, onlingamcojoc sat acmasom: eltaclhamcoc sat ingataoc mama apquitcoc, jingiltovcamcoc sat mama apyivey.
18Paj oyasingvocmoc mocjam natqui asoc acvaycmo cuatro asoc:
19Actemaclha aplhingam nitno mama apyivey, actemaclha alpilhyevaycam netin mataymong nimisma, actemaclha aclhingam barco netin yingmin payjoc yingmin acvanyam, actemaclha alasicjamalhca quilvana najan enlhit.
20Eycaso actemaclha quilvana acyamasma atava acpatjeteycaoc poc enlhit: Actovquic coo, alalhnasquic ejatong, mepqui sicsilhnanomalhca ajanco — intomjac.
21Natqui apquiltemaclha enlhit acvaycmo cuatro, ayinyema ningay nincoo:
22Aptomjaclhec sat ancoc apvisqui rey enlhit apmomap, apvitac sat ancoc cotlaycaoc nintom enlhit acyeyjamelhma.
23Invitac sat ancoc atava quilvana alanatama, quilvana acmomalhca cotniclhac sat avisqui tingma.
24Cuatro navjac ayitcoc, altomja alyascamco anco, am elhno enlhit apyascamco:
25Apquilvisay japong mepqui apquilyimnatem, apquilansayclha aptoycaoc.
26Alvisay tejones aclhamoclhojo, aleyvomaclha naysicsa mataymong alyivey.
27Apquilvisay sová apquilpasmeyquiclha, mepqui apvisqui apancaoc.
28Apquilvisay pojojoy comaymenta, apquilantalhna apvisqui rey tingma pac.
29Natqui altomja alyimnatem acvaycmo cuatro:
30Acvisay yamacmeyva asoc navjac aclom, mepqui mataa ayay, mepqui ayinyem.
31Acvisay tataa inquinavo acyimnatem anco apcatic, apvisqui rey, apnalayclha singilpilhtetemo appintalhnama.
32Yitnec sat ancoc ayajamalhco ingvalhoc, incaymalhquic colhenic ingvalhoc yavamlha ontimjic.
33Ningyimnatescama leche, ongvitac sat mantequilla, ninticpaycam apvajic ingmoc, cotyapoc sat ema pac, ningyimnatescama ninlom, coyiplovjoc sat ningilnapomalhca.
Currently Selected:
PROVERBIOS 30: ENHL
Highlight
Copy
Compare
Share
Want to have your highlights saved across all your devices? Sign up or sign in
