PROVERBIOS 3
3
Nintemaclha yavamlha ongyiplovcasojo
1Lhip sictamongvoyam: Iyiplovcasojo mataa actemaclha singiltamsoycaoc. Coyit mataa apvalhoc siyanamaclha coo.
2Lhip sictamongvoyam: Etyisam sat lhip acvoncaclhojo aclhamoclhojo años, acyiplomo actamilaycam lhip apvalhoc.
3Lhip sictamongvoyam: Nolvatesquim nasa aptemaclha apcasicjayo najan actomja nasoc anco, coyit sat apvalhoc. Colhojoc sat actemaclha apnatanma.
4Lhip sictamongvoyam: Coyispalhcac sat lhip aptemaclha napato Dios najan nipyesicsa apnaymacoc enlhit.#Lc 2.52.
5Lhip sictamongvoyam: Nongyane nasa colhic ayaco lhip apvalhoc, ingyane sat colhic ayaco Dios.#Pr 12.16.
6Lhip sictamongvoyam: Colhen sat lhip apvalhoc Dios naysicsa apyiplovquiscama, colhic sat acyantamaclho lhip nintemaclha acpeyvomo, acno amay acpeyvomo.
7Lhip sictamongvoyam: Nongyane nasa colhic ayaco lhip apyascamco apanco, itne sat apcayo Dios, noyiplovquis nasa nintemaclha acmasom.
8Eycaso acyitsomalhca panatem, actomja acyimnatescama lhip apyovoclhojo.
9Lhip sictamongvoyam: Ingyane sat colhic ayaco Dios ayinyema lhip apmescama apquilnatam, najan apmescama lhip acyilhna, apvita inlhojo siclhoc anco mataa.
10Colhamiclhac sat asoc apanco acyitnamaclha lhip apquilnatam, najan mepqui apsovjomo lhip acyilhna ayingmenic sat cotnejic.
11Lhip sictamongvoyam: Notanov nasa eltamsacpoc lhip ayinyema Dios. Notanov nasa aplingamco inlhojo apyanmongsayclha Dios lhip aptemaclha.#Job 5.17; He 12.5-6.
12Apyanmongsaclhec Dios nintemaclha inganco naysicsa singasicjayo, yoyam jingilmeyvoc nincoo.#Ap 3.19. Acno enlhit apyanmongsayclha aptemaclha apanco apquitca mayasicjayo.#Dt 8.5; 2 S 7.14; He 12.5-6.
Actemaclha acyascamco ingvalhoc
13Ningilinyejemo mataa nincoo, acyitna inlhojo acyascamco ingvalhoc, ningiltomja inlhojo ningyascamco.
14Actamila anco ningyascamco, am colhno asoc acmamnave plata najan oro.
15Acmamnave anco ningyascamco, am colhno asoc acmamnave alnatanma. Acmamnave anco ningyascamco, am colhno asoc acmamnave ayitsepma ingnenyic.
16Colhic sat mataa singaco, najan ningilnatam, najan nintiyascam acvoncaclhojo, acyitna inlhojo acyascamco ingvalhoc.
17Acyascamco ingvalhoc ayinyema mataa acpayjayclha ingvalhoc najan actamilaycam ingvalhoc.
18Acyascamco ingvalhoc actomja singyimnatescama ingnenyic, ontimjic ningilinyejemo.
19Apquillanac nic nat Dios netin najan nalhpop, ayinyema acyascamco apvalhoc.
20Apquilhpancasquic nic nat yingmin acvanyam, aptimescasquic nic nat yingmin acmamay, ayinyema acyascamco apvalhoc.
21Lhip sictamongvoyam, coyit sat mataa acyascamco apvalhoc, itne sat mataa apyascamco.
22Colhic sat lhip acyimnatem apnenyic, colhic alnalhimquisa lhip, malha lamom.
23Mengyacyejec sat lhip aplhingam, mengyacyejec sat asoc acyimtalhnama.
24Mengyacyejec sat lhip naysicsa aptiyanma, mepqui acvitay apvanmoncama asoc.#Sal 3.5; 4.8.
25Mengyacyejec sat actiyam tacja, actomja alnapma enlhit apquilmapsomcaa.
26Singyilhanmom mataa Visqui ingac, mongacyejec sat trampa tava apac yoyam jingilmoc.
Nintemaclha nipyesicsa ingnaymacoc
27Lhip sictamongvoyam: Apvanquic sat ancoc lhip epasmoc poc enlhit mepqui apquilnatam,#Mt 5.42. ipasmiclha quilhvoc anco.
28Ipasim sat lhip quilhvo nac jay, noncolhen nasa apvalhoc secaseclha, yoyam epasmoc.
29Lhip sictamongvoyam: Noncolhen nasa apvalhoc lhip esilhnana aptimem poc, apvita inlhojo mepqui apsilhnanomap apanco aptimem poc.
30Noncolhen nasa apvalhoc lhip ingyatingmacpojo aptimempoc, apvita inlhojo mepqui apsilhnanomap apanco aptimem poc.
31Lhip sictamongvoyam: Noyasipquis nasa lhip aptemaclha enlhit apyimtalhnesomap apanco, novjaniclhojo nasa aptemaclha apanco.
32Ningiltanovalhquic mataa napato Dios, apvita inlhojo nintemaclha acmasom. Innec mataa singaco napato Dios, apvita inlhojo nintemaclha acpeyvomo.
33Apquiltanovacpec ingnaymacoc ningmolhama, acyitna inlhojo apquiltemaclha acmasom. Innec ayaco mataa ningmolhama, acyitna inlhojo aptemaclha acpeyvomo.
34Innec mataa singvenneycam Dios, acyitna inlhojo nintemaclha ningvenneycam. Innec mataa singimlacmo, mepqui inlhojo ayajamalhco ingvalhoc napato Dios.#Stg 4.6; 1 P 5.5.
35Ongilmancangvomoc sat mataa, acyitna inlhojo nintemaclha inganco ningmasom. Colhic sat singaco ningiltomja ningyascamco, ayinyema actamilaycam ingvalhoc.
Currently Selected:
PROVERBIOS 3: ENHL
Highlight
Copy
Compare
Share
Want to have your highlights saved across all your devices? Sign up or sign in
