PROVERBIOS 27
27
1Mongvanquejec ongillhenic asoc alyivey, yoyam ongillana secaseclha. Paj ongilyasamcoc yavamlha cotnejic secaseclha.#Stg 4.13-16.
2Tasic mataa colhic singaco ayinyema ingnaymacoc, somco inyicje ongajalhcojo inganco.
3Yimtilhec mataa mataymong najan lhopactic. Yimtilhec anco aclom ingvalhoc ayinyema aptemaclha apanco acyeyjamelhma.
4Yimtilhec mataa aclom ingvalhoc najan nintemaclha ninlom, somco eyca aclhenseycam ingvalhoc, am colhno moc.
5Anit actemaclha ningasicjayo: actamila anco singiltamescama, am colhno mepqui singiltamescama, asilhtec actema nac lha.
6Tasi inyicje cascoc ingvalhoc singiltimesquiscama ingmoc, am colhno aptemaclha singayo cotnaja ingmoc.
7Ingilastinquic sat ancoc nintom, ongiltanovac sat yamyovjene. Mayic sat ancoc jingilnapac, ongyispac sat acyovoclhojo nintom, colhojoc sat yamyovjene.
8Nata ayitcoc acyamasma alhancoc, colhnanmoc sat mocjay. Ningno nincoo ninlhinganyam mocjay ningileyvam cotnajaclha ningaoclha.
9Acpayjayclha ingilvalhoc ayinyema asoc acmasis. Acyisponcama ingilvalhoc ayinyema ningilpamejitsomalhca ingmoc.
10Mongvanquejec mataa ongyinyoc ingnaymacoc najan tata ingac apnaymacoc.
Mongvanquejec mataa jingilpasmoc ingilyalhing, acyitna inlhojo problema ingvalhoc.
Aptasic mataa vecino ingmoc, am elhno ingyalhing apna mocjay.
11Payjeclhec ingilvalhoc ningvita (inquitca) nintamongvoyam apyascamco. Ingvanquic mataa ongilatingmojo apquiltomja singvenéycam.
12Ningvitac nincoo covac acmasom, acyitna inlhojo acyascamco ingvalhoc, ongilyilhanmoc sat. Ninlingamcoc nincoo acmasom, ayinyema ninganem cotnaja acmasom, actemaclha anco acyeyjamelhma ingvalhoc.#Pr 22.3.
13Ningilpasmec sat ancoc apmaycaoc nasa solyayem metnaja ningmolhama. Jingilmalhnac sat nincoo lha, elyamong siclho. Incaymalhquic siclho jingilmecsic apcalomap, colhejec acyascacmo etajicsojoc sat mocjam solyayem apmaycaoc.#Pr 6.1-5; 20.16.
14Alhtooc ninlhaticjay saludar ingmoc ningyimnatesa nimpayvam, colhojoc sat macvenéycam apvalhoc ingmoc.
15Intava aclhamasomalhca najan ayatingmomalhca, colhojoc sat yingmin ayitcoc acyeysoma asoc ingac naysicsa acmamay.#Pr 19.13.
16Mongvanquejec ongilvanmacsic as quilvana (ongnovsic) colhojoc sat ningnovquiscama alhcajayam, colhojoc sat ningilpatjetma aceite.
17Ningilmaycam lima ontimjic ningilmalhnaycam sovo. Lhama enlhit aptomja apquiltamescama poc enlhit.
18Nintamilcasquic sat ancoc higo yamit, ontovamcoc sat higo acyilhna. Ningiltimesam sat ancoc visqui ingac, colhic sat singaco.
19Yingmin actomja malha laneyo intalhamavo, ongilanojo ningaat. Ingvalhoc actomja laneyo intalhamavo, ongilanojoc nintemaclha inganco.
20Mepqui ayastingam mataa alyascama ingjangaoc, mepqui ayastingam ingvalhoc actemaclha ayitsepma ingnenyic.
21Talha actomja ayalhnascama oro najan plata. Mayayoclha enlhit najan mepqui ayayo, cotnejic ningyicpilquemo aptemaclha enlhit.#Pr 17.3.
22Ningalhimcasquic sat ancoc ninticlhiclhamaclha enlhit acyeyjamelhma, malha nintipilquem actic, comasquejec sat aptemaclha apanco acyeyjamelhma.
23Pac ongiltamilsic mataa ninatoscama nipquesic najan yataay, najan apquilyinatamaclha.
24Comasquingvomoc sat ningilnatam, najan corona appocanma apvisqui.
25Ontingyac sat mataa paat ongilyatemenic amyip najan netin inquilhe, eltovamcoc ninatoscama.
26Nipquesic apva ongillanac sat ningalomalhca. Ongitlhaoc sat yataay ongvita acyanmonga, ongilmoc sat mocjam amyip.
27Conyemac sat leche ninatoscama yataay, elyinamcoc najan eltovamcoc sat ningmolhama familia, najan singiltimesaycam enlhit najan quilvanaa.
Currently Selected:
PROVERBIOS 27: ENHL
Highlight
Copy
Compare
Share
Want to have your highlights saved across all your devices? Sign up or sign in
