PROVERBIOS 26
26
1Paj mataa acmatsamangi naysicsa acmajat, paj mataa acmamay mepqui yipjopay, paj mataa mayayo enlhit acyeyjamelhma.
2Malha nata ayitcoc ayinyema mepqui alhancoc, colhojoc sat singvenéycam mepqui ningilsilhnanomalhca, comejec sat ingvalhoc.
3Mongvanquejec mepqui ningiltamescama nolhing, mongvanquejec ongillhingsic yamelyeyjaycoc mepqui atong, copvanquejec acyeyjamelhma mepqui malyicpilhquetem.
4Mongilatingmamejec sat singilmalhnaycam enlhit acyeyjamelhma, onlhojoc sat nincoo lha acyeyjamelhma. 5Ongilatingmojoc sat appayvam acyeyjamelhma, yoyam emancangvomoc sat.
6Ningilapajasquic sat ancoc acyeyjamelhma esovc amyaa, onlhojoc sat ningyatemenma ingmancoc, onlingamcojoc sat acmasca.
7Mepqui apyimnatem enlhit apyateyaycam, colhojoc appayvam enlhit acyeyjamelhma.
8Paj cotjetalhcac mataa inyelpa ningilmaycam vanteta, colhejec mataa ayaco enlhit acyeyjamelhma.
9Naysicsa anmin singajem, monlingamquejec mataa singyiplhalhem amaoc. Mongiltamsalhquejec mataa, acyitna inlhojo acyeyjamelhma ingvalhoc.
10Nintingyac sat ancoc singiltimesaycam enlhit acyeyjamelhma, onlhojoc sat nincoo ticyovam inyap.
11Intingyac mataa simjing acyiclhama,#2 P 2.22. cotaviclha mocjam. Apnasoc enlhit acyeyjamelhma elheniclha appayvam.
12¿Apne ya enlhit aplhenacpo apanco apyascamco? Aplhenacpec apanco enlhit acyeyjamelhma.#Pr 29.20.
13Jingilyacmoc sat ancoc ongiltamjam, onlhenic sat yamacmeyva acyanca amay.#Pr 22.13.
14Copvanquejec mataa tingma mepqui apatong, mongvanquejec mataa mepqui ningyitnamaclha jingilyacmo inlhojo ongiltamjam.
15Jingilyacmoc sat ancoc ongiltamjam, onlhojoc sat enlhit appayescama apmic emoc nintom, am eyca etajesiclhac apmic etoc aptom.#Pr 19.24.
16Ningiltomja perezoso jingilyacmoc ongiltamjam, ninganem ningyascamco inganco, am elhno poc siete enlhit apquilyascamco.
17Ningilpasmeclhec sat ancoc apquilatingmomap enlhit, colhojoc sat nintemaclha ningilpatjetma ajaycaoc simjing cotnaja nintoscama.
18-19Ningyimsasquic sat ancoc talha apyimpejic ingmoc, colhojoc sat nintemaclha ningyinimquiscama ingmoc, acyiplomo ninlhanma: Ningnayvom nac lha — sat ontimjic.
20Mepqui alhpongja cosponac sat talha. Mepqui enlhit acyeyjamelhma appayvam, comascoc sat ningilatingmomalhca.
21Ningvitac mataa talha, acyitna inlhojo alhpongja najan carbón atilh. Ningvitac mataa ningilatingmomalhca, apna inlhojo enlhit acyeyjamelhma.
22Ningilantipcasquic apvisay ingmoc actomja acmam ingilvalhoc. Malha acmasis ningiljalhenmo, jingilvoncamejec sat mataa.#Pr 18.8.
23Malha ningilmaycam alyinmom acyitsomalhca nimpayvam ayinyema ingvalhoc acmasom.
24Acmasis mataa ningillhanma nimpayvam naysicsa ningiltanoncama ingmoc. Eycaso ayinyema mataa ingvalhoc acmasom.
25Ongavojoc mataa appayvam enlhit apmapsom, acyitna inlhojo acmasis appayvam. Acmasom anco apvalhoc apanco.
26Ingvanquic ongilpocsic nintemaclha nintanoncama, colhic sat acpiquinayclha ayalhnaclhojo ingvalhoc napatavo enlhitaoc.
27Ningilmetmec sat ancoc malhic, etyamoc congne enlhit, ompalamoc sat nincoo congne. Ningilyinyovquic sat ancoc mataymong, cajic sat enlhit, nincoo sat onticyoc.
28Ningiltanovquic mataa ingmoc, ayinyema nintemaclha ningmovan amyaa. Ningiltovasquic mataa, acyitna inlhojo nintemaclha acmasis nimpayvam.
Currently Selected:
PROVERBIOS 26: ENHL
Highlight
Copy
Compare
Share
Want to have your highlights saved across all your devices? Sign up or sign in
