PROVERBIOS 24
24
- 19 -
1Lhip sictamongvoyam: Noyasipquis nasa lhip apnaymacoc melyascalhma. Nopalhavoclha nasa nipyesicsa maa.
2Yitnec alquitamsama apquilvalhoc enatovacsic lhalhma anco, somcoc mataa apquilpayvam.
- 20 -
3Ningyitsalhquic nincoo ningillanay tingma. Acyascamco ingvalhoc najan nintemaclha ningyascamco, colhojoc mataa tingma apvajac.
4Colhic sat aclhamasayclha ningilnatam congne tingma, najan asoc altamila najan ningyisponcama.
- 21 -
5Tasic anco nintemaclha ningyascamco, am colhno nintemaclha ningyimnatem. Aptasic apanco enlhit apyascamco, am elhno enlhit apyimnatem.
6Apquilpamejitsacpec mataa enlhit, yavamlha elnapacpoc. Ayinyema eyca apquilyascamco apanco, eltimjic apquilyimnatem.#Pr 11.14.
- 22 -
7Mepqui acyascamco ingvalhoc ayinyema mepqui ningyasingvoyam actemaclha ningyascamco. Mongvanquejec mataa ongilpasmoc nimpeyvescasquiclha amyaa.
- 23 -
8Cotnejic ningilvisay ticyovam yapmayc, ayinyema ningilpamejitsomalhca acmasom.
9Nintemaclha mongilyascalhma ayinyema acyeyjamelhma ingvalhoc, ongiltanovalhcac sat nipyesicsa enlhit lhalhma anco.
- 24 -
10Mepqui mataa ningilyimnatem, ayinyema ningilvatseycaoc nintemaclha acpeyvomo, ninlingaycamco inlhojo acmasom.
- 25 -
11Lhip sictamongvoyam: Ivomquis tap, apvita inlhojo lhip enlhit yoyam ematong. Ivomquis tap, apvita inlhojo lhip enlhit aplingaycamco apmatnam.
12¿Am ya alhta eyasamcoc lhip? Apvanquic Dios epquiniclha ayalhnaclhojo lhip apvalhoc. Apyasamcoc Dios actemaclha ingvalhoc nincoo, eyanmongsiclhac sat nintemaclha inganco.#Job 34.11; Sal 62.11-12; Jer 17.10; Ez 18.30; 33.20; Mt 16.27; Ro 2.6.
- 26 -
13Lhip sictamongvoyam: Itov sat lhip yamyovjene, atsic mataa ontoc yamyovjene.
14Acno najan actamila anco nintemaclha ningyascamco. Coyit sat mataa lhip apvalhoc actemaclha ningyascamco. Emyovacpoc sat lhip, acyitna inlhojo lhip acyascamco apvalhoc.#Pr 23.18.
-27 -
15Nocolhen nasa apvalhoc lhip ingyinmelham ingmoc appeyvomo, yoyam etvacsic. Notvas nasa aplhancoc enlhit appeyvomo.
16Aplingamcoc mataa acmasom enlhit appeyvomo, melvaticsejec sat apyiplovquiscama. Aplingamcoc mataa acmasom enlhit apmapsom, quilhvoc anco elvaticsic, memyovacpejec sat mataa.
- 28 -
17Lhip sictamongvoyam: Nocopayjiclha nasa apvalhoc lhip, apvita inlhojo aplingaycamco acmasom enlhit apquinmelhaycam. Nocopayjiclha nasa apvalhoc lhip, apvita inlhojo aplhinganyam apmapsom.
18Colcac apvalhoc Dios, apvita inlhojo lhip acpayjayclha apvalhoc napato apmapsom. Casilhtojoc sat apyanmongsayclha Dios aptemaclha apanco apquinmelhaycam.
- 29 -
19Noyasipquis nasa lhip enlhit melyascalhma, noyimtalhnesacpojo apanco napatavo apquilmapsomcaa.#Sal 37.1.
20Comascoc sat apquileyvam, malha acsaponay calevascama, melmiyovacpejec sat maa.
- 30 -
21Lhip sictamongvoyam: ¡Itne sat mataa apcayo Dios najan apvisqui rey! Nopasmiclha nasa lhip enlhit apquilinmelhaycam Dios.
22Pilapcasquic quilhvoc anco enatovasacpoc. Colhic sat acyanmongseclho apquiltemaclha apancaoc, ayinyema Dios najan ayinyema apvisqui rey.
Moc mocjam singiltamsoycaoc
23Moc mocjam singiltamsoycaoc ayinyema enlhit apquilyascamco:
Somcoc aptemaclha enlhit apyicpilquemo, aptomja apmasma enlhit apmapsom, najan aptanoncama enlhit appeyvomo.
24Etanovacpoc sat enlhit apyicpilquemo nipyesicsa enlhit lhalhma anco, aptomja apmasma enlhit apmapsom.
25Aptasic mataa enlhit apyicpilquemo, mepqui apmasma enlhit apmapsom, colhic sat acyanmongseclho aptemaclha apanco. Colhic sat ayaco enlhit apyicpilquemo nipyesicsa enlhitaoc.
26Actamila ninlhanma nimpayvam, singilmalhneclho inlhojo, acyitsomalhca nimpitsisma apmalhimpenic ingmoc. (Actomja asoc monquinatquiscama ningilasicjamalhca nincoo.)
27Onsavojoc siclho ningiltamjaycam amyip, onquiniclhac sat actic. Natamin ongillanac sat tingma, ontingyac sat familia.
28Mongvanquejec ongiltipsic apvisay poc mepqui apsilhnanomap apanco. Cotnejic sat ningmovan amyaa ningilinmelha inlhojo poc.
29Mongvanquejec ongilyanmongsiclhac aptemaclha apanco, aptomja singiltovascama siclho nincoo.
30Acmiyaclhec coo amyip apanco enlhit coyoyam etnajam, najan ayimjaclha uva enlhit apanco acyeyjamelhma:
31Acvitac coo ayimjaclha milovqui, najan apjalhtam ápac nayava maa.
32Pilapcasquic alhta sicvita. Inmec alhta evalhoc actemaclha sicvitay:
33Intomjac evalhoc: Otyinic sat mocjam, olovsic sat mocjam sicyapmay, yejemec sat almam emeoc ningilmaycam — intomjac evalhoc.
34Quilhvoc onlingamcojoc sat mepqui asoc, malha ninlingaycamco singilimpocjay. Jingajic sat mayic, malha singajem ticyovam inyap — alhta intomjac acyasingvoyam evalhoc.#Pr 6.10-11.
Currently Selected:
PROVERBIOS 24: ENHL
Highlight
Copy
Compare
Share
Want to have your highlights saved across all your devices? Sign up or sign in
