PROVERBIOS 23
23
- 6 -
1Lhip sictamongvoyam: Colhen sat mataa apvalhoc aptemaclha apyimtalhnamo apvisqui, apcanyacpo lhip etasomoc.
2Itamilsojo sat lhip apvalhoc naysicsa mayic ayajem, apvita inlhojo nintom.
3Nosilhnanacpojo nasa apanco, apvita inlhojo apitic, eyinimsacpoc sat lhaja.
- 7 -
4Notingya nasa lhip cascama apquilnatam, apyasamcoc lhip yavamlha cotnejic.
5Naysicsa aptingyey lhip cascama apquilnatam, covonquepoc sat maa, malha mama apvonquepma sat cotnejic.
- 8 -
6Noncotsip nasa apnenyic etasomoc lhip enlhit apmasma asoc, apvita inlhojo acyivey apitic.
7Aplinga inyicje lhip apcanyomap: ¡Itov, iyin! — intomjac aplingay lhip. Aptemaclha apanco apyinimquiscama.
8Eyiclhic sat lhip natamin aptom. Alhto sat cotnejic apcayo lhip as enlhit.
- 9 -
9Noyascasingvom nasa lhip enlhit acyeyjamelhma, evennacpoc sat lhip.
- 10 -
10Yitnec lhip apanco amyip. Notne nasa apanco amyip actomja apancaoc apquilyeyjeycam. Yitnec nano allanomalhca monquinatquiscama navayc amyip.
11Apnec maa apyimtalhnamo apmasma apquilyeyjeycam. Emancangvomoc sat lhip napatavo apquilpeyvescasquiclha.
- 11 -
12Colhen mataa apvalhoc lhip eltamsacpoc, ayinyema enlhit singiltamescama.
- 12 -
13Nomyov nasa elyicpilhquetacpoc apquitcoc melyajayquiclho, mengyitsepejec sat maa.
14Eltamesacpoc sat apquitcoc, colhic sat actamilaycam apvalhoc aclhamoclhojo acnim aptiyascam.
- 13 -
15Lhip sictamongvoyam: Copayjiclhac sat evalhoc, sicvita inlhojo lhip acyitna acyascamco apvalhoc.
16Copayjiclhac sat evalhoc, sicvita inlhojo lhip appayvam nintemaclha acpeyvomo.
- 14 -
17Noyasipquis nasa lhip apquiltemaclha enlhit melyascalhma. Ivascap sat mataa etnejic apcayo Dios.#Sal 37.1-4.
18Emyovacpoc sat lhip, aptomja inlhojo apcayo Dios. Comasquejec mataa lhip aptemaclha meyasquiyam Dios.#Pr 24.14.
- 15 -
19Lhip sictamongvoyam: Ingyeylhojo mataa lhip, etnejic apyascamco. Ivascap sat lhip apyiplovquiscama nintemaclha actamila.
20Nopasmiclha nasa lhip apnaymacoc anmin alnapma, najan mengyascama aptoycaoc.
21Mepqui apquilnatam enlhit mengyascama elyinamcoc anmin, najan mengyascama eltovamcoc. Apjapac mataa apava as enlhit, colyacmo eltamjam.
- 16 -
22Ingyeylhojo mataa lhip apyap appayvam najan inquin acpayvam. Novennam nasa altomjayclho alvanyam.
23Itingya sat lhip actomja nasoc anco, actomja singyascasingviyam najan singiltamescama, najan actemaclha ningyascamco. ¡Noyinyov mataa lhip!
24Payjeclhec mataa apvalhoc apyap, apvita apquitca aptemaclha apyascamco najan aptamila.
25Ivascap sat mataa lhip, yoyam copayjiclha mataa apvalhoc apyap najan inquin.
- 17 -
26Lhip sictamongvoyam: Ingyeylhojo mataa sicpayvam, jelanojo coo, ivjanaoc sictemaclha coo.
27Ingyavojo mataa lhip quilvana alanatama cotnaja aptava. Acyitsomalhca acmasom, malha singilmam trampa congne malhic.
28Inyilhalhcoc mataa as quilvana nicja amay, yoyam jingminyilhic. Aplhamoclhojo apquiltomja apquilsilhnanomap, ayinyema as quilvana.
- 18 -
29¿Jalhco ayinyema ninlingaycamco acmasom? ¿najan ningnatjemo? ¿najan ningilatingmomalhca? ¿najan ningilyimsem ningilnapomalhca? ¿najan moc actemaclha ingataoc?
30Ayinyema mataa ningyam anmin, nintingyey mataa moc actemaclha anmin.
31Lhip sictamongvoyam: ¡Notingya nasa anmin, nosilhnanacpojo apanco lhip! ¡Nocolhen nasa apvalhoc lhip actomja actamila anmin, najan acmasis mataa ongyinamcoc!
32Actemaclha anmin, colhojoc sat yamacyeyva. Asquejec sintaclhama yoyam jingajic.
33Anmin ayinyema singyeyescama olhma, acmasom ningilyataycam, acmasom ningvitay asoc.
34Colhojoc ninlhingam, malha naysicsa alyayajayam yingmin acvanyam. Colhojoc sat ninlhingam, malha netin barco actiyascam nayingmin nipyesicsa yatepiyam.
35Monlingamquejec mataa acmasca, singilticponga inlhojo ninlhalhmaa. Monlingamquejec mataa acmasca, singyicpilhquetamcaa ninlhalhmaa. Natamin ninlhaticjay mocjam, ontingyac sat mocjam anmin, yoyam ongyinamcoc.
Currently Selected:
PROVERBIOS 23: ENHL
Highlight
Copy
Compare
Share
Want to have your highlights saved across all your devices? Sign up or sign in
