SAN MARCOS 4
4
Apyitquiscama Jesús mayinayclha actic
(Mr 13.1-9; Lc 8.4-8)
1Apquillhicmosquic alhta mocjam amyaa nicja acyayengviyam. Apquicjingvoctac alhta appintalhnama enlhit. Apquinatveclhec alhta avalhoc barco, yoyam elhic.#Lc 5.1-3. Apquilanvocmec alhta enlhitaoc niyava yingmin. 2Apquiltimnasquic alhta aclhamoclhojo apyitquiscama. Eycaso alhta apquillhicmoscama: 3—Quip elaylhojo. Aplhinquic nic nat apcanma, yoyam emayvesam actic. 4Apmayvesamquic nic nat actic. Inpalvocmec nic nat nicja actic amay. Natamin acpalvaa nata, intovcamquic nic nat actic. 5Inpalvocmec nic nat actic tacjalhit mataymong. Acyapaleycaoc lhopactic tacjalhit mataymong. Yejemoc nic nat actepa ayinyema lhopactic acyapaleycaoc. 6Invaac netin acnim ayaja majat. Am nic nat quipmenaoc ma, yejemoc acyamamco. 7Inpalvocmec nic nat nicja actic naysicsa yammeyac. Inquictinquic nic nat yammeyac. Inquimpanatesquic nic nat, am coyilhnac. 8Inpalvocmec nic nat nicja actic actamilaclha lhopactic. Intipquic nic nat, inquictinquic najan. Inlhamaclhec nic nat acyilhna. Lhama actic nic nat invocmoc treinta actic. Moc actic invocmec sesenta actic. Moc actic invocmec cien actic.
9Ingjaycaoc innac nincoo, pac ongilaylhojo —alhta aptomjac Jesús.
Aptemaclha Jesús eltimnacsic apyitquiscama
(Mt 13.10-17; Lc 8.9-10)
10Apnaclhec alhta aplhapco Jesús. Apquilmalhningvoctac alhta apquillhalhmaa najan doce apquiltamsoycaoc actemaclha apyitquiscama. 11Apcatingmavoc alhta Jesús:
—Apvancaac quellhip elyasingvomoc asoc acyilhamalhca Dios apquilnancascama. Eyca enlhit melpalhaviyam eltimnasacpoc actemaclha sicyitquiscama. 12Elanojoc sat yicje, eyca melvityejec sat. Elaylhojoc sat yicje, eyca melyasingvomejec sat. Melyanmongsejec sat apquilvalhoc, colmascosalhquejec sat melyascalhma.#Is 6.9-10.
Appeyvescasquiclha Jesús actemaclha apyitquiscama
(Mt 13.18-23; Lc 8.11-15)
13Aptomjac alhta apquilanya Jesús:
—Am lhac elyasamcoc quellhip siltimnaycam sicyitquiscama. ¿Jalhco actema elyasamcojoc quellhip moc silyitquiscama? 14Enlhit apquinayclha actic aptomja apquiltimnascama tasic amyaa. 15Napocja enlhit acyitsomalhco actic acpalviyam nicja amay. Apquillingac ancoc amyaa, yejemoc acvaa Satanás. Inliquic amyaa mayinayclha apquilvalhoc enlhitaoc. 16Innoc najan poc enlhit acyitsomalhco mayinayclha actic tacjalhit mataymong. Apquillingac ancoc amyaa apquilsovascamo almam apquilvalhoc. 17Mepqui quipmenaoc amyaa apquilvalhoc enlhit. Am elinlhanacmoc mataa. Aplingamco sat ancoc mactovascama najan malminlhinaycam ayinyema tasic amyaa, eyca pa elvatsamcoc actemaclha apquilinlhanyam. 18Poc enlhit eyca acyitsomalhco actic mayinayclha coning yammeyac. Apquillingac anco amyaa, 19moc asoc eyca ayinyemaclha inquilvanatescacmoc amyaa: Asoc aclhanma apvalhoc lhalhma anco, najan acsilhnanoncama solyayem, najan ayitsepma apnenyic asoc acmasom. Coylhejec acyilhna apvalhoc enlhit. 20Poc enlhit eyca acyitsomalhco actic mayinayclha actamilaclha lhopactic. Apquillingac ancoc amyaa, yejemoc almam apquilvalhoc. Inlhamaclhec apyilhna enlhit malha actic invocmoc treinta actic. Poc enlhit malha actic invocmoc sesenta actic. Najan poc malha cien actic —alhta aptomjac Jesús.
Cotalhcac sat asoc acyilhamalhca
(Lc 8.16-18)
21Apquiltimnasamquic alhta mocjam:
—¿Ninpicanma ya calevascama coning yamit aysicsic inlhoyqui laa coning ningyitnamaclha netin? Paj, ninquilhanmec netin lha.#Mt 5.15; Lc 11.33. 22Cotasalhcac sat asoc ayapomalhca. Colngasalhcac sat asoc acyilhamalhca.#Mt 10.26; Lc 12.2. 23Ingjaycaoc innac nincoo, pac ongilaylhojo —alhta aptomjac Jesús.
24Apquiltimnasamquic alhta mocjam:
—Collhenam sat ingilvalhoc amyaa ninlingay nincoo. Colhojoc sat acyanmongayclha acno ningilyipsatem asoc.#Mt 7.2; Lc 6.38. Ingyimjamesentac sat mocjam. 25Yitnec sat ancoc asoc, ongillhoveclhac sat mocjam. Yitnec sat ancoc lhama asoc, colhic sat sintapilhquiscaso asoc ingac —alhta aptomjac.#Mt 13.12; 25.29; Lc 19.26.
Apyitquiscama asoc ayictingam
26Apquiltimnasamquic alhta mocjam:
—Dios apquilnancascama acyitsomalhca enlhit apquinayclha actic. 27Aptinquic alhtaa, aplhaticjac alhtoo. Intipquic apquinayclha, inquictinquic anco. Meyasamcoc enlhit actemaclha ayictingam. 28Actiyapma anco asoc as nalhpop. Siclhoc apilhcapoc, natamin apyilhna, natamin quilyimnaquic apactic motajap.
29Quilyimnaquic sat ancoc actic, eyca pa elyatemenic. Invocmec anco acnaclhamalhquilha acyilhna —alhta aptomjac Jesús.#Jl 3.13.
Apyitquiscama mosiyov actic
(Mt 13.31-32; Lc 13.18-19)
30Apquiltimnasamquic alhta mocjam:
—¿Jalhco actema ongilyitquisic Dios apquilnancascama? ¿So actema ningyitquiscama colhojoc sat Dios apquilnancascama? 31Quitsic anco mosiyov actic, innoc inyicje moc actic lhalhma anco. 32Inquinalhquic sat ancoc actic, coctong sat. Yejemoc actomja acyiviy, quilyeycajangvocmoc aclhamoclhojo. Inpayjingvocmec actingaoc netin. Avanquic colyinavac nata ayitcoc coning pisquisca —alhta aptomjac.
Aptemaclha Jesús elhicmocsic apyitquiscama
(Mt 13.34-35)
33Apquiltimnasamquic alhta amyaa actemaclha aclhamoclhojo apquilyitquiscama. Acvamlha inlhojo, yoyam colmoc apquilvalhoc. 34Am alhta eltimnasac amyaa mepqui apyitquiscama. Apquillhicmosquic alhta aplhapcavo apquiltamsoycaoc.
Jesús apmascoscama piyam najan alyayajayam
(Mt 8.23-27; Lc 8.22-25)
35Intalhnacmoc alhta apquilpamejitsa apquiltamsoycaoc:
—Noc, ongiltamiclha tap acyayengviyam.
36Apquilhaclhec alhta niptamin apquiltamsoycaoc. Apquilyantamaclhec alhta Jesús avalhoc barco. Najan moc barco allhalhmaa. 37Yejemoc alhta apquilhcajacmo piyam apyimnatem. Innilhtinquic alhta mataa alyayajayam avalhoc barco. Quitlhincasquic alhta colana yingmin avalhoc barco. 38Aptinquic alhta Jesús barco atala netin aptiyanmeycaoc. Yejemoc alhta apquillhaticjasa:
—Visqui, ¿am ya incacoc apnenyic ongmascoc nincoo? —alhta apquiltomjac.
39Yejemoc alhta aplhaticja. Apquilyasquic alhta ilhma piyam. Aptomjac alhta apcanya yingmin:
—Nani, covanma —alhta aptomjac.
Yejemoc alhta apquinmantamo piyam. Natamin quilvineclhoc alhta ilhma. 40Aptomjac alhta apquilanya Jesús:
—¿Soctomja apquilaca nac qui? ¿Soctomja apquilyascacmo nac quellhip? —alhta aptomjac.
41Avanjec alhta apquillay apquiltamsoycaoc. Apquilpamejitsacpec alhta:
—¿Soc enlhit aso? Yejemoc apquilyajaclho piyam najan yingmin —alhta apquiltomjac.
Currently Selected:
SAN MARCOS 4: ENHL
Highlight
Copy
Compare
Share
Want to have your highlights saved across all your devices? Sign up or sign in
