JOEL 3
3
1Aptomjac nic nat Dios Apyimtalhnamo: Otnesquisic sat moc actemaclha nipyesicsa co Judá najan co Jerusalén.
2Ongvansiclhac sat apyovoclhojo enlhitaoc metnaja apquiltemolhama. Onaliclhac sat alvata acvisay Singyicpilquemo. Colhic sat alyicpilco enlhitaoc apquilinmelhaycam enlhitaoc Israel silyacyescama coo. Apquiltemaclha alhta apquilhpanquiscama enlhit ajancaoc najan apnatovascama yoclhilhma maa.
3Apquiltemaclha alhta apquiltovascama sicas, apquililhpanquisa enlhit silyacyescama coo. Apquilhaquic alhta apvapataoc najan avataoc acyanmongam solyayem. Apquilhaquic alhta solyayem acyanmongam anmin najan quilvanaa alanatama.
Macyicpilquemo enlhitaoc
4¿So apquiltingya yi quellhip co Tiro, najan quellhip co Sidón,#Is 23.1-18; Ez 26—28; Am 1.9-10; Zac 9.1-4; Mt 11.21-22; Lc 10.13-14. najan quellhip co Filistea?#Is 14.29-31; Jer 47; Ez 25.15-17; Am 1.6-8; Sof 2.4-7; Zac 9.5-7. ¿Quellhip ya elyanmongsiclha sictemaclha coo? ¿Soc sat jeltimesquisic coo? Quilhvoc sat oyanmongsiclha apquiltemaclha apancaoc quellhip. 5Apquilminyilhquic alhta quellhip plata ajanco najan oro ajanco. Apquilpatmaoclhec alhta asoc acmamnave apnincanma quellhip tingma apquilyivey apancaoc. 6Apnalaclhec alhta mocjay enlhitaoc co Judá najan co Jerusalén. Apquilhaquic alhta enlhitaoc apquilmomap nipyesicsa griegos. 7Onalovsingvoclhac sat coo apnamcaclha apquilmomap, oyanmongsiclhac sat apquiltemaclha apancaoc quellhip. 8Otlhaoc sat apquitquic quellhip, elmoc sat co Judá. Etlhaoc sat maa, elmoc sat enlhitaoc sabeos, yoclhilhma mocjay anco. Eycaso sicpayvam sicvisay Dios — alhta aptomjac Dios Apyimtalhnamo — nic nat aptomjac profeta.
9Ellingas sat quellhip nipyesicsa enlhitaoc lhalhma anco. ¡Ellingas sat apquilnapomacpilha apquilimpocja! ¡Elpenacsojo enlhitaoc apquilyimnatem najan apquilvascapma!
10¡Ellana sat sovo alvinatem ayinyema vayqui alhpejic! ¡Ellana sat sovjeva ayinyema yamsovo!#Is 2.4; Mi 4.3. Etnejic sat appayvam meyimnatem: ¡Ovascapoc sat coo, sicyimnatem nac coo! — sat etnejic.
11¡Quellhip apyovoclhojo ningyava nincoo, elpecjicsojo quellhip, ingyaniclha quellhip! ¡Enlhit actamilaycam apvalhoc etniclhac sat singilpilhtetemo!
12Ingyaniclhac sat enlhitaoc metnaja apquiltemolhama payjoc alvata acvisay Singyicpilquemo. Dios Apyimtalhnamo eyanmongsiclhac sat apquiltemaclha apancaoc apyovoclhojo enlhitaoc ningyava maa.
13Acmasom apquiltemaclha apancaoc. ¡Elyatemen sat maa acno apquilyatemenma trigo apyilhna! Invaac acnim ningilyatemanaclha acyilhna. Eltime apquiltoyam, malha apquiltoyam uva acyilhna actiyapma ayingmenic.#Ap 14.14-16.,#Is 63.3; Lm 1.15; Ap 14.19-20; 19.15.
14Appintalhnama enlhitaoc payjoc alvata acvisay Singyicpilquemo. Ningatoc acnim apanco Dios Apyimtalhnamo.
15Cajancac sat acnim najan piltin. Melvitacpejec sat apyová.
16Colngalhcac sat appayvam apanco Dios Apyimtalhnamo naysicsa ayilhtingyavoyam. Ayinyema inquilhe Sión, tingma Jerusalén.#Jer 25.30; Am 1.2. Colpilhyinamcoc sat netin najan as nalhpop. Eyca Dios Apyimtalhnamo aptomja apquilyilhanmeycam. Aptomja apquilmasma enlhitaoc Israel, apquiltomja Dios apquilyacyescama.
Asoc yoyam colvac sat
17Jelyicpilcoc sat coo sicvisay Dios, sicmaclha netin inquilhe mayayo acvisay Sión. Tingma mayayo etnejic sat apvisay Jerusalén. Melnatovacsejec sat mataa cotnaja ingmoc.
18Incovac sat acnim, ongvitac sat uva ayingmenic najan leche, malha ayinyem yingmin sat cotnejic netin inquilhe. Ayinyem yingmin acyivey cotnejic sat alvata co Judá. Cotyapoc sat yingmin actamila tingma ajac apponquinomap, conyejic sat alvata Sitim#Ez 47.1-12. (Ayimjaclha Tayit).
19Enatovasacpoc sat tingma co Egipto, macyamasma etnejic sat tingma Edom. Eycaso ayinyema apquiltemaclha apquilmapsomcaa apquilinmelhaycam co Judá. Apticyovquic alhta enlhitaoc mepqui apquilsilhnanomap apanco.#Abd 10.
20-21Oyanmongsiclhac sat apquiltemaclha apquilnapma. Mongvasicjiclhejec sat apquilsilhnanomap apanco enlhitaoc. Elhnam sat mataa co Judá najan co Jerusalén. Olhic sat coo mataa netin inquilhe Sión, sicvisay Dios Visqui apancaoc quellhip — alhta aptomjac Dios Apyimtalhnamo — nic nat aptomjac profeta.
Currently Selected:
JOEL 3: ENHL
Highlight
Copy
Compare
Share
Want to have your highlights saved across all your devices? Sign up or sign in
