HABACUC 2
2
Acvitay apvanmoncama Habacuc profeta
1Aptomjac nic nat profeta: Ongvaylhojoc sat coo, olaylhic sat coo, apno enlhit aptamilquiscama najan apquiljalhneycam. Ongvaylhojoc sat Dios Apyimtalhnamo appayvam, aplinga inlhojo silmalhnaycam alhta siclho — alhta aptomjac.#Sal 5.3; 130.5-6.
2Apcatingmavoc alhta Dios Apyimtalhnamo: Italhos sat lhip asoc acvitay apvanmoncama, yavamlha olhicmocsic. Olyipsatalhcac sat amyaa actalhesamalhca yelpa acpayjem, malha yamit nicja.
3Yejemec sat ongvita actomjaclha acvitay apvanmoncama, nasoc anco ongvita.#He 10.37; 2 P 3.8-10.
4Italhos sat maa: Apquilyimtalhnesacpec apanco enlhit apquilmapsomcaa. Elmiyovacpoc sat enlhitaoc melvatseycaoc, mepqui apquilyamasma Dios Apyimtalhnamo — nic nat aptomjac profeta.#Ro 1.17; Gá 3.11; He 10.38.
Apquillingaycamco acmasom cotnaja ingmoc
5Aptomjac nic nat profeta: Apquilyimtalhnesacpec apanco as enlhitaoc apquiltingyey apquilmopvan. Apquililtamjoc mataa ellhamasiclha apquilmopvan actomja malha singyinimquiscama. Inquilmayjac mataa apatnaoc, acno malhic acmayja. Apquilyitsomacpo acvisay ningitsepma, actomja acmam enlhitaoc lhalhma anco, cotningvoyam nelha.
6Elinmelham sat enlhitaoc apquilasmesa apquiltemaclha apquilimpocjay. Eltimjic sat apquilpayvam: Quellhip layi apquilansayclha apquilnatam cotnaja apancaoc apquilnatam. ¿Co sat acvam elvatsamcoc quellhip apquilansayclha apquilnatam cotnaja apancaoc? — sat eltimjic.
7Cotlapsic sat macyanmongayclha apquiltemaclha quellhip cotnaja ingmoc. Ellingamcojoc sat quellhip acyimtalhnama, malha apquilalhnayo mepqui apava elvitacpoc quellhip.
8Elinmelham sat apyovoclhojo enlhitaoc lhalhma anco. Elnatamacpoc sat quellhip, acno siclho apquiltemaclha quellhip. Colhic sat acyanmongseclho apquiltemaclha quellhip apquilnapma, apquiltemaclha quellhip apnatovascama apquileyvam yoclhilhma najan apnaycam tingma apquilvanyam.
9Quellhip layi apquilicjescama tingma apancaoc asoc alminyilhamalhca, apquilanya quellhip mellingamquejec mataa acmasom.
10Eycaso apquiltemaclha apancaoc quellhip apquilsilhnanomap apanco. Coyiplovjoc sat macnatovascama quellhip, ayinyema alhta apnatovascama metnaja apquiltemolhama quellhip.
11Mataymong apjalhtam tingma altomja allingascama apquiltemaclha quellhip najan tingma apyitsicsic apquillanomap yamit actomja allingascama.
12Quellhip layi apquillanay tingma apvanyam naysicsa apquilmaclha apquilnapma najan apquiltemaclha copeyvomo.#Mi 3.10.
13Alhto sat cotnejic apquilvascapma apquiltamjaycam quellhip. Dios Visqui Apyimtalhnamo etvacsic sat apquillanay quellhip, cosavojoc sat talha acyovoclhojo maa.
14Copayjiclhac sat ningyascamcolhma lhalhma anco as nalhpop, elyasingvomoc sat actemaclha mayayo Dios Visqui ingac. Malha yingmin acvanyam sat cotnejic apquilyascamcolhma.#Is 11.9.
15Quellhip layi apquiltimesquiscama anmin alnapma poc enlhitaoc. Apquilaycaoc anmin alpalhquemalhca panatem, yoyam elmanquecsic apquiltemaclha apquilalhnayo poc enlhitaoc.
16Elmancangvomoc sat quellhip, mepqui ayayo. Elyinamcoc sat ingjaycoc quellhip, ayinyema apmescama Dios Apyimtalhnamo. Ellingamcojoc sat acyimtalhnama quellhip, comascoc sat mayayo quellhip.#Sal 75.8; Jer 25.15-29; Ez 23.32-34.
17Ellingamcojoc sat acyanmongayclha quellhip, apnatovascama alhta netin inquilhe Líbano. Ellingamcojoc sat acyanmongayclha quellhip apquilnapma alhta maa asoc navjac. Ellingamcojoc sat acyanmongayclha quellhip apquilnapma alhta apnaycam natingma najan yoclhilhma lhalhma anco.
18¿Co laa ontemjic ningvita quilaycmasquiscama allanomalhca? ¿Co laa ontimjic quilaycmasquiscama acmovan amyaa? Mepqui mataa acpayvam quilaycmasquiscama. ¿Apvanqui ya enlhit apquillanay emyovacpoc ayinyema acmasma quilaycmasquiscama?
19Quellhip layi apquiltomja apquilanya quilaycmasquiscama yamit: ¡Colhaticja! — alhta apquiltomjac. Quellhip layi apquiltomja apquilanya quilaycmasquiscama mataymong: Cotnimiclha netin — alhta apquiltomjac. ¿Avanqui ya quilaycmasquiscama colngacsic amyaa? Paj inyicje, ayinyema mepqui acyimnatem. Actomja allanomalhca oro najan plata quilaycmasquiscama.
20Apnec Dios Apyimtalhnamo tingma pac apponquinomap. ¡Elvanma sat quellhip apyovoclhojo enlhitaoc as nalhpop! — nic nat aptomjac profeta.#Sal 11.4; Sof 1.7; Zac 2.13.
Currently Selected:
HABACUC 2: ENHL
Highlight
Copy
Compare
Share
Want to have your highlights saved across all your devices? Sign up or sign in
