Zaburey 118
118
Albarka daŋyan dooni
1Wa Abadantaa šifa, zama a ga boori,
zama nga borohennataraa si ben abada!
2Yala Izirayel ma nee:
«Nga borohennataraa si ben abada!»
3Yala Haruna hugoo borey ma nee:
«Nga borohennataraa si ben abada!»
4Yala borey kaŋ ga hunbur Abadantaa ma nee:
«Nga borohennataraa si ben abada!»
5Binehasaraw ra, ay na Abadantaa cee,
a nʼay zaabi, a nʼay feeri.
6Abadantaa goo ay bande, ay si hunbur,
macin no boro ga hin kʼa tee ya ne?
7Abadantaa goo ay bande, nga ti ay faabakaa,
borey kaŋ ga konna agay ga kaa ka tee ya ne gunahaya.
8Boro ma nga boŋ talfi Abadantaa ga
baa a se a ma nga naanaa daŋ adamize ra.
9Boro ma nga boŋ talfi Abadantaa ga
baa a se a ma nga naanaa daŋ boŋkoyney ra.
10Gandawey kul nʼay kuubi kʼay bere,
Abadantaa maaɲoo albarkaa ra ay nʼi dunbu-dunbu.
11I nʼay kuubi kʼay bere, i goo ay kuubi-ka-beraa ra,
Abadantaa maaɲoo albarkaa ra ay nʼi dunbu-dunbu.
12I nʼay kuubi kʼay bere sanda ayuuhamniyaŋ,
i buu sanda karji nuune,
Abadantaa maaɲoo albarkaa ra ay nʼi dunbu-dunbu.
13Nʼnʼay tuti nda gaabi hala mʼay kaŋandi,
amma Abadantaa nʼay faaba.
14Abadantaa ti ay gaaboo nda ay doonoo addaliloo
A tee ya ne hallasiyan.
15Ɲaali nda hallasi kaati ga tun šerrantey hugey ra,
Abadantaa kabe gumaa ga haya beeriyaŋ tee.
16Abadantaa kabe gumaa jerandi!
Abadantaa kabe gumaa ga haya beeriyaŋ tee.
17Ay si buu, ay ga huna,
ay ga Abadantaa teegoyey deede.
18Abadantaa hanse kʼay aladabu,
amma a manʼay taŋ buuyan se.
19Wa šerretaray hugoo miɲey feeri ya ne,
ay ga huru nda miɲey ka Abadantaa šifa.
20Abadantaa hugoo miɲoo ne,
nga nda šerrantey ga huru.
21Ay ga ni šifa, zama nʼnʼay zaabi,
ni tee ya ne hallasiyan.
22Tondoo kaŋ cinakey nʼa fur,
nga no ka tee hugoo kanjoo tondoo.
23Abadantaa ka woo tee,
alaabiina no ir moɲey cire!
24Woo ti zaaroo kaŋ Abadantaa nʼa tee.
Ir ma yafarhã ka ɲaali a ra!
25Ir gʼa wiri ni ga, Abadantaa, ir hallasi!
Ir gʼa wiri ni ga, Abadantaa, naŋ ir ma zaame!
26Albarka ma bara boraa se
kaŋ ga kaa Abadantaa maaɲoo ga!
Ir goo Abadantaa hugoo ra ka albarka gaara war se.
27Abadantaa ti Irkoy, a nʼir noo gaay.
Wa fitayaŋ haw ka jingaroo hooraa tee,
ka koy hala sargari tonadogoo hilley ga!
28Ni ti ay Koyoo, ay ga ni šifa,
ay Koyoo, ay ga ni beerandi.
29Wa Abadantaa šifa, zama a ga boori,
zama nga borohennataraa si ben abada!
Currently Selected:
Zaburey 118: ses
Highlight
Copy
Compare
Share
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
