Zaburey 119
119
Abadantaa ašariyaa ga henan
1Borey duu gomni kaŋ ga dira henanyan ra,
wey kaŋ ga dira Abadantaa ašariyaa bande.
2Borey duu gomni kaŋ ga nga seedetarawey dii,
i gʼa ceeci nda ngi biney kul.
3Hakiika, i si šerretaray jaŋay tee,
i ga hanga nga fondawey.
4Nʼna ni hayey gorandi kaŋ nʼnʼi har
hala boro mʼi gana nda anniya.
5Yala ay fondawey ma tabati,
hala ya ni hantumey dii.
6Woo ga, ay si haw,
nda ay ga lakkal daŋ ni yaamarey kul se.
7Ay ga ni šifa nda bine šerrante,
ka ni šerretaraa hantumey kaŋ kayandi caw.
8Ay ga baa ya ni hantumey dii,
masʼay yala ba kayna!
9Taka foo nda soogo ga nga dira takaa henanandi?
Kala a ma dira ka sawa nda ni meešennoo.
10Ay ga ni ceeci nda ay binoo kul,
masi naŋ ya dere ka mooru ni yaamarey!
11Ay ga ni meešennoo jisi ay binoo ra
hala ya si duu ka zunubu tee ni ga.
12Albarka ma bara ma ne, Abadantaa!
Ay cawandi ni hantumey!
13Ay miɲoo ga hantumey kul kaŋ kayandi deede
kaŋ ni miɲoo nʼi har.
14Ɲaali nda ay ga dira ni seedetarawey bande,
ni mma nee kaŋ alman beeri bara ya ne.
15Ay ga miile hayey kaŋ nʼnʼi har ga,
ka lakkal daŋ ni fondawey se.
16Ni hantumey ti ay ɲaaloo,
ay si dirɲa ni meešennoo.
17Haya henna tee ya ne, agay, ni tamoo
hala ya duu ka huna,
de ya duu ka ni meešennoo dii!
18Ay moɲey feeri
hala ya haya kayfantey honnay kaŋ goo ni ašariyaa ra!
19Ay manʼti kala yaw laboo ga,
masi ni yaamarey tugu ya ne.
20Boonay no mʼay kankam
ka koy ni hantumey kaŋ kayandi here.
21Nʼga kašeta boro hundi beerey ga, laali hayayaŋ no,
kaŋ mooru ni yaamarey.
22Haawi nda kaynayan zaa ay boŋ,
zama ay ga ni seedetarawey dii.
23Ba nda boŋkoyniyaŋ goro ka hawandifutay ay ga,
agay, ni tamoo, ay ga miile ni hantumey ga.
24Ni seedetarawey, ngi ti ay ɲaaloo,
ngi ti ay hoyraykey.
25Ay hundoo denji laboo ga,
ay hunandi ka sawa nda ni šennoo!
26Ay nʼay dira takawey deede ma ne, nʼnʼay zaabi.
Ay cawandi ni hantumey!
27Ay fahamandi hayey kaŋ nʼnʼi har maanaa,
ay ga miile ni teegoy kayfantey ga.
28Ay hundoo ga hẽe nda binehẽenay,
ay tunandi ka sawa nda ni meešennoo!
29Ay moorandi taari fondo,
alhormo tee ya ne ka ni ašariyaa bayrandi ya ne!
30Ay na laadirtaray fondaa suuba,
ay ga dira ka sawa nda ni hantumey kaŋ kayandi.
31Ay ga hawa ni seedetarawey ga.
Abadantaa, masi naŋ ya haw!
32Ay ga zuru ni yaamarey fondaa bande,
zama nʼnʼay lakkaloo feeri.
33Abadantaa, ay cawandi ya dira ni hantumey bande,
de ay gʼi dii hala benantaa ga.
34Ay noo lakkal,
ay ga ni ašariyaa gana,
de ay gʼa dii nda ay binoo kul.
35Ay dirandi ni yaamarey fondaa bande,
zama fondaa din ti ay ɲaaloo.
36Ay binoo hangandi ni seedetarawey bande,
a masi hanga alman bande.
37Ay moɲey kaa haya yaadawey gunayanoo ga,
ay hunandi ni fondaa ga!
38Ni šennoo kaŋ ga boro cawandi ni hunburaa
tabatandi ay ra, agay, ni tamoo.
39Ay moorandi kaynandoo kaŋ gʼay hunburandi,
zama ni hantumey kaŋ kayandi ga boori.
40Nga ne, ay ga hayey boonay kaŋ nʼnʼi har,
ay hunandi ni šerretaraa ra!
41Abadantaa, yala ni borohennataraa ma kaa hala ay do,
ni hallasiroo ma kaa ay do nda takaa kaŋ nʼnʼa har!
42Woo ra ay ga hin ka boraa zaabi kaŋ gʼay kaynandi,
zama ni meešennoo ga ay ga felle.
43Masi cimoo šennoo hoobu kʼa kaa ay miɲoo ra,
zama ay ga tammahã ni hantumey kaŋ kayandi ga.
44Ay ga duumi ka ni ašariyaa dii
waati kul hala abada.
45Ay ga dira feeriyan ra,
zama ay ga hayey ceeci kaŋ nʼnʼi har.
46Ay ga ni seedetarawey har kokoyey jine,
ay si haw.
47Ni yaamarey ti ay ɲaaloo,
ay ga bagʼey.
48Ay gʼay kabey jer ni yaamarey se, ay ga bagʼey,
ay ga miile ni hantumey ga.
49Hongu šennoo kaŋ nʼnʼa har agay, ni tamoo se,
šennoo kaŋ ga nʼnʼay tammahãndi.
50Ay zaraboo ra, nga ti ay bineyaynandiroo,
ni meešennoo nʼay hunandi.
51Boro foomanteyaŋ hanse kʼay fude,
ay si šiiri ni ašariyaa se.
52Abadantaa, ay ga honga ni cee jinaa hantumey kaŋ kayandi,
ay ga duu bineyaynandiyan.
53Ay hanse ka dukur boro laaley maaganda
kaŋyaŋ ga ni ašariyaa naŋ.
54Hugoo kaŋ ra ay ga yawzunbay
nga ra ay ga ni hantumey ka dooni dunbu.
55Cijinoo ra ay ga hongu ni maaɲoo, Abadantaa,
ay ga ni ašariyaa dii.
56Woo ti haya kaŋ ay gʼa tee,
zama ay ga hayey dii kaŋ nʼnʼi har.
57Abadantaa, ay gʼa har,
ay bagaa manʼti kala ya ni meešenney dii.
58Ay goo ma ni alhormaa ceeci nda ay binoo kul,
hinna ya ne ka sawa nda woo kaŋ nʼnʼa har.
59Ay miile ay hunaroo ga,
kʼay dira takaa willi kate ni seedetarawey do.
60Ay ga cahã, ay si yay
ka ni yaamarey dii.
61Boro laaley karfey nʼay kuubi kʼay bere,
ay si dirɲa ni ašariyaa.
62Cijinbine ay ga tun ka ni šifa
ni šerretaraa hantumey kaŋ kayandi maaganda.
63Ay manʼti kala borey kul kaŋ ga hunbur ni ceroo
nda borey kaŋ ga hayey dii kaŋ nʼnʼi har.
64Abadantaa, ni borohennataraa ga laboo too met.
Ay cawandi ni hantumey!
65Nʼna haya henna tee agay, ni tamoo se,
ka sawa nda ni meešennoo, Abadantaa.
66Lakkal henna nda bayray cawandi ya ne,
zama ay nʼay naanaa daŋ ni yaamarey ra.
67Ay cindi ka hun fondaa ga waatoo kaŋ ya na zarabi,
amma sohõ ay ga ni meešennoo dii.
68Nʼga boori, nʼga gomni tee.
Ay cawandi ni hantumey!
69Foomanteyaŋ gʼay maaɲoo hasara nda taari,
agay, ay ga hayey dii kaŋ nʼnʼi har nda ay binoo kul.
70Ngi lakkaley nka daaba,
agay, ni yaamarey ti ay ɲaaloo.
71Zaraboo boori ya ne
hala ya ni hantumey caw.
72Ay baa ni miɲoo ašariyaa
ka bisa wura nda nzorfu kaaray tamma zenberyaŋ.
73Ni kabey kʼay tee, ngi kʼay hanse,
ay noo lakkal hala ya ni yaamarey caw.
74Borey kaŋ ga hunbur ni ga dii agay, i ga ɲaali,
zama ay ga naata ni meešennoo ga.
75Abadantaa, ay ga bay kaŋ ni hantumey kaŋ kayandi ga šerre,
ni laadirtaraa ra nʼnʼay zarabandi.
76Ay gʼa wiri ni ga, ni laadirtaraa ma tee ay bineyaynandiroo,
sanda takaa kaŋ nda nʼnʼa har agay, ni tamoo se.
77Ni tamallawey ma kaa ay ga hala ya duu ka huna,
zama ni ašariyaa ti ay ɲaaloo!
78Yala i ma haw, boro foomantey kaŋ gʼay zarabi yaada!
Agay, ay ga miile hayey ga kaŋ nʼnʼi har.
79Yala borey kaŋ ga hunbur ni ma willi kate ay ga,
wey kaŋ ga ni seedetarawey bay!
80Yala ay binoo ma ni hantumey gana ka timme,
hala ya si duu ka haw!
81Ay hundoo ga hanse ka ni hallasiroo boonay,
ay ga naata ni meešennoo ga.
82Ay moɲey ga ni meešennoo boonay,
ay nee: «Waati foo no nʼgʼay binoo yaynandi?»
83Ba nda ay tee sanda hunbar kaŋ goo dullu ra,
ay si dirɲa ni hantumey.
84Macin ti agay, ni tamoo aloomuroo hinnaa?
Waati foo no nʼgʼay gurzugaykey ciiti?
85Boro foomanteyaŋ ga guusuyaŋ fanši ay jine,
woo ti haya kaŋ ni ašariyaa si yadda a ga.
86Ni yaamarey kul ti cimi.
I gʼay gurzugay yaada, ay faaba!
87Haya kayna i gʼay benandi laboo ga,
amma agay, ay si hayey naŋ kaŋ nʼnʼi har.
88Ay hunandi ka sawa nda ni borohennataraa
hala ya ni miɲoo seedetaraa dii.
89Hala abada, Abadantaa,
ni meešennoo ga tabati beenaa ra!
90Ni laadirtaraa ga cindi zaman ka koy zaman.
Nʼna laboo gorandi, a ga cindi dogoo ra.
91Ni hantumey kaŋ kayandi ga, hayey ga bara hõ,
zama haya kul si goy kala ni se.
92Nda a gar ni ašariyaa nka mana tee ay ɲaaloo,
woo ga, ay ga dere ay zaraboo ra.
93Ay si dirɲa abada hayey kaŋ nʼnʼi har,
zama ngi nda nʼgʼay hunandi.
94Ni wane nda agay, ay hallasi!
Zama ay ga hayey ceeci kaŋ nʼnʼi har.
95Boro laalayaŋ gʼay batu hala ngi mʼay derandi,
ay ga lakkal daŋ ni seedetarawey se.
96Ay dii kaŋ haya kul kaŋ tee ka timme goo nda kaydoo,
amma ni yaamaroo ga hanse ka yilwa.
97Ay ga hanse ka baa ni ašariyaa!
Zaaroo kul ay ga miile a ga.
98Ni yaamaroo gʼay tee lakkalkoyni ka bisa agay iberey,
zama a goo ay kone hala abada.
99Ay goo nda lakkal ka bisa agay alfagey kul,
zama ni seedetarawey ga ay ga miile.
100Ay goo nda fahamay ka bisa aru žeeney,
zama ay ga hayey dii kʼi tee kaŋ nʼnʼi har.
101Ay gʼay cewey dii ka hun fondo futu kul ga,
ka ni meešennoo dii.
102Ay si hun ni hantumey kaŋ kayandi bande,
zama ni no mʼay cawandi.
103Ni šennoo ga kan ay dankaa ga
ka bisa yuu kaŋ goo ay miɲoo ra.
104Ni hayey kaŋ nʼnʼi har gʼay noo lakkal,
woo se ay ga konna taari fondo kul.
105Ni meešennoo manʼti kala fitilla ay cewey cire,
gaay no ay fondaa se.
106Ay žee, ay gʼa too,
ay ga ni šerretaraa hantumey kaŋ kayandi dii.
107Ay hanse ka šiita.
Abadantaa, ay hunandi ka sawa nda ni meešennoo.
108Abadantaa, ay gʼa wiri ni ga,
ay miɲoo sargaroo taa kaŋ ay gʼa kaa nda ay boŋ,
ay cawandi ni hantumey kaŋ kayandi.
109Waati kul ay hunaroo goo farrati ra,
amma ay si dirɲa ni ašariyaa.
110Boro futuyaŋ ga kumsay hirri ya ne,
amma ay si hibi hayey ga kaŋ nʼnʼi har.
111Ni seedetarawey ti ay tuboo hala abada,
ngi ti ay binoo ɲaaloo.
112Ay gʼay binoo hangandi a ma dira ni hantumey bande,
waati kul hala abada.
113Ay ga konna adamize bine hinkakoyney,
ay ga baa ni ašariyaa.
114Ni ti nongoo kaŋ ra ay ga tugu nda ay koraa,
ay ga naata ni meešennoo ga.
115Wa mooru ay ga, goy futu teekey,
ay gʼay Koyoo yaamarey dii.
116Ay faaba ka sawa nda woo kaŋ nʼnʼa har, de ay ga huna.
Masi naŋ ya haw ay naataa ra!
117Ay faaba hala ya duu ka hallasi,
de mo ni hantumey bara ay moɲey cire waati kul!
118Nʼga borey kul fur kaŋ mooru ni hantumey,
zama ngi dargarey manʼti kala taari.
119Nʼga boro laaley kul tuusu kʼi kaa laboo ga sanda žiibi,
woo se ay ga baa ni seedetarawey.
120Ay hamoo ga jijiri ni hunburaa maaganda,
ay ga hunbur ni hantumey kaŋ kayandi.
121Ay dira nda cimi nda šerretaray,
masʼay kaŋandi ay torrokey kabey ra.
122Kay ya ne, agay, ni tamoo ka gomni tee ya ne.
Yala foomantey masʼay torro.
123Ay moɲey ga ni hallasiroo
nda ni šerretaraa haryanoo boonay.
124Goy agay, ni tamoo se ka sawa nda ni borohennataraa.
Ay cawandi ni hantumey!
125Ni tamoo ti agay, ay noo lakkal
hala ya faham ni seedetarawey se.
126Sohõ no Abadantaa ga hima ka tun,
i na ni ašariyaa hoo.
127Woo se ay ga baa ni yaamarey
ka bisa wura, wura alhakiika.
128Woo se, ay ga hayey kul dii šerrante kaŋ nʼnʼi har,
ay ga konna taari fondo kul.
129Ni seedetarawey ga kayfandi,
woo se ay hundoo gʼi dii.
130Ni šennoo fahamyanoo ga boro noo gaay,
a ga boŋbiyey noo lakkal.
131Ay gʼay miɲoo feeri ka hew haŋ,
zama ni yaamarey jawoo goo ay ga.
132Bere ay here, de ma alhormo tee ya ne
ka sawa nda hantumoo kaŋ kayandi
kaŋ nʼnʼa kayandi borey se kaŋ ga baa ni maaɲoo.
133Woo kaŋ nʼnʼa har mʼa kʼay cee diraa tabatandi,
de mo masi naŋ ifutu mʼay juwal.
134Ay feeri kʼay kaa adamizey torroyanoo ra,
woo ra ay ga hayey dii kaŋ nʼnʼi har.
135Ni ndumoo annuuraa daŋ agay, ni tamoo ga.
Ay cawandi ni hantumey!
136Ay moɲey ga isa hariyaŋ doori,
zama borey si ni ašariyaa dii.
137Abadantaa, nʼga šerre,
de mo ni ciitey ga henan.
138Nʼna ni seedetarawey gorandi nda šerretaray
nda laadirtaray kaaray.
139Ni bajoo alhuzunoo gʼay ŋaa nda kunehere,
zama agay nkuwawey dirɲa ni šenney.
140Ni šennoo ga henan,
agay, ni tamoo, ay ga bagʼa.
141Ay ga luufu, i sʼay daŋ assal,
ay si dirɲa hayey kaŋ nʼnʼi har.
142Ni šerretaraa ga šerre hala abada,
ni ašariyaa ti cimi.
143Laazaaba nda binehasaraw duu agay,
ni yaamarey ti ay ɲaaloo.
144Hala abada ni seedetarawey ga šerre,
ay noo lakkal hala ya duu ka huna.
145Ay ciya nda ay binoo kul,
ay zaabi, Abadantaa!
Ay ga ni hantumey dii.
146Ay ga ni cee, ay hallasi,
hala ya duu ka ni seedetarawey dii.
147Ay tun za alfazaroo mana too,
de ay ga kaati ka faaba ceeci,
ay ga naata ni šennoo ga.
148Cijinoo waatey kul ay moɲey ga hay
ka miile hayaa ga kaŋ nʼnʼa har.
149Haŋajer ya ne ka sawa nda ni borohennataraa!
Abadantaa, ay hunandi ka sawa nda ni hantumey kaŋ kayandi.
150Goy futu teekawyaŋ goo ma man kate ay do,
i na ngi boŋ moorandi ni ašariyaa.
151Abadantaa, nʼga man,
ni yaamarey kul manʼti kala cimi.
152Za zaman ni seedetarawey nʼay bayrandi
kaŋ nʼna ni seedetarawey tabatandi hala abada.
153Ay binedooraa guna, ay hallasi,
zama ay si dirɲa ni ašariyaa.
154Kay ya ne, ay feeri,
ay hunandi ka sawa nda woo kaŋ nʼnʼa har.
155Hallasiroo ga mooru boro laaley,
zama i si ni hantumey ceeci.
156Abadantaa, ni tamallawey ga boobo,
ay hunandi ka sawa nda ni hantumey kaŋ kayandi.
157Ay gurzugaykey nda agay nkuwawey ga boobo,
ay si šiiri ni seedetarawey se.
158Ay ga zanbantey guna nda binehunay,
ngi kaŋ si ni meešennoo dii.
159Ma bay kaŋ ay ga baa hayey kaŋ nʼnʼi har.
Abadantaa, ay hunandi ka sawa nda ni borohennataraa.
160Ni meešennoo asaasoo manʼti kala cimi,
ni šerretaraa hantumey kaŋ kayandi kul ga bara hala abada.
161Bonkoyniyaŋ gʼay gurzugay bila addalil,
amma ni meešennoo no mʼay binoo hunburaa tunandi.
162Ay ga ɲaali nda woo kaŋ nʼnʼa har
sanda boro kaŋ duu alganiima beeri.
163Ay ga konna taari, ay garsaka a se,
ay ga baa ni ašariyaa.
164Cee iyye zaaroo ra ay ga ni saabu
ni šerretaraa hantumey kaŋ kayandi maaganda.
165Alaafiya beeri goo borey se kaŋ ga baa ni ašariyaa,
haya kul sʼi kaŋandi.
166Abadantaa, ay nʼay naataa daŋ ni hallasiroo ra,
ay ga ni yaamarey ka goy.
167Ay hundoo ga ni seedetarawey dii,
de mo ay ga hanse ka bagʼey.
168Ay ga hayey kaŋ nʼnʼi har nda ni seedetarawey dii,
zama ay dira takaa kul goo ni jine.
169Abadantaa, yala ay kaatoo ma too ni do!
Ay noo lakkal ka sawa nda ni meešennoo.
170Yala ay suurandiyanoo ma too ni do!
Ay feeri ka sawa nda woo kaŋ nʼnʼa har!
171Yala ni saaburoo ma boobo ay miɲoo ra,
zama nʼgʼay cawandi ni hantumey.
172Yala ay miɲoo ma ni meešennoo don,
zama ni yaamarey kul ga šerre.
173Yala ni kaboo mʼay faaba,
zama ay na hayey suuba kaŋ nʼnʼi har.
174Abadantaa, ay ga hẽe ni hallasiroo bande,
ni ašariyaa ti ay ɲaaloo.
175Yala ay hundoo ma huna ka ni saabu,
Yala ni hantumey kaŋ kayandi mʼay faaba.
176Ay dere sanda feeji derante.
Agay, ni tamoo ceeci,
zama ya na dirɲa ni yaamarey.
Currently Selected:
Zaburey 119: ses
Highlight
Copy
Compare
Share
Want to have your highlights saved across all your devices? Sign up or sign in
© BFP Velberter Mission and Wycliffe Bible Translators, Inc.
