लेवी 7
7
दोषबलिया विधि
1“‘दोषबलि छायेगु विधि थ्व खः। थ्व तसकं पवित्र जू। 2गुगु थासय् होमबलि स्याइ व हे थासय् दोषबलिया भ्याःचा नं स्यायेमाः। वयागु हि वेदीया जःखः छ्वाकेमाः।#लेवी १:११ 3पुजाहारीं थुकिया फुक्क दाः वेदीइ छायेमाः। दाःखाःगु न्हिप्यं, दुलापिलायात भुनाच्वंगु दाः, 4जँया नापं च्वंगु दाः, भुनाच्वंगु निगुलिं जलासेँ व सेँया भिंगु ब्व लिकायेमाः। 5पुजाहारीं परमप्रभुया निंतिं विशेष देछाकथं व वेदीइ छ्वय्केमाः। थ्व दोषबलि खः। 6पुजाहारी जुइपिं न्ह्याम्ह काय्मस्तय्सं नं थ्व नयेफु। थ्व नापलायेगु पालया चुकय् च्वनाः नयेमाः। थ्व तसकं पवित्रगु खः।
7“‘पापबलि थें हे दोषबलिइ नं अथे हे यायेगु खः। गुम्ह पुजाहारीं बलि छानाः इमिगु लागिं प्रायश्चित याइ, ला व हे पुजाहारीयागु जुइ। 8होमबलियागु छेंगू होमबलि छाःम्ह पुजाहारीयागु हे जुइ। 9भुतलिइ, द्वालय् व ताप्केचाय् दय्कूगु अन्नबलि छाःम्ह पुजाहारीयागु हे जुइ। 10चिकनय् बुलातःगु व गंगु फुक्क अन्नबलि हारूनया काय्पिन्त उतिग्यंक हे थइ।
मेलबलिया विधि
11“‘परमप्रभुयात मेलबलि छायेगु विधि थथे खः –
12“‘सुनानं परमप्रभुयात सुभाय् देछायेत मेलबलि छायेगु खःसा बलि बीत हःम्ह पशुनापं सोडा ल्वाकमछ्याःगु चिकनय् बुलातःगु ल्वहंचा मरि छपा, सालुगु मरि छपा अले सोडा मतःगु चिकनय् न्हायातःगु घः मरि छपा कयाः 13सुभाय् बीत छायेहःगु मेलबलि नापं वं सोडा ल्वाकछ्यानातःगु मरि नं छायेमाः। 14गुकिं छगू छगू यानाः परमप्रभुया निंतिं विशेष भेटीया लागिं व छायेमाः। सोडा तःगु मरि मेलबलिया हि छ्वाकिम्ह पुजाहारीया जुइमाः। 15सुभाय्या मेलबलिया ला छाःगु हे दिं नयेमाः। कन्हय् खुन्हु थ्व नये मज्यू।
16“‘तर छाइगु बलि भाकल वा थः यःछिया बलि जूसा थज्याःगु बलि छाःगु हे दिंखुन्हु नयेमाः। ल्यं दुगु ला कन्हय् खुन्हु नं नये ज्यू। 17कंस तक ल्यं दुगु बलिया ला धाःसा मिइ छ्वय्केमाः। 18मेलबलिया ला कंस तक सुनानं नल धाःसा व नालेबहः जुइ मखु। व ला छाःम्हय्सियागु निंतिं छाःगु ल्याः याइ मखु, तर व अशुद्ध जुइ। अले व नःम्ह मनू दोषी थहरय् जुइ।
19“‘सुनानं अशुद्ध वस्तुं थ्यूगु ला नये मज्यू। व मिइ छ्वय्केमाः। विधिकथं शुद्ध जूम्ह मनुखं धाःसा ल्यं दुगु ला नयेफु। 20तर अशुद्ध जुयाः परमप्रभुया मेलबलिया ला सुनानं नल धाःसा वयात वया मनूतय् दथुं पितिना छ्वयेमाः। 21सुनानं मनूया अशुद्ध, पशुया अशुद्ध वा मेगु छुं घचाइपुगु वस्तु थियाः परमप्रभुया मेलबलिया ला नल धाःसा वयात वया मनूतय् दथुं पितिना छ्वयेमाः।’”
हि व दाः नये मज्यू
22हानं परमप्रभुं मोशायात धयादिल, 23“इस्राएलीतय्त धा, ‘छिमिसं सा वा द्वहं, फै वा दुगुयागु दाः नये मज्यू। 24अथे सीम्ह व जंगली पशुतय्सं स्याःम्ह पशुया दाः मेगु ज्याय् छ्योसां ज्यू तर छिमिसं व नये मज्यू। 25परमप्रभुया निंतिं विशेष देछाया पशुया दाः सुं मनुखं नल धाःसा वयात वया मनूतय् दथुं पितिना छ्वयेमाः। 26छिपिं न्ह्याथाय्सं च्वंसां पशुपंक्षीया हि गुबलें नये मज्यू।#उत ९:४; लेवी १७:१०-१४; १९:२६; व्य १२:१६,२३; १५:२३ 27हि नःम्ह न्ह्याम्ह मनू जूसां वयात वया मनूतय् दथुं पितिना छ्वयेमाः।’”
पुजाहारीया ब्व
28परमप्रभुं मोशायात धयादिल, 29“इस्राएलीतय्त धा, ‘परमप्रभुया निंतिं मेलबलि छाइम्हय्सिनं मेलबलिया छब्व बलिकथं परमप्रभुया थासय् हयेमाः। 30वं परमप्रभुया निंतिं विशेष देछा थःगु ल्हातिं हयेमाः। वं दाः ह्याकुला नाप हयाः परमप्रभुया न्ह्यःने संकाबीगु बलिया निंतिं देछायेमाः। 31पुजाहारीं दाः वेदीइ छ्वय्केमाः। ह्याकुला धाःसा हारून व वया काय्पिनिगु जुइ। 32छिमिसं जव खम्पा नं मेलबलिं भेटीकथं पुजाहारीयात बीमाः। 33मेलबलिया हि व दाः छाःम्ह हारूनया काय्यागु ब्व जव खम्पा जुइ। 34छाय्धाःसा इस्राएलीतय्गु मेलबलिं संकूगु ह्याकुला व खम्पा जिं छिमिके कयाः पुजाहारीतय्त इस्राएलीतय्गुपाखें न्ह्याबलेंया निंतिं बियागु दु।’”
35गुखुन्हु हारून व वया काय्पिं पुजाहारी पदय् अभिषेक जुयाः परमप्रभुया न्ह्यःने सेवाया निंतिं दनी, उखुन्हुनिसें परमप्रभुया निंतिं विशेष देछाया ब्व इमिगु खः। 36गुखुन्हु इपिं अभिषेक जुल उखुन्हु हे परमप्रभुं इस्राएली मनूतय्सं इमित थ्व भाग बी धकाः उजं बियादिल। पुस्तौं पुस्ताया निंतिं न्ह्याबलें थ्व इमिगु ब्व जुइ।
37थ्व हे होमबलि, अन्नबलि, पापबलि, दोषबलि, अर्पणबलि व मेलबलिया विधि खः। 38“छिमिसं थुकथं परमप्रभुयाथाय् बलि हयाः छायेमाः” धकाः परमप्रभुं मोशायात सीनै मरुभूमिइ सीनै पर्वतय् उजं बियादिल।
Currently Selected:
लेवी 7: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
