लेवी 6
6
1परमप्रभुं मोशायात धयादीगु विधि थ्व हे खः#गन्ती ५:५-८, 2“सुनानं तयेबियातःगु वस्तु लित मब्यूसे, दि तयातःगु वस्तु लित मब्यूसे, खुयाः वा जःलाखःलायात झंगः लानाः, 3सुयागुं तंगु वस्तु लुइकाः उकिया बारे मखुगु खँ ल्हानाः, मखुगु पाः फयाः परमप्रभुया विरोधय् पापयात धाःसा 4व दोषी थहरय् जूगु दु। वं थःत तयेबियातःगु वस्तु, दि तय्कातःगु वस्तु, खुयातःगु वस्तु, झंगः लानाः कयातःगु वस्तु, तंगु लुइकाहःगु वस्तु, 5वा मखुगु पाः फयातःगु खँया न्याब्वय् छब्व अप्वः तनाः पलेसा पुलेमाः। वं दोषबलि बीखुन्हु थ्व फुक्क थुकिया थुवाःयात पुलेमाः। 6वं पुजाहारीयाथाय् परमप्रभुयात दोषबलि बीत खू मदुम्ह भ्याःचा हयेमाः। भ्याःचाया मू शेकेलया मूकथं क्वःछी। 7थ्व विधिकथं पुजाहारीं वयागु निंतिं परमप्रभुया न्ह्यःने प्रायश्चित यायेमाः। अले वयात क्षमा दइ।”
पुजाहारीतय्सं गुकथं बलि बीगु
होमबलिया विधि
8परमप्रभुं मोशायात धयादिल, 9“हारून व वया काय्पिन्त थथे आज्ञा ब्यु, ‘होमबलि बीगु विधि थथे खः – होमबलि चच्छि व सुथय् तक वेदीइ तयेमाः। वेदीइ मि च्यानाच्वनेमाः। 10अले पुजाहारीं पुजाहारीया सुति वसः व दुनेया सुति वसः पुनाः होमबलिया नौ लिकयाः वेदीया छखे तयेमाः।#प्रस २८:३९-४३ 11अले वं फिनातःगु वसः त्वयाः मेगु वसः पुनाः नौयात छाउनी पिने छगू शुद्धगु थासय् यंकेमाः। 12वेदीइ मि च्याना हे च्वनेमाः, अले गुबलें मसीमाः। पुजाहारीं न्हिन्हिं सुथय् उकी सिँ तनेमाः, पुजाहारीं होमबलिया कुचात व मेलबलिया दाः मिया च्वय् मिलय् यानाः तयेमाः। 13वेदीइ मि मदिक्क च्याना हे च्वनेमाः, व गुबलें हे सी मज्यू।
अन्नबलिया विधि
14“‘अन्नबलि छायेगु विधि थथे खः – हारूनया काय्पिन्सं थुकियात परमप्रभुया न्ह्यःने वेदीइ हयेमाः। 15पुजाहारीं छम्हू भिंगु छुचुं व चिकं कयाः फुक्क धुपाँय् तयाः च्याकाः अन्नबलिया चिंकथं परमप्रभुया निंतिं नस्वाः जुइत वेदीइ छ्वय्केमाः।
16“‘ल्यं दुगु धाःसा हारून व वया काय्पिन्सं नइ। इमिसं थुकियात सोडा मतसे व नापलायेगु पालया चुकय् च्वनाः नयेमाः। 17थुकी सोडा ल्वाकछ्यानाः मदय्केमाः। जितः छाःगु विशेष बलिया ब्व जिं इमित बियागु दु। अले थ्व पापबलि व दोषबलि थें हे पवित्र खः। 18अले सदांया निंतिं हारूनया मिजंपिं सन्तानतय्सं थ्व नयेमाः। परमप्रभुयात छायेहःगु अन्नबलितपाखें थ्व इमिगु पुस्तौं पुस्ताया लागिं इमिगु ब्व खः। मेपिं सुनानं विशेष देछा थिल धाःसा उकियागु पवित्रताया शक्तिं वयात हानि याइ।’”
19परमप्रभुं मोशायात हानं धयादिल, 20“हारून अभिषेक जू खुन्हु वं व वया काय्पिन्सं परमप्रभुयात छायेमाःगु बलि थुकथं दु – सुथय् बच्छि व बहनिइ बच्छि यानाः न्हिं छगू व बागू किलोग्राम भिंगु छुचुं अन्नबलिकथं न्ह्याबलें छायेमाः। 21थुकियात चिकंनाप वालाः द्वालय् छुयेमाः। अले कुचा कुचा यानाः परमप्रभुयात लय्ताय्केगु नस्वाः जुइत अन्नबलिकथं छायेमाः। 22थुकथं हे न्ह्याबलें अभिषेक जुयाः वयागु थासय् पुजाहारी जुइम्ह वया सन्तानं हे अन्नबलि छायेमाः। थ्व परमप्रभुया न्ह्याबलेंया ब्व खः, अले थ्व फुक्कं छ्वय्का छ्वयेमाः। 23पुजाहारीया फुक्क अन्नबलि छ्वय्का छ्वयेमाः। थ्व मनयेमाः।”
पापबलिया विधि
24परमप्रभुं मोशायात हानं धयादिल, 25“हारून व वया काय्पिन्त धा, ‘पापबलि छायेगु विधि थथे खः। होमबलि ब्यूथाय् हे पापबलि नं परमप्रभुया न्ह्यःने बीमाः। थ्व तसकं पवित्रगु बलि खः।#लेवी १:११ 26बलि छाइम्ह पुजाहारीं हे थुकिया ला नइ। नापलायेगु पालया चुकय् च्वनाः हे थ्व नयेमाः। 27सुनानं वा छुकिं व पशुया ला थी उकियागु पवित्रताया शक्तिं वयात हानि याइ। हि छफुतिं जक क्यूगु वसः नं पवित्रगु थासय् हीमाः। 28ला चाया थलय् दय्कूगु खःसा व चाया थलयात तछ्यायेमाः। कँय्या थलय् दय्कूगु खःसा लखं बांलाक सिलाछ्वयेमाः। 29पुजाहारी जुइपिं न्ह्याम्ह काय्मस्तय्सं नं थ्व नयेफु। थ्व तसकं पवित्र खः। 30पाप प्रायश्चित यायेत पवित्रगु थासय् पापबलिया पशुया हि छाये हःसा उम्ह पशुया ला नये मज्यू। व फुक्कं मिइ च्याका छ्वयेमाः।
Currently Selected:
लेवी 6: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
