FAILIMƆ 1

Daali‐mai

1Nài gè ga Pɔɔ gè ga pilisine Ziizɛ Kolai ʋaa ma, a de wɔi Temete vɛɛvɛ bà, gìɛ kɔlɔi nii wonɛ è wɔ, yài è ga Failimɔ, è ga bɔ̀ɔ lii‐ɣɛɛ nu è ga gé wõila nu, 2wa Afia nii é ga de maŋaza nui ta é vɛɛ Akipɔ va é ga de wɔɔ zɔdasi, ta Gala pɛlɛ wu nu ƃulugi nii yá wũi yà vɛlɛi wu. 3Maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

Failimɔ na wõilai ta ná zee‐la‐mai

4Siɛ nɛpɛ gà è laa lili na nà Gala‐feliai zu, gà è mamama fe Gala bɛ. 5Ƃɔvɛlaale gà faa mɛnisu é vile wõilai va é è ya ta zee‐la‐mai de maliɣii Ziizɛ ʋaa ma ta Gala na dɔ numaitiɛ ɣaazɔ. 6Na ɣa ɣɛɛ na gà Gala felizu ga è ɣɛɛ vele ma ga zaƃu ga numaitiɛ te wɔɔ laa loo nii va è laa la, nà kɛ faa vagɔi nɛpɛ é de ya de ɣɛɛ vele ma su ɣilekpu da Kolaini gaa‐ɣaa ʋai li wũ ma. 7Kuu‐zu‐nɛɛ ƃakpa ƃɔga gaa‐nɛkpɛ te maa zɔlɔ wogɛ bɛ̀ te wulo yà wõilai zu, bɔ̀i. Ƃɔvɛlaale Gala na dɔ numaitiɛ te yii laa daa‐zu è zaala zu.

Pɔɔ ɣa Oonɛsima ʋaa ʋaa wosu

8Na mavelei ma, to mu zèe laa ʋũigɛ é kulo‐ɣɛɛ wo de ɣɛɛ vele ma su ɣilekpu da Kolaini ga nii maa nɛɛ é ɣɛ gè da è ya ga tɔ ga è kɛ. 9Kɛ̀ wõilai mazaƃu ma pagɛ to mu gè kɛ ga daa vele è vɛ. Nài gè ga Pɔɔ gè ga Ziizɛ Kolai ɣaazu gè sa wɔnɔ ƃalaa ga pilisine máʋaa ma, 10gà kɛɛzu ga daa vele è vɛ dùi Oonɛsima ʋaa ma, nii gè ɣɛɛ ga kéea nà pilisinelai zu. 11Mamaa wũgi zu kɛ́ɛzu lɛ ŋɛni ma è ya. Kɛ̀ kɛ́ɛzu ɣa sa ma è ya ga ƃɔɔƃɔɔ su, kɛ́ɛzu wɔnɔ ma fàa ma. 12Gà tevesu wulu è wɔ vɛ. Zii na ƃɔɔƃɔɔ ka gè tevesu. 13Kùu zu ɔ́ nɛɛ ga é yɛ vɛ bà kɛɛ ʋaa ma yíɛ tii ɣɛ bɛ̀ è mazaƃu ma pilisinelai nii zu gè su woo niinɛ vagɔi mazaƃu ma. 14Kɛ̀ nii pagɛi gè kɛ tɔ ga gè mɛ lɛ faa ta nɛpɛ kɛ su ani ɛ̀ lɛ yee zeini bu, kɛɛ ʋaa ma yà ʋaa vagɔ‐ɣɛɛ mɛ lɛ ɣɛ ga fai kuloai è ɣɛlɛ‐gbɛdɛi zu, kɛ̀ é ɣɛ ga fai è yee laa ʋũigɛ ga è kɛ ga yii‐ma vele. 15Ɣee ta zaƃui Oonɛsima ziɣia la è va ná ta wolo kɛ tɔ ga è sɔlɔ wo wulu é yɛ è va sa wɔlɔ‐wɔlɔ ta wɔlɔ‐wɔlɔ. 16Ɛ́ lɛ sa wɔlɔ‐wɔlɔ ɣɛɛ ga dúo ʋáa, kɛ̀ maʋai ɣa wudɛ dúo ʋáa maazu. Tɔ sa ga de vaitiɛ de wõiyai ga tiɛ te ta.? Nà mu ka nà dɔ laa levegɛi ná wõila ʋai zu, kaalima teɣa yà? Nii ɣa ɣɛ kɛ́ɛ ʋai ma ga nu ƃuse ta kɛ́ɛ ʋai ga Kolai maa nu.

17Na ma ani yà sìɣizu ga è ʋele kele, yee zei bú è ɣɛ velei nɔ ɔ̀ kɛɛ la ani ɔ́ ɣɛ na gàazu. 18Ani é faa ta nɛpɛ kɛɛni ga yìɛ ga yowũa ɔɔ ani é kui zoni yìɛ, pu kɔlɔ ma ga dàa. 19Nài gè ga Pɔɔ gà fai nii wonɛzu nà ƃɔɔ ga zèe wo. Nà ɣa gà mawui wulo. Nà kui ɣɛɛ ʋai è ma gɛ̀ lɛ ʋɔlɔ laa liizu nà ma. È ƃɔɔ ɣagi ƃalaa zogɛ mà è vɛ ga kui. 20Ƃɔɔƃɔɔ su, bɔ̀i, gè wõini gè wulo è lɔnɔ ma de ɣɛɛ vele ma su ɣilekpu da de maliɣiini. Zìi la daa‐zu de ɣɛɛ vele ma su ɣilekpu da Kolaini.

21Dàa vele ma ga yà woo‐mɛni‐kuloai, gà kɔlɔi nii wonɛzu è wɔ, kwɛ̃ɛgɛi bɛ̀ ga nii gè bosu yiɛ ga è kɛ yà kɛ ƃalaa é leve na va. 22Na ɣa ɣɛɛ na wɔnɔ ɣɛɛzu, wɛ̃ɛ lumu zu ƃɛtɛ màʋaa ma, toku ge zei ga kì ka ba ga wa Ɣala‐feliai zaala zu Gala ka ʋa bu wiɛ ga gè va wo wɔ.

Daali‐ma ɣaa‐ƃelagi

23Ɛpafela nii é ga bɔ̀ɔ vilisinei gé ɣɛɛ vele ma su ɣilekpu ga Ziizɛ Kolaini é è luoni. 24Vele nɔ na é la ga Maki, Aluisitakɔ, Dima é vɛɛ Luki va. Natiɛ ta ga bàa lii‐ɣɛɛ veaitiɛ. 25De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo yii zu fãa.

Currently Selected:

FAILIMƆ 1: DN1971

Highlight

Copy

Compare