HIIƂULUITIƐ 1
1
Gala ge ƃɔɛ dúi zaala zu
1Wɔlɔ‐wɔlɔi zu Gala ge woo wuuni dáa woo‐wo beaitiɛ la pele lamaa zu ta pele zii laali‐taaliga te ƃɔɛ la de mama gwɔlɔni pɔ. 2Kɛ̀ siɛ gaa‐ƃelagi nii zu zai ŋɛ ni é woo wua dúi la nà ƃɔɛ la de wɔ. Na ɣa ga dúi nii é yee ƃadoga ba ga ŋɛni ɣaazɔ pɛ keea nu. Tɔ nɔ ɣa ƃalaa pɛ é zui ƃɛtɛni ga zee. 3Tɔ Gala na saala‐malai maʋoloi lɛɛzu é ga Gala tuo velei mawo‐kɔ̃ɔ kpɔɔƃɔɔgi. Zée ɣa zui va ta gee ga ná gaa‐ƃaa woi. Tei sa é faa yowũ wuoni nu ƃuse ma, é zeini ɣalaso gwalai yee za‐su vele gee‐zuvɛ. 4To‐suvɛ wala ƃakpani sa é leve Gala ta ɣeelaitiɛ va ga velei ná daa‐zeigi é maa zɔlɔ woga gwala wɔɔlɔi la é leve Gala ta ɣeelaitiɛ ta dɛi va.
Gala dui ɣa ná keelaitiɛ maazu
5Su‐wulo‐zuvɛ ɣa: Gala ta ɣeela zɛƃɛ ɣa wɔlɔ Gala ge ɣɛɛ ma,
“Yà ga dùu. Zaa ɣa ge ɣɛɛ la ge è ɣeea”?
Ƃaa é ɣɛ tea,
“Gà ɣɛ ga kéea, é ɣɛ ga dùu”?
6Na ɣa ɣɛɛ na wɔnɔ nii ɣa é bosu é vile siɛgi va é ɣɛni vaazu vaazu la ga duu maa wũgi zui zu. Tɔ ɣɛɛzu tea,
“Ƃe ba Gala na keelaitiɛ ƃɔgɔpɛ
te vɛɛ kɔ́wɔ wu.”
7Gala kɔlɔi ɣa bosu ŋɛ ni é vile Gala ta ɣeelaitiɛ va yíɛ ɣɛ tea,
“Towaa ná keelaitiɛ maa wote ga fãga,
é ná tii‐ɣɛɛ veaitiɛ maa wote ga ŋabu‐zo.”
8Kɛ̀ Gala kɔlɔi ɣa bosu ŋɛ ni é vile Gala dui va yíɛ ɣɛ tea,
“Gala, yà masa kpɔkpɔgi ɣa na wɔlɔ‐wɔlɔ
ta wɔlɔ‐wɔlɔ.
Yà lele‐bo gaa‐ƃai ɣa é ga gaa‐ƃai yà
masadai ʋaa ma.
9È wõiya ga tuo ɣaa‐lɔga è zili ga tɔ tala luo.
Na ma Gala, yà Ɣalagi, é kuu‐zu‐nɛɛ wulo ƃadi
wua è wũmɔ.
É pua è wũmɔ zee wudɛ è vaitiɛ maazu.”
10Gala kɔlɔi ɣa bosu wɔnɔ yíɛ ɣɛ tea,
“Yài è ga gé maliɣii, yà nɔ ɣa è zui maʋaa
wɔwɔ vileni tɔɔ‐zei‐zuvɛ.
Na ɣa ɣɛɛ na gee‐zuvɛ ɣa ga è yee‐wo.
11Gee wɔlɔgi ƃɔga zui te zu ɣa ŋala‐ŋala,
kɛ̀ yà yɛ na. Ta wɔlɔ zaɣa è ɣɛ seɣe.
12Yà te maa ƃiti è ɣɛ pɛɛ‐ma zeɣe,
na ɣa ɣɛɛ na te maa ɣa ʋeli è ɣɛ velei nu
ɣa seɣe maa ʋeli da.
Kɛ̀ yà nɔ ga ɣavele, yà ɣɛ‐ŋetea wenagi
lɛ wɔlɔ‐wɔlɔ wɛ̃ɛga.”
13Kɛ̀ Gala ta ɣeelai zɛƃɛ ɣa wɔlɔ Gala ge ɣɛɛ ma,
“Zei ga zèe za‐su vele é yɛsu
gè è wɔɔ yɔ̃wɔitiɛ vɛɛ è wɔwɔ wu”?
14Kɛ̀bɛ ta ga Gala ta lii‐ɣɛɛ ŋɛnii niitiɛ te levegɛi ga te tii ɣɛ numai niitiɛ te vaazu balolai maa zɔlɔ wosu te mazaƃu ma, kɛlɛɛ?
Currently Selected:
HIIƂULUITIƐ 1: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
