LUKI 3

Bataize‐ɣɛɛ Jɔ̃ na Gala goo‐wo fai

1Tei Tabiilia Siiza kɛɛni kpɔkpɔgi ɣa ga kwena puugɔ kai loolu, Pãtia Paila ɣa é ɣɛni ga gɔmɛti nu walai Yudiiya yui zu, Yɛloo wɔ ge ga masa‐zee‐wu masa Geealali yui ʋaa ma. Na ɣa ɣɛɛ na Yɛloo deɣei Fele ɣa é ɣɛni ga masa‐zee‐wu masagi Etuulia ligi zu ʋaa ma ta Telakonaite ligi zu, Laisania wɔ ge ga masa‐zee‐wu masa Abelĩi ligi zu ʋaa ma. 2Eena ƃɔga Keeafa ɣa te ɣɛni ga laa‐ʋaale gwalaitiɛ te mawũgitiɛ. Siɛgi na zu ɣa Gala daa woi ziitini la Zɛkɛlɔiya dui Jɔ̃ ma kpooʋei zu. 3Jɔ̃ leve‐teveni ziɛ walai Jɔdɛ̃ wukũigi va ligi zu ɣaazɔ yíɛ Gala goi wo é vile bataize‐ɣɛɛ ʋai nii va pilegɛi pulu‐ɣaa‐ʋe faa va faa yowũ va su‐ʋaa‐yɛ faa ma. 4È ɣɛ velei ponɛi la kɔlɔi nii zu é ga Gala daa woo‐wo nui Aizeea laa woi,

“Nu ta ɣa lobasu kpooʋei zu yíɛ bo ga,

A de maliɣii na pelei ɣavele ƃɛtɛ.

A ná pelei lete to.

5Gizi zɔɔzuvɛtiɛ ɣaazɔ laa ɣa ʋe,

na ɣa ɣɛɛ na gizi kpaaza kpɔga gizi

pɛlɛ‐vɛlɛga ɣaazɔ te maa yii.

Vɛtiɛ ná zu zei‐seigɛi nátiɛ zu ɣa zakpa,

pelei niitiɛ te maa ɣa ɣɛ ɣalaza‐ɣalaza

nàtiɛ maa ɣa ɣɛ tɛlɛɣɛ.

6Na ɣa ɣɛɛ na nu ƃuse ɣaazɔ ɣa wɛlɛ Gala na

balolai va.”

7Na ma kpɔgitiɛ te wuloni te va Jɔ̃ wɔ vɛ ga é bataize ɣɛ ga tiɛ é ɣɛni te ma, “Wai ŋɛ ni wo ʋaa wuloai ga kaalia, ƃɛ ɣa é boga wo ma ga wo vela Gala na zii‐ɣaa‐wãlai va é vaazu? 8Ka dɔ kɛ mu a tii nii ɣɛ solowogɛi nui ma pulu ɣaa ʋegɛi faa yowũ va. A mɛ lɛ vɛɛ ga boga ɣigi zu wɔ ɣɛ ɣɛɛzu tea, ‘Eeƃɔlɔhɛ̃ɛ ɣa ga gé mama gwɔlɔ.’ Gè bo wiɛ, Gala ka zoo é kwɔtii niitiɛ ziɣi é te ɣɛ ga Eeƃɔlɔhɛ̃ɛ dea. 9Nii zu ƃalaa zooʋai ɣa sa guluitiɛ te maŋasai va yíɛ teve. Na ma gului nɛpɛ ɛ́ lɛ vaa ga gulu‐vaa vagɔ ta teve te pili ŋabui ɣa.” 10Nu ƃɔgi Jɔ̃ ɣaa zaɣa kɛɛni sa tiɛ ɣɛ ma, “Zɛƃɛ ɣa sa mu gá kɛ?” 11Tɔwɔ é te woi ɣaa woteni yíɛ ɣɛ te ma, “Nui nii pɛɛ‐pulu zeɣe felegɔ zéea, maa nɛɛvɛ é ta ʋe nui zɔi ya ta nɛpɛ gɛ lɛ zéea. Nui wɔnɔ ƃalaa daa‐mii ŋɛni zéea pagɛ é daamɔdai ɣɛ.” 12Gɔmɛti naʋolo‐wulo vea te vaani ƃalaa pɛ ga bataize ɣɛ ga tiɛ. Natiɛ te ɣɛni ma, “Kala‐mɔi, zɛƃɛ ɣa gá kɛ?” 13É ɣɛni te ma, “A mɛ lɛ naʋolo wulo ɔ́ leve nii liigoi va wo wuloai ga wo kulo.” 14Sɔdasia ta ƃalaa te vaani te gaa zaɣa kɛ te ɣɛ ma, “Gá ƃalaa pɛ zɛƃɛ ɣa gá kɛ?” É ɣɛni te ma, “A mɛ lɛ ŋɛni wulo nu ya ga kɛlɛ‐gbɛdɛ vele ɔ́ nɔ ɣɛ ga wo kɛ ga faa‐ʋɔɔ‐vɛɛ vele manui va. Na ɣa ɣɛɛ na pagɛ wo ʋɔɔnɛi ta fe nà é wo yii la.”

15Tei sa numaitiɛ ɣaazu ɣɛni faa ta luo ga é ɣɛ, gaa‐zaɣa‐kɛɛ te pɛ te yii zu é vile Jɔ̃ va ga ani ɣee ta towaa é ɣɛni ga Kolai, 16Jɔ̃ te pɛ te woi ɣaa woteni é ɣɛ tea, “Gà bataize ɣɛɛzu ga wiɛ ga ziɛ. Kɛ̀ nui kée ɣaa ƃai é leve bà tɔ vaazu. Tɔ ga nui gɛ̀ lɛ kuloni bu ga gè ná savala tokoi laa ʋũi. Towaa bataize ɣɛ ga wiɛ ga Gala baa ŋinɛgi ta ŋabu. 17Ná mɔlɔ‐ɣaa‐ʋe ŋɛnii ɣa zéea ga é mɔlɔi ɣaa ʋɛ é gaa lɛ ba é pu mɔlɔ wuu‐zuvɛ. Kɛ̀ nii é ga mɔlɔ ɣalai towaa nà ɣala ga ŋabui nii ɛ́ lɛ wɔlɔ‐wɔlɔ liʋiga.” 18Na ma Jɔ̃ é woo niinɛ woni te ma tɛnɛ goo lamaa ta ƃɔnɔga zu. 19Kɛ̀ Yɛloo nii é ɣɛni ga masa‐zee‐wu masa, Jɔ̃ kɛɛ‐zɔ boni déɣe ŋazai Yɛloodia ʋaa ma é vɛɛ tuo vele yowũi ɣaazɔ va é kɛɛni. 20É tuo vele yowũi ta vɛɛni tuo vele yowũi nii ɣaazɔ va Jɔ̃ vili fai ma bɛ́ kpidi vɛlɛ wu.

Bataize‐ɣɛɛ ʋai ga Ziizɛ

21Tei sa te bataize ɣɛɛni ga nui ɣaazɔ, te bataize ɣɛ ƃalaa pɛ ga Ziizɛ yíɛ sa Gala feli, gee wɔlɔgi laa laoni. 22Gala baa ŋinɛgi yiini má dɔtɔi nii zu nu ɔ́ ɣaazu la ma. Ɔ̀ ka ga ƃiiƃɔku ɣavele. Woo ta wɔ ge wuloni gee wɔlɔgi zu yíɛ ɣɛ tea, “Yà ɣa è ga ẁõila lui, nii zìi wala lai máʋai vɛ.”

Ziizɛ lɔlɔ fai

23Ziizɛ ná tii lɔɔ zeiyai ma bɛ́ káa wenagi ɔ́ sa zoo é ziiti zee saagɔ zu. Numaitiɛ ɣigi zu é ɣɛni ga Zoosɛ duu. Zoosɛ ɣɛni ga Hɛli duu, 24Hɛli ga Matati duu. Matati wɔ ge ɣɛni ga Liiʋai duu, Liiʋai ga Mɛɛki duu, Mɛɛki ga Janai duu, Janai ga Zoosɛ duu. 25Zoosɛ wɔ ge ɣɛni ga Matatia duu, Matatia ga Eemɔ duu, Eemɔ ga Nayɔ̃ duu, Nayɔ̃ ga Ɛ́sɛli duu, Ɛ́sɛli ga Nagai duu. 26Nagai ɣɛni ga Maa duu, Maa ga Matatia duu, Matatia ga Sɛmẽi duu, Sɛmẽi ga Zoosɛki duu, Zoosɛki ga Jooda duu. 27Jooda ɣɛni ga Joanɛ̃ duu, Joanɛ̃ ga Lɔisa duu, Lɔisa ga Zɛluu‐bɛbɛ duu, Zɛluu‐bɛbɛ ga Salatiɛ duu, Salatiɛ ga Nɛlui duu. 28Nɛlui ɣɛni ga Mɛɛki duu, Mɛɛki ga Adi duu, Adi ga Kosã duu, Kosã ga Ɛ́madã duu, Ɛ́madã ga Ɛ́ɛ duu. 29Ɛɛ ɣɛni ga Jasua duu, Jasua ga Ɛliyaaza duu, Ɛliyaaza ga Joolĩ duu, Joolĩ ga Matati duu, Matati ga Liiʋai duu. 30Liiʋai ɣɛni ga Simiã duu, Simiã ga Juda duu, Juda ga Zoosɛ duu, Zoosɛ ga Joonɛ̃i duu, Joonɛ̃i ga Ɛliakĩ duu. 31Ɛliakĩ ɣɛni ga Mɛlia duu, Mɛlia ga Mɛna duu, Mɛna ga Matata duu, Matata ga Neetã duu, Neetã ga Deeve duu. 32Deeve ɣɛni ga Jɛsi duu, Jɛsi ga Wobɛi duu, Wobɛi ga Boa duu, Boa ga Sala duu, Sala ga Naisɔ̃ duu. 33Naisɔ̃ ɣɛni ga Aminada duu, Aminada ga Adimi duu, Adimi ga Aani duu, Aani ga Hɛzɛlɔ̃ duu, Hɛzɛlɔ̃ ga Pɛlɛze duu, Pɛlɛze ga Juda duu. 34Juda ɣɛni ga Yeekɔ duu, Yeekɔ ga Aize duu, Aize ga Eeƃɔlɔhɛ̃ɛ duu, Eeƃɔlɔhɛ̃ɛ ga Tɛɛloa duu, Tɛɛloa ga Naayɔ duu. 35Naayɔ ɣɛni ga Sɛlu duu, Sɛlu ga Luu duu, Luu ga Pɛlɛ duu, Pɛlɛ ga Ɛbɛ duu, Ɛbɛ ga Sala duu. 36Sala ɣɛni ga Kainã duu, Kainã ga Afasa duu, Afasa ga Sɛ̃i duu, Sɛ̃i ga Nowa duu, Nowa ga Lamɛ duu. 37Lamɛ ɣɛni ga Mɛtuusila duu, Mɛtuusila ga Iinɔ duu, Iinɔ ga Jaalɛ duu, Jaalɛ ga Mahalali duu, Mahalali ga Kainã duu. 38Kainã ɣɛni ga Eenɔ duu, Eenɔ ga Sɛ duu, Sɛ ga Adã duu, Adã wɔ ge ga Gala duu.

Currently Selected:

LUKI 3: DN1971

Highlight

Copy

Compare